ဝတ္တရား နှင့် တာဝန် ကျေပွန်လျှင်

ခုတစ်လော မျိုးစောင့်ဥပဒေကိစ္စအသံမျိုးစုံ  ကြားနေရပါတယ်။ တချို့ ပြင်းပြင်းထန်ထန်၊တချို့ကျတော့ ပျော့ပျော့ပြောင်းပြောင်း၊ တချို့ မျှမျှတတ ၊တချို့က မရမက သဘာဝမကျ ပြောကြဆိုကြ၊ စုံလို့ပါပဲ။

          မျိုးစောင့် ဥပဒေက လွှတ်တော်ထဲတောင် မရောက်ရသေးဘူး၊သို့လော သို့လော ဖြစ်နေကြပြီ၊ ဥပဒေတစ်ခု ပြုမယ်ဆိုရင် နည်းလမ်းတကျ၊ လမ်းကြောင်းမှန်စွာဖြင့် ပြည်သူတွေ အမှန်တကယ်လိုအပ်တဲ့ ဥပဒေလား၊ ပြည်သူတွေ လိုက်နာသင့်တဲ့ဥပေဒလား၊ပြည်သူတွေ စိတ်ဝမ်းအေးချမ်းသာယာစေမယ့် ဥပဒေလား ဆိုတာကိုတော့    စခဲ့တဲ့သူများရဲ့ စိတ်ရင်း စေတနာပေါ်မှာ မူတည်မှာပါ ။ 

          အဲ့ဒီ ဥပဒေမှာ ဘာတွေပါတယ်ဆိုတာထက်၊ စာရေးသူငယ်စဉ်ကထဲက ရွတ်ဆိုခဲ့ရတဲ့ စောင့်လေမျိုးနွယ်  ၀တ်ငါးသွယ်  ကျင့်ဖွယ်  သား/သမီး တို့တာ၊ သားသမီးဝတ္တရားငါးပါး ၊မိဘ၀တ္တရားငါးပါး၊ ဆရာဝတ်၊တပည့်ဝတ်၊ စသဖြင့်ပေါ့၊ အဲဒီအထဲမှာ ၀တ္တရား ဆိုတာကို သတိထားမိပါတယ်၊ ၀တ္တရားဆိုတာ အချိန်နှင့်အမျှ မပျက်မကွက် ဆောင်ရွက်လုပ်ကိုင် ဖြည့်ကျင့်ရခြင်းဖြစ်ကြောင်း၊ ၀တ္တရား ပျက်ကွက်ရင် တစ်ဦးတစ်ယောက်နှင့်သာ သက်ဆိုင်ပြီး ဆက်စပ်ပတ်သက်ရာကို ထိခိုက်နစ်နာကြောင်း မှတ်သားရဖူးပါတယ်။

          စောင့်ထိန်းရမဲ့၊စောင့်ထိန်းသင့်တဲ့ ၀တ္တရားတွေ ၊ ကျင့်ဝတ်တွေကို တစ်ဦးစီ၊တစ်ဦးစီချင်းက ပျက်ကွက် ခဲ့ကြတာ ဘယ်လောက်ထိများနေပြီလဲ၊ အဲဒီ ပျက်ကွက်ခဲ့တဲ့ တစ်ဦးစီ၊တစ်ဦးစီ နဲ့ ဆက်စပ်ပတ်သက်သူတွေ ကော ဘယ်လောက်ထိ နစ်နာခဲ့ကြပြီလဲ ၊ စစ်တမ်းကောက်ဖို့လဲ အချိန်မရတော့ပါဘူး၊အချိန်နှင့်အမျှ မပျက်မကွက် ဆောင်ရွက်လုပ်ကိုင် ဖြည့်ကျင့်ခြင်း မရှိခဲ့လို့ ခုချိန်မှာ မရှုနိုင်၊ မကယ်နိုင် ဖြစ်နေကြပုံပါပဲ။ဒီလို မဖြစ်ရအောင် ကိုယ်လုပ်ရမဲ့အလုပ် လုပ်ခဲ့ကြပါသလား၊မသိနားမလည်ကြသေးတဲ့ လူငယ်လူရွယ်တွေကို သွန်းသင်ဆုံးမမှုတွေ၊လမ်းကြောင်းမမှားအောင်၊ ယိမ်းယိုင်မှု မဖြစ်အောင် ထိန်းသိမ်းပြုပြင်ပေးကြတာ နည်းလို့ပဲ ဖြစ်မှာပါ၊ အပြစ်ရှာကြမယ်ဆိုရင် ဂျာ့အေး သူ့အမေရိုက်  နေမှာလေ။

