ဘာသာရေး
ရွှေလမ်းငွေလမ်းဝင်းကြည်
ဆရာခင်ဗျား၊ -ဆရာ၏ စာဖတ်ပရိတ်သတ် တပည့်ငယ်တစ်ဦး တစ်ယောက်အဖြစ်နဲ့ အသိအမှတ်ပြုပြီး မေတ္တာရပ်ခံ ဆွေးနွေးတင်ပြခွင့်ပြုပါ။
စာပေဝေဖန်ရေး မဟုတ်ပါ၊ စာပေလောကတွင် စာပေဝေဖန်ရေး လူကြမ်းမင်းသားကြီးဆရာ အောင်သင်အား စောဒကတက် မဝေဖန်ရဲပါခင်ဗျား။ ဒါပေမယ့် ကျွန်တော် သဘောမကျ မနှစ်သက်သော ယခု ကိစ္စကို ကျွန်တော်နှင့်တကွ ပြည်သူလူထု၊ စာဖတ်ပရိတ်သတ်ထံ၊ ပြန်လည် ရှင်းလင်းပေးရန် လိုအပ်မည် ဆိုလျှင် ရှင်းပြ ပေးစေလိုပါတယ်။ စာဖတ်သူများဘက်မှ ရှေ့နေလိုက်၍ ကျွန်တော် မရဲတရဲ အကဲစွန့်ပြီး မေတ္တာရပ်ခံအယူခံလွှာတင်ပြခြင်းပါဆရာ။
အယူခံ မတင်ပြခင်မှာ၊ကျွန်တော့်အကြောင်း အနည်းငယ်၊ စကားပလ္လင်ခံထား ရပါစေခင်ဗျား၊ ကျွန်တော်ဟာ ၁၉၉၄ ခုနှစ်၊ နွေဦးမတိုင်ခင်က စတင်ထွက်ပေါ်လာသော စာပေရူးတစ်ယောက်ဖြစ်ပါတယ်။ အသေးအဖွဲ ဆောင်းပါးလေးများ။ အနည်းငယ်မျှသာ ရေးသားခဲ့ဘူးပါသေးတယ်။ စာပေလောကမှာဝါသနာရှင်၊ ပညာသင်၊ ကလောင်သွေးခါစ၊ မူလတန်း အဆင့်ပါဘဲ၊ ပညာဆည်းပူးဆဲ ဖြစ်ပါတယ်။ လက်ရှိပညာအရည်အချင်း၊ စီးပွားရေး၊ ရာထူး၊ ဂုဏ်သိက္ခာမှာ သုညအောက်မှာ သုညအဆင့်သာ ရှိပါတယ်ဆရာ။ဒါတွေ ကြိုတင်ပြောကြားနေတာက ဆရာအောင်သင်း ပြန်ကြားမယ့် စကားလုံးတွေဟာ ကျွန်တော်နဲ့ တန်ရာ တန်ရာ ပြန်ကြားနိုင်အောင်လို့ပါ။ ဆရာနဲ့ ကျွန်တော်ဟာ မြင့်မိုရ်တောင်ကြီးကို ဇီးစေ့ကလေးနဲ့ ပေါက်သလို၊ ဖြစ်နေမှာတော့ ဧကန်ပါ ဆရာ၊ နာမည်ကြီး ဆရာ တစ်ယောက်ကို နာမည် မရသေးတဲ့ အညတြ ပုဂ္ဂိုလ် တစ်ယောက်က လူသိ နာမည်ကြီးလာအောင် ဆွေးနွေးတယ်လို့ပဲ ထင်ချင်ရင် ထင်ကြပါစေတော့၊ အမျိုးဘာသာ၊ သာသနာမျက်နှာကြည့်၍ ရေးသားမိပါတယ်။
လောကပါလ တရားနဲ့ဘဲ ဆွေးနွေးခွင့်ပြုပါဆရာ၊ ကိစ္စမှာ အပြုသဘောနဲ့ တင်ပြပါရစေ။
