`ပါရမီရှင် ပရဟိတ´ လူငယ်အဖွဲ့ မှ မြန်မာနိုင်ငံစာဆိုတော်နေ့အထိမ်းအမှတ် စာပေဟောပြောပွဲ မကွေးမြို့တွင် ကျင်းပနိုင်ရန် မကွေးမြို့နယ်စာနယ်ဇင်းအဖွဲ့သို့ အလှူငွေဆယ်သိန်းကျော် စိုက်ထုတ်လှူဒါန်းမည်။
၂၀၁၁၊ နိုဝင်ဘာလ(၅)ရက်၊ နံနက်(၉)နာရီအချိန်တွင် မကွေးမြို့ ဈေးလယ်စိုးရပ်ကွက်၊ တံတားထိပ်လမ်း၊ ပါရမီရှင်ပရဟိတ ရုံးခန်းတွင် ပါရမီရှင်ပရဟိတ လူငယ်အဖွဲ့နှင့် မကွေးမြို့နယ်စာနယ်ဇင်းအဖွဲ့ တို့ စာပေဟောပြောပွဲ ကျင်းပနိုင်ရေးအတွက် အကြို ညှိနှိုင်းတွေ့ဆုံကြပါသည်။ ယင်းအသင်းအား ဦးဆောင်နေကြသော ဦးအောင်လွင်၊ ကိုဇော်မိုးတို့ နှစ်ဦးအား တွေ့ဆုံမေးမြန်းခဲ့ပါသည်။
မေး။ ဦးအောင်လွင်တို့ ပါရမီရှင် ပရဟိတအသင်းလေးရဲ့ စတင်ဖြစ်ပေါ်လာပုံလေးကိုသိပါရစေ..။
ဖြေ။ ဟုတ်ကဲ့ ပါရမီရှင် ၀ါဆိုသင်္ကန်းနှင့်ဆွမ်းဆန်စိမ်းလောင်းလှူရေးအဖွဲ့ အမည်နဲ့ လွန်ခဲ့သော(၁၇) နှစ်က စတင်ပြီး မကွေးမြို့မှာ ကျွန်တော်တို့လူငယ်တွေ စုပေါင်းဖွဲ့စည်းခဲ့ပါတယ်။ နှစ်စဉ် ရွှေစက်တော်ဘုရားမှာ ရှိကြတဲ့ ဘုန်းတော်ကြီးကျောင်းတွေကို သွားရောက်လှူဒါန်းခဲ့ကြပါတယ်။ ကျွန်တော်ကတော့ (၅)ကြိမ်မြောက်မှ ဒီအဖွဲ့ထဲကို ပါလာတာပါ။ တစ်နှစ်တစ်ကြိမ် အလှူလုပ်ပြီးတော့လဲ လူစုခွဲပြီး ဈေးရောင်းတဲ့သူက ဈေးရောင်း၊ ဆရာဝန်ကလဲ ဆရာဝန်အလုပ် ဆေးပြန်ကုကြပေါ့။ အဲ မကွေးမြို့တွင်းမှာ ပါရမီရှင် အဖွဲ့ကနေပြီး ပရောဂျက်(၃) ခု ပြန်ခွဲလိုက်ပါတယ်။ (၁) ၀ါဆိုသင်္ကန်း၊ ဆွမ်းဆန်စိမ်းလောင်းတယ်။ (၂) မကွေးမြို့ပေါ် မှာသွေးလိုအပ်ချက်အတွက် လှူဒါန်းကူညီရန် (ပါရမီသွေး) လှူရှင်များ စုပေါင်းဖွဲ့စည်းထားပါတယ်။ (၃) သဘာဝဘေးအန္တရာယ်ကျရောက်လာရင် ကူညီဖို့အတွက်လည်း စုပေါင်းဆောင်ရွက်နေကြပါတယ်။ မကွေးမြို့နယ်တွင်းက ရွာတွေဖြစ်တဲ့ အုံးတွဲရွာ၊ ဆူးပစ်စမ်းကျေးရွာမီးဘေးကယ် ဆယ်ရေးတွေကိုလည်း ထောက်ပံ့ကူညီလှူဒါန်းလုပ်ကိုင်ခဲ့ပါတယ်။
မေး။ ဦးအောင်လွင်၊ ဦးဇော်မိုးတို့ ပါရမီရှင် ပရဟိတအဖွဲ့အနေနဲ့ ယခုဘေးဒုက္ခဖြစ်ပေါ်နေတဲ့ ပခုက္ကူခရိုင်တွင်းက ဘယ်မြို့နယ်များကို ကယ်ဆယ်ရေးတွေအတွက် ဘယ်နှစ်ခေါက်လောက် သွားရောက်ဆောင်ရွက်နိုင်ခဲ့ပါသလဲ သိပါရစေ..။
ဖြေ။ ဟုတ်ကဲ့ အစကတော့ ကျွန်တော်တို့တစ်ဖွဲ့တည်းသွားမလို့စီစဉ်ထားသော်လည်း မကွေးမြို့ ဂရုဏာရှင်များအသင်းကြီးနဲ့ ပူးပေါင်းတိုင်ပင်ပြီး ရေဘေးကယ်ဆယ်ရေးကျရောက်တဲ့ရွာတွေအထိ နှစ်ခေါက် သွားရောက်လှူဒါန်းနိုင်ခဲ့ပါတယ်။ မကွေးမြို့ ဂရုဏာရှင်နာရေးအသင်းကြီး မပေါ်ခင်ကထဲက ကျွန်တော်တို့ ပါရမီရှင် ပရဟိတအဖွဲ့က