`မကွေးမြို့၏ လျှပ်စစ်မီး ဖြတ်တောက်မှု အခြေအနေများ´

`မကွေးမြို့၏ လျှပ်စစ်မီး ဖြတ်တောက်မှု အခြေအနေများ´ မကွေးမြို့ပေါ်တွင် ၆-၅-၂၀၁၂ နေ့နောက်ပိုင်းမှာ မိုးကဆက်၍ မရွာတာ ကြာခဲ့ပြီ။ အပူရှိန်ကလည်း တော်တော်ပြင်းထန်နေသည်။ ရာသီဥတုက နေ့၊ည တွင်အလွန်ပူအိုက်နေကြသည်။ လျှပ်စစ်မီးကလည်း ဒီဘက်ပိုင်းမှာ မီးမလာတဲ့ အချိန်တွေက နေ့စဉ်ဆက်တိုက် ဖြစ်နေ၏။ မီးမလာတော့ ရေကလည်းရှားလာ၏။ လျှပ်စစ်မီးအတွက် အများပြည်သူများ နှင့် ကျောင်သူ ကျောင်းသားများ စိတ်သောကများ၍ ဆင်းရဲဒုက္ခ ရောက်နေကြရပါသည်။ ထို့ကြောင့် အများပြည်သူများ သိချင်နေသော မျှော်လင့်စောင့်စားနေသော လျှပ်စစ်မီးသတင်းကို မကွေးမြို့နယ်လျှပ်စစ်မန်နေဂျာရုံးသို့ သွားရောက်စုံစမ်း တင်ပြပေး လိုက်ရပါသည်။ ၂၅-၅-၂၀၁၂ နေ့ နံနက်(၁၀း၃၀)နာရီအချိန်တွင် မကွေးမြို့နယ်လျှပ်စစ်မန်ဂျာ ဦးအောင်မျိုးသန်းထံသို့ မကွေးမြို့ လျှပ်စစ်မီး ဖြတ်တောက် သုံးစွဲနေရမှုအား သွားရောက်သတင်းရယူခဲ့ပါသည်။ မကွေးမြို့မှာ အလုပ်ရုံ စက်ရုံများမပါ ပုံမှန်သုံးစွဲမှု ဓာတ်အားမှာ (၇.၅) မဂ္ဂါဝပ်ခန့် သုံးစွဲရမည်ဖြစ်ကြောင်းသိရသည်။ ယခုလက်ရှိ အခြေအနေမှာတော့ မကွေးမြို့ သုံးစွဲခွင့်ပြုထားသော လျှပ်စစ်ဓာတ်အားမှာ (၂.၅)မဂ္ဂါဝပ် မှ (၃) မဂ္ဂါဝပ်ထိသာ သုံးစွဲနေရကြောင်းသိရသည်။ မန်ကျီးကန် မဟာဓာတ်အားလိုင်း ဓာတ်အားခွဲရုံအပေါ် မူတည်၍ အပြောင်းအလဲရှိမည်ဟု သိရ၏။ ထို့ကြောင့် (၂၄-၅-၂၀၁၂)နေ့ထိ A.B.C သုံးအုပ်စုခွဲပြီး တစ်အုပ်စုမှာ (၆)နာရီတစ်ကြိမ်သာ လျှပ်စစ်မီးသုံးစွဲရန် ဖြန့်ဝေပေးနိုင်ကြောင့်သိရ၏။ အလှည့်ကျဆိုသော်လည်း တစ်နိုင်ငံလုံး လျှပ်စစ်ဝန်အား ရှပ်ဒေါင်းကျသွားလျှင်လည်း အားလုံးပြတ်တောက်တတ် သွားသည်။အလှည့်ကျပေးထားသောရပ်ကွက်များမှ မီးသုံးများသွားလျှင်လည်း ထရမ်စမာများမှာ မိန်းများက ခဏ ခဏပြုတ်ကျတတ်သည်ဆို၏။ ယင်းအလှည့်ကျစနစ်ကို မီးပြတ်သောအချိန်များအား အစားထိုး၍ ပြန်လည်မပေးနိုင်ကြောင်း သိရသည်။အခြားမြို့ကြီးများကဲ့သို့ ရွှေ့လျား မီးစက်ကြီးများ မကွေးမြို့တွင် မရှိသေးကြောင်း