          ခုတော့  မျိုးစောင့် ဥပဒေ တဲ့၊ နိုင်ငံတော်ရဲ့ဥပဒေတစ်ရပ်အဖြစ် ပြဌာန်းမယ်ဆိုရင် အဲဒီဥပဒေကို လူတိုင်း လိုက်နာရမယ့် တာဝန် ရှိပါတယ်။ တာဝန်ဆိုတာ အကြောင်းအချင်းအရာ အခြေအနေတစ်ရပ်ပေါ် မူတည်ပြီး မလုပ်မဖြစ် လုပ်ရမည့် ကိစ္စဖြစ်ကြောင်း၊ တာဝန်ပျက်ကွက်ရင် တိုင်းပြည်နှင့် ချီပြီး နစ်နာမှုရှိမှာ ဖြစ်ကြောင်း မှတ်သားရဖူးပါတယ်။ ဥပဒေကို မသိလို့ ကျူးလွန်မိတယ်ဆိုတာ ဥပဒေကလက်မခံပါဘူး၊ ဥပဒေအထက်မှာလည်း ဘာမျှ မရှိပါဘူး၊ ဥပဒေဟာ သက်ဝင်နေဖို့လည်း လိုမှာပါ၊ အကယ်၍များ မျိုးစောင့် ဥပဒေကို နိုင်ငံတော် ဥပဒေတစ်ရပ်အဖြစ် အတည်ပြုပြဌာန်းလိုက်ပြီးနောက်မှာ ဥပဒေကို ချိုးဖောက် မလိုက်နာ သူမှန်သမျှ ဥပဒေအရ အဆုံးအဖြတ်ပြုရမှာပါ၊ ဥပဒေကပေးတဲ့ ရိုက်စရာဒုတ် ရှိသွားတာပေါ့ ၊ ရိုက်ချက်မမှန်ရင် နားဝင်ပီယံ ၊မဖြစ်မှာတော့ စိုးမိပါတယ်။

          လူမျိုးတိုင်းမှာ မိမိယဉ်ကျေးမှု၊မိမိကိုးကွယ်ရာ ဘာသာ/သာသနာ၊အမျိုးကိုချစ်တဲ့ စိတ်ဓါတ်ဆိုတာ ရှိကြတာပါပဲ၊ နိုင်ငံတိုင်၊တိုင်းပြည်တိုင်မှာလည်း အဲဒီစိတ်ဓါတ်တွေနဲ့ ၀ိုင်းဝန် စောင့်ထိန်း လိုက်နာကြတာပါပဲ။

          မြန်မာနိုင်ငံမှာ ထေရ၀ါဒ ဗုဒ္ဓဘာသာ ကို အများစုကိုးကွယ်ကြပါတယ်၊ ဗုဒ္ဓဘာသာမှာလည်း သာသနာ ဆိုင်ရာ ဘုရားကျမ်းဂန်၊ပိဋကတ်သုံးပုံ ပြည့်စုံစွာရှိပြီးသားပါ၊ သံဃာတော်များအတွက်လည်း ၀ိနယ(၀ိနည်း)၊ ဓမ္မ အတိုင်း ကျင့်ကြံလိုက်နာကြဖို့ပဲဖြစ်ပါတယ်။