စတင် ဖွဲ့စည်းခဲ့ကြတာပါ။ မကွေးမြို့ပေါ်မှာ ဂရုဏာရှင်နာရေးအသင်းကြီး စတင်တည်ထောင်ဖွဲ့စည်း တော့မယ်ဆိုတော့ ကျွန်တော်တို့ ပါရမီရှင် လူငယ်တွေကလည်း လုပ်အားပေး အလှူခံထွက်ခဲ့ကြပါတယ်။ အဲဒီအချိန်ကထဲက ကျွန်တော်တို့ ပါရမီရှင် ပရဟိတလူငယ်အဖွဲ့ထဲမှာ ပါဝင်လုပ်ဆောင်နေကြတဲ့ ကိုမော်လင်းတို့၊ ကိုမော်စီတုိ့ နဲ့ အချို့လူငယ်အဖွဲ့တွေက မကွေးမြို့ဂရုဏာရှင်နာရေးကူညီမှု အသင်းကြီးထဲကို ပါဝင်ပြောင်းရွေ့သွား ကြတာပါ။ ဒါကြောင့် ဘယ်ကိစ္စမဆို ကျွန်တော်တို့ ပါရမီရှင်အဖွဲ့က မကွေးမြို့ဂရုဏာရှင်များ အသင်းနဲ့ပူးပေါင်းလုပ်ကိုင် ဆောင်ရွက်နေကြရတာပါ။ ယခုလည်း တတိယအခေါက် ပခုက္ကူခရိုင်ရေဘေးဒုက္ခကယ်ဆယ်ရေး သွားဖို့စီစဉ်နေကြပါတယ်။ ပထမ ကယ်ဆယ်ရေးသွားစဉ်က ကား(၁၂)စီးပါပါတယ်။ ဆန်အိပ်(၂၀၀)ကျော်၊ အ၀တ်အထည်၊ အစားအသောက်ပစ္စည်း များနဲ့ ငွေသား(၄၅) သိန်းလှူဒါန်းနိုင်ခဲ့ပါတယ်။ ဒုတိယအကြိမ် ကယ်ဆယ်ရေးသွားတာကိုတော့ မကွေးမြို့ဂရုဏာရှင်များ အသင်း နဲ့ စုပေါင်း လှူဒါန်းခဲ့ပါတယ်။ အဲဒီက စာရင်းယူပြီးပေးပါ့မယ်။
မေး။ ယခု ကျွန်တော်တို့ မကွေးမြို့နယ်စာနယ်ဇင်းအဖွဲ့နဲ့ ပူးပေါင်းပြီး `မြန်မာနိုင်ငံစာဆိုတော်နေ့ အထိမ်းအမှတ်စာပေဟောပြောပွဲ ´ ကျင်းပနိုင်ရေးအတွက် ဘယ်လိုကူညီပေးမှာလဲ သိပါရစေ..။
ဖြေ။ ကျွန်တော်တို့ ပါရမီရှင် ပရဟိတအဖွဲ့အနေနဲ့ကတော့ စာပေဟောပြောပွဲကျင်းပရန်အတွက် ငွေဆယ်သိန်းခန့်အထိ ကူညီဆောင်ရွက်ပေးနိုင်ပါ့မယ်။ ကျွန်တော်တို့ ပါရမီရှင် ပရဟိတက လူငယ်လုပ်အားတွေနဲ့လဲကူညီပေးပါ့မယ်။ ဆရာတို့ မကွေးမြို့နယ်စာနယ်ဇင်းအဖွဲ့နဲ့ မကွေးတိုင်းဒေသကြီး ပြန်/ဆက် တို့က သက်ဆိုင်ရာ ဌာနအဆင့်ဆင့်ထံ ပွဲမိန့်ခံပြီး ဦးဆောင်ပေးကြပါလို့ အထူးမေတ္တာရပ်ခံလိုပါတယ်။ ကျွန်တော်တို့ မကွေးမှာ ၂၀၀၇ ခုနှစ်ကထဲက စာဆိုတော်နေ့အထိမ်းအမှတ်အဖြစ် စာပေဟောပြောပွဲ မဖြစ်ခဲ့ကြောင်းကိုသိရပါတယ်။ ဒါကြောင့် အစဉ်အလာမပျက် ကျွန်တော်တို့ မကွေးတိုင်းဒေသကြီး မကွေးမြို့မှာ ယခုနှစ် ၂၀၁၁ ခုနှစ်က စပြီး မြန်မာနိုင်ငံစာဆိုတော်နေ့ အထိမ်းအမှတ် စာဆိုတော်နေ့ စာပေဟောပြောပွဲကို မဖြစ်ဖြစ်အောင် ၀ိုင်းဝန်းကူညီဆောင်ရွက် ပေးကြစေလိုပါတယ်ခင်ဗျား..။ ဟု ဦးအောင်လွင်၊ ဦးဇော်မိုးတို့ နှစ်ဦးမှ ဖြေကြားပေးပါသည်။
မှတ်ချက်။ ။ ၂၀၁၁၊ စာဆိုနေ့အထိမ်းအမှတ် စာပေဟောပြောပွဲဖြစ်မြောက်ရေးအတွက် မကွေးစာနယ်ဇင်းမှ (၁၁-၁၁-၂၀၁၁)နေ့မှာ သက်ဆိုင်ရာဒေသအစိုးရအဖွဲ့များထံ စီမံချက်တင်ထားကြောင်း သတင်းရရှိပါသည်။
ရွှေလမ်းငွေလမ်းဝင်းကြည်
No comments:
Post a Comment