၁၉၉၅-ခုမတ်လထုတ်၊ သင့်ဘ၀ မဂ္ဂဇင်းအမှတ်(၃)၊ စာမျက်နှာ(၇၉)မှာ ဆရာ အောင်သင်းရဲ့ (မကျန်းမာခြင်းသည် လာဘ်ကြီး တစ်ပါး) ဆိုသော ဘာသာပြန်ခေါင်းစဉ်ကြီး ကိစ္စပါ။ ဘာသာပြန်သူ ဆရာအောင်သင်း ပဏမ ရေးသားထားရာမှာ-
မူရင်းခေါင်းစဉ်ကို တိုက်ရိုက်ဘာပြန်လိုက်လျှင်တော့ဖြင့် (မကျန်းမာခြင်းကို တန်ဖိုးရှိအောင် လုပ်ပါဟု ဆိုရပေလိမ့်မည်)ကျွန်တော်ကတော့ မြန်မာနားတွင် ပိုနီးအောင်ဆိုပြီး( မကျမ်းမာခြင်းသည် လာဘ်တစ်ပါး)ဆိုသော ခေါင်းစဉ်ဆိုးကြီး ပေးထားတာကို လုံးဝ မနှစ်သက်ပါ။ ဘာကြောင့်ခါးခါးသီးသီး ကျွန်တော်ညင်းချင်သလဲဆိုတော့ဆရာရယ်၊ ကျွန်တော်တို့ဟာ ဗုဒ္ဓဘာသာတွေပါ၊ ကျွန်တော်တို့ တိုင်းပြည်ကလဲ မြန်မာနိုင်ငံပါ၊ မြန်မာနိုင်ငံအတွင်းမှာ ဗုဒ္ဓဘုရားရှင်၏ ဗုဒ္ဓဘာသာထွန်းကားရာ တိုင်းပြည်ဆိုလျှင် လူတိုင်း လက်ခံမှာပါ။ မြန်မာနိုင်ငံအတွင်းမှာ ဗုဒ္ဓဘာသာ မြန်မာလူမျိုးတွေရဲ့ နားထဲကို (မကျန်းမာခြင်းသည် လာဘ်ကြီး တစ်ပါး)လို့ ဆရာက ဇွတ်ရိုက်သွင်းပေးလိုက်တယ်ဆိုတော့ မည်သူတွေ နားဝင်ချိုပါမည်နည်း၊ ဗုဒ္ဓတရားတော်တွေဟာ လောကီ၊ လောကုတ္တရာ နှစ်ဖြာသော ကောင်းကျိုးတွေနဲ့ အကြောင်းရယ်၊ အကျိုးရယ် ခရေစေ့တွင်းကျ၊ ဒိဋ္ဌိဝီစိကိစ္စ စင်ကြယ်အောင် ဆိုဆုံးမ ဟောကြားထားခဲ့တာပါ။တရားတော်များကို မည်သူမျှ ပြင်ဆင်စောဒက တက်လို့ မရပါ။ ဗုဒ္ဓဘုရားရှင်၏ လက်သုံးစကားမှာ မူရင်း ကျမ်းအဆို( အာရောဂျ-ပရမာလာဘာ) ယနေ့အများသုံးနေတာ(အာရောဂျံ ပရမာလာဘံ) ကျန်းမာခြင်းသည် လာဘ်ကြီး တစ်ပါးဖြစ်ပါသည်။ ဘုရားရှင်ကိုယ်တော်မြတ်ကြီး၏ ဓမ္မပါဒ ပါဠိတော်ကျမ်းတွင် စာပုဒ်ပေါင်း(၄၂၄)ပိုဒ်ထဲမှ အပိုဒ်နံပါတ်(၂၀၄)မှာ သေချာပြသ ဆိုဆုံးမ ဟောကြားထားခဲ့ပါတယ်။ ဓမ္မပါဒအဌကထာ(ဒုတိယပဂေါ)စာမျက်နှာ(၁၇၁)မှ (၁၇၃)အထိ စာပိုဒ်နံပါတ်(၂၀၄)နဲ့ အကျယ်ဟောကြားထားတာလည်း တွေ့ရပါတယ်။