          မြန်မာ့ဥပဒေတွေထဲမှာ မြန်မာ့ထုံးတမ်းဥပဒေ ဆိုတာရှိပါတယ်၊အဲဒီဥပဒေထဲမှာ မြန်မာအမျိုးသမီး/ အမျိုးသားများအတွက် ပြည့်စုံမှုမရှိသေးရင်၊ အဲဒီဥပဒေကို ဖြည့်စွက်၊ပြင်ဆင် လုပ်ရုံပါပဲ၊ပြီးပြည့်စုံပြီး ဖြည့်စွက် ပြင်ဆင်စရာမလိုတဲ့ ဥပဒေ ဆိုတာမရှိပါဘူး၊ ဥပဒေကပေးထားတဲ့ ဒုတ်ကြီးကို ကြောက်ရလို့ ဆိုတာထက်၊ မသိသေးတဲ့ စိတ်နေသဘောထားကို အသိစိတ်နဲ့ စိတ်သဘောထားပြောင်းလဲလားအောင် ဆောင်ရွက် သင့်ပါတယ်။ အချိန်ရယူမှာ အခက်အခဲရှိမှာတော့ အသေအချာပါပဲ။

          အမျိုးဂုဏ်၊ဇာတိဂုဏ်နဲ့ မျိုးနွယ်စောင့်တရားတွေ လူငယ်လူရွယ်တွေရဲ့ စိတ်မှာ ကိန်းအောင်း ခံယူလာအောင် အစိုးရစာသင်ကျောင်းတွေ၊ပုဂ္ဂလိက စာသင်ကျောင်းတွေ၊အလုပ်ရုံ၊စက်ရုံ၊ကုမ္ပဏီအသင်းအဖွဲ့ တွေမှာ ကျယ်ကျယ်ပြန့်ပြန့် ပညာပေးဖို့ လိုအပ်မှာပါ။ထိန်းသိမ်းစောင့်ရှောက်ပေးနေတဲ့ လူပုဂ္ဂိုလ် အဖွဲ့ အစည်း တွေကိုလည်း စိတ်ရင်း စေတနာကောင်းနဲ့ လုပ်ရတဲ့အလုပ်မို့ မည်သူနဲ့ မဆို အတူပူးပေါင်း ဆောင်ရွက်သင့်လှ ပါတယ်၊ အချိန်မနှောင်းသေးပါဘူး၊ မလုပ်နိုင်ကြလို့၊မလုပ်ကြသေးလို့ စိုးရိမ်းမှုတွေ ရှိနေကြတယ်လို့ ထင်ပါတယ်။

          အမှန်တော့ မျိုးစောင့်တရား ဆိုတာ ရှိရမှာပါ၊ကာကွယ်ရမှာပါ၊ထိန်းသိမ်းစောင့်ရှောက်ကြရမှာပါ။ ဒါကို မစိုးရိမ်းပါနဲ့လို့တော့ မပြောလိုပါ၊ လူတစ်ဦးချင်းစီက မိမိနိုင်ငံရဲ့ ဘာသာ ၊သာသနာ၊ယဉ်ကျေးမှုတွေကို ၀တ္တရား အရလည်း နားလည်း လက်ခံပါစေ၊တာဝန်အရလည်း လိုက်နာစေရေး ဦးတည်လိုရင်းဖြစ်ပါတယ်။

          နိုင်ငံတော်ရဲ့ ဥပဒေတစ်ရပ်အဖြစ်ကိုတော့ ကျယ်ကျယ်ပြန့်ပြန့် တွေးခေါ်မျှော်မြင်စွာနဲ့ တာဝန်ရှိသူများ က ဆက်လက်ဆောင်ရွက်စေလိုပါကြောင်း မေတ္တာရေသွန်းလောင်း တင်ပြရပါကြောင်း။  ။

သိန်းထွန်းအောင်(အောင်မေတ္တာ)

စာရေးသူ၏ အာဘော်သာဖြစ်ပါသည်။

သတင်းတာဝန်ခံ