သိရသည်။ ယခုလက်ရှိ ကားပေါ်တွင် တင်ထားပြီး အရေးပေါ်သုံးနိုင်ရန်အတွက် ကီလိုဝပ်(၁၆၀) တစ်လုံး၊ ကီလိုဝပ်(၁၀၀)၊ ကီလိုဝပ်(၄၀) စက်အသေး (၃)လုံးသာ ရှိကြောင်းမြင်တွေ့ခဲ့ရသည်။ မကြာမီမှာ (၂)မဂ္ဂါဝပ်ရှိ ရွှေ့လျားမီးစက်ကြီး(၆)လုံးကို အမှတ်(၂) လျှပ်စစ်ဝန်ကြီးဌာနမှ အမေရိကန်နိုင်ငံသို့ မှာကြားဝယ်ယူထားသော မီးစက်များရောက်လာတော့မည်ဖြစ်ကြောင်း၊ ၎င်း စက်များကို ဘယ်မြို့နယ်များသို့ ခွဲဝေပေးမည်ဆိုတာကို မသိရသေးကြာင်း ကြားသိခဲ့ရသည်။ မကွေးမြို့နယ်လျှပ်စစ်မန်ဂျာ ဦးအောင်မျိုးသန်းထံဤသို့မေးမြန်းပါသည်။ အခြားမြို့ကြီးတွေမှာလို လျှပ်စစ်မီးလင်းရေး အတွက် အများပြည်သူများမှ ဆန္ဒပြုနေသလို မကွေးမြို့မှာ မဖြစ်အောင် ဘယ်လိုများ ကြိုတင်စီစဉ်ဆောင်ရွက်ထားပါသလဲ၊ မီးလင်းရေး အတွက် အများပြည်သူတွေက ဆန္ဒထုတ်ဖော်ကြရင်ကော လျှပ်စစ်မီးအားကို ယခုထက် ပိုပြီး ပေးနိုင်ပါမည်လား..? ဟု စာရေးသူမှ မေးကြည့်ပါသည်။ `` အများပြည်သူများသိရှိအောင် အမှတ်(၂)လျှပ်စစ်ဝန်ကြီး၏ မေတ္တာရပ်ခံတောင်းပန်ချက် စာများနဲ့ ရွှေလီ- မန်စံဘက်မှာ ဖျက်စီးခံရလို့ ပျက်သွားတဲ့ တာဝါတိုင်များကို ပြန်လည်ပြုပြင်နေသော ဓာတ်ပုံများကို စာရွက်ကြီးများ၊ ဗီနိုင်းပုံကြီးများနဲ့ ကူးယူပြီး မကွေးမြို့တွင်း လူစည်ကားရာနေရာ၊ လက်ဖက်ရည်ဆိုင်များမှာကပ်ထားပါတယ်။ ယခု ကျွန်တော်တို့ရုံး မီတာခွန်ကောက်ခံ ဌာနနဲ့ အရေးပေါ် မီးပျက်ရင် တိုင်ကြားဌာနများမှာလည်း အများမြင်သာအောင် ကပ်ပေးထားပါတယ်။ အားလုံးက လျှပ်စစ်မီးရရှိရေးကို ဆန္ဒထုတ်ဖော်ကြရင်လဲ ကျွန်တော့် အဆင့်အနေနဲ့တော့ ပိုပြီးပေးစရာမရှိပါဘူး။ မဟာဓာတ်အားလိုင်းမှာ လက်ရှိကာလ အသုံးပြုခွင့်ရှိသလောက်သာ မျှဝေသုံးစွဲပေးနေရပါတယ်။ ဇွန်လဆန်းလောက်မှာ ရွှေလီ-မန်းစံဘက်က တာဝါတိုင်တွေ ပြုပြင်ပြီးမယ်ထင်ပါတယ်။´´ဟု မြို့နယ်မန်နေဂျာ ဦးအောင်မျိုးသန်း မှ ပြောဆို၍ သတင်းရယူခဲ့ပါသည်။ ၀ိုင်းကြည်အောင် ၂၀၁၂ ခု၊ မေလ(၃၀)ရက်နေ့ထုတ် အတွဲ(၄) အမှတ်(၂၀) မြန်မာပို့စ် သတင်းဂျာနယ်တွင် ဖော်ပြထားပါသည်။