မြန်မာတွေရဲ့နားတွေထဲမှာလည်း နှစ်ပေါင်းနှစ်ထောင့်ငါးရာကျော်တိတိ ဘိုးစဉ်ဘောင်ဆက် ရာသက်ပန် အရိုးစွဲသည်လာတာက (ကျန်းမာခြင်းသည် လာဘ်တစ်ပါး ဟုဆိုနေကြပါ) ယခုတော့ ဆရာအောင်သင်းက(မကျန်းမာခြင်းသည် လာတ်ကြီး တစ်ပါး)ဟု ဖော်ပြထားပါတယ်။ ကျွန်တော်တို့ ဗုဒ္ဓရှင်တော်ဘုရား ဆုံးမစကားကို လွယ်လွယ်လေးနဲ့ ဘေးကို ဖယ်ပြီး ဖျက်ချေပစ်ရာ ကျနေပါပြီ။ ဒါမြန်မာပြည်ဖြစ်နေလို့ ထောက်ပြရတာပါ။ ပညာရှိ သတိဖြစ်ခဲ စကားကိုလည်း ကျွန်တော် လက်မခံလိုပါ။ ဆရာတော်စာချ၊ မီးချောင်းမင်း ရေခင်းပြဖြစ်နေရင်လည်း သည်းခံပါဆရာ၊ ကျွန်တော် ကြားဖူးထားတဲ့ သာဓက တစ်ခုလို မဖြစ်စေရန် တင်ပြပါရစေ။
ရွာတစ်ရွာမှာ သက်တော်ဝါတော်ကြီး ဆရာတော်ကြီး တစ်ပါးဟာ(အကုသလာ၊ ကုသလဓမ္မာ)ဟု အမှန်ဆိုရမည့်အစား သူ၏ မူရင်း ပေစာထုတ်အောက်ခြေနားမှာ ချပိုးကိုက်သွား၍(အကုသလာ၊ကသလာဓမ္မာ)ဟု တစ်ချောင်းငင် မပါသံနဲ့ဘဲ၊ တရားပွဲတိုင်းမှာ ဟောကြားလာခဲ့ပါတယ်။တစ်နေ့မှာ စာပေ၀ါသနာရှင် တစ်ယောာက်မှ စောဒက တက်ပါတယ်။
“ ဟေ့ ဒကာ၊ ငါ့ဝါတော်နဲ့ ငါသိက္ခာကို မင်းနဲ့ကျမှ အကျမခံနိုင်ဘူး၊ မယုံရင် ကျောင်းမှာ ရှိတဲ့ င့ါမူရင်း ပေစာထုတ်၊ယခုယူကြည့် ငါတစ်သက်လုံး တရားဟောလာခဲ့တာ အမှန်ပဲ” လို့ ပြောကြားတာကို ပြန်ပြီးသတိရမိပါတယ်ဆရာ။
သင့်ဘ၀မဂ္ဂဇင်းရဲ့ ထိပ်ဆုံးဆောင်ပုဒ်သည်(သူတော်ကောင်းဓါတ်တရား မြတ် လွှမ်းပတ်ကမ္ဘာ တည်စေသော်) ဟု ကြွေးကြော်ဖော်ပြထားပါသည်။ ဗုဒ္ဓရှင်တော်ဘုရား၏ အဆုံးအမ တရားများသာလျှင် သူတော်ကောင်းစိတ်ဓါတ် အခြေခံ မဏ္ဍိုင်များ ဖြစ်သည်ဆိုတာ မည်သူမျှ ငြင်း၍ မရနိုင်ပါဆရာ။ ဗုဒ္ဓဘုရားရှင်၏ မူရင်းတရားစကားကို မသွေဖီ မပြောင်းလဲသင့်ပါ။ ရှင်တော်ဘုရားဟာ ကာလဒေသ ပုဂ္ဂိုလ်ကို ကြည့်ပြီး တန်ရာ တန်ရာ သင့်ရာသင့်ရာ ၊ ဓမ္မများကိုသာ သူ့အဆင့်နဲ့သူကြည့်ပြီး ဝေနေယျတွေကို ကျွတ်တန်းဝင်အောင် ချွတ်ပေးသွားတယ်လို့ ကျွန်တော်စာပေတွေထဲမှာ မှတ်သား သိရှိခဲ့ရပါတယ်။
ဒါကြောင့် ဆရာပေးထားတဲ့ ခေါင်းစဉ်ကြီးဟာ ဗုဒ္ဓဘာသာ မြန်မာနိုင်ငံတိုင်းပြည်ကြီးတွင် လုံးဝ မသင့်လျော်ပါ။ ဗုဒ္ဓဘာသာ မြန်မာလူမျိုးများအတွက် ဒိဋ္ဌိ (အယူမှား)စေမဲ့ အဆိပ်လူးနေတဲ့ ခေါင်းစဉ်ကြီး ဖြစ်နေပါတယ်။ ဗုဒ္ဓဘုရားရှင် တရား ဟောကြားသော ဒေသနာ တရားတော်များနှင့်လည်း ပြောင်းလဲ သွေဖီ ဆန့်ကျင်နေတာဖြစ်လို့ မြန်မာပြည်က ဗုဒ္ဓဘာသာ စာဖတ်ပရိတ်သတ်အနေနဲ့ မနှစ်သက်ကြောင်း တင်ပြလိုက်ပါတယ်။ ဖြစ်နိုင်မယ်ဆိုရင် (မကျန်းမာခြင်းသည် လာဘ်ကြီးတစ်ပါး)ဆိုသော ဒီခေါင်းစဉ်ဆိုးကြီးအား ပြင်ဆင်ပေးပါရန် မေတ္တာရပ်ခံအပ်ပါတယ်။
စာရေးသူ ကျွန်တော်ရဲ့ အသိဥာဏ်ဖြုတ်ဦးဏှောက်ကလေးဟာ (အတ္တဒိဋ္ဌိ)စွဲပြီး အယူမှား၊ အမှတ်မှား၊ အသိမှားတွေနဲ့၊ ဘာသာရေး အမြင်ကျဉ်းမြောင်းနေရင်တော့ ခွင့်လွှတ်ပါဆရာအောင်သင်းခင်ဗျား…။
ကိုးကားချက်များ။ ။ ၁။ ဓမ္မပဒဋ္ဌကထာ(ဒုတိယပဂေါ)
၂။ သီရိမင်္ဂလာပရိတ်တော် (သီရိမဂ္ဂင်္လ ပရိတ္တပါဠိ)
၃။ သင့်ဘ၀ မဂ္ဂဇင်းအမှတ်-(၃)၁၉၉၅ ခု မတ်လထုတ်
ဤစာမူကို(၁၉၉၅)ခု တွင်ရေးသားပါသည်။ သင့်ဘ၀မဂ္ဂဇင်းနှင့် အခြားဘာသာရေးမဂ္ဂဇင်းများသို့လည်းပို့ပါ၏။ ဘယ်မဂ္ဂဇင်းတိုက်ကမှ မရွေးသောစာမူဖြစ်ပါသည်။ စာရေးသူ၏ စာမူများ အမှားဖြစ်နေပါသလား?။ ဘလော့မိတ်ဆွေများ အားမနာတန်း ဝေဖန်ပေးကြပါခင်ဗျား….။
ရွှေလမ်းငွေလမ်းဝင်းကြည်
၁၉၉၅ ခု၊ ဒီဇင်ဘာလတွင် ရေးသားသော ဤစာမူကို ပြန်လည်တင်ပြထားပါသည်။
0 comments:
Post a Comment