မြို့ ကြီး ရွာမှ ထူးခြားအံ့ဖွယ်များ
ဇူလိုင်၂၃။ စာရေးသူ ဇူလိုင်လထဲမှာ ရှမ်းပြည်တောင်ပိုင်း၊ ရွာငံမြို့နယ်၊ မြို့ကြီးရွာကို ရောက်ခဲ့ပါတယ်။ အဲဒီရွာမှာ ထူးခြားတာ သုံးခုရှိကြောင်းကြားသိခဲ့ရတယ်။ သက်တော်(၈၄)နှစ်ရှိတဲ့ မြို့ကြီးတောရကျောင်းဆရာတော် ဦးသောဘိတ ကို ဖူးမျှော်ခဲ့ရပါတယ်။ နယ်သူနယ်သားအပေါင်းက ဤဆရာတော်ဘုရားကြီးကို ရဟန္တာဟု သမုတ် ကြကြောင်းကြားသိခဲ့ရပါတယ်။ မြို့ကြီးရွာရှိ့ တောင်ပေါ်၊တောင်အောက်ဘုန်းတော်ကြီးကျောင်းတွေကို ဤဆရာတော်ဘုရားကြီးမှ အမြန်ကြွကြောင်း(ဈာန်ကြွကြောင်း) ပြောဆိုနေကြတယ်။ ဆရာတော်ဘုရားကြီးကို စာရေးသူကိုယ်တိုင်ဝင်ရောက်ပြီး ဖူးမျှော်ခဲ့ပါတယ်။ ဆရာတော်ဘုရားကြီးမှ တရားဆိုတာ ကိုယ်လုပ်မှ ကိုယ်ရမည်..။ နံပါတ်(၁) အပယ်လေးဘုံသို့ မကျအောင်ပထမလုပ်ပါ။ နံပါတ်(၂) ယခုရတဲ့ လူ့ဘ၀ကို ယခုလက်ရှိဘ၀ထက်မြင့်အောင်၊ ယင်းစားဘ၀ မဆုံးအောင်လုပ်ပါ။ နံပါတ်(၃) နိဗ္ဗာန်သို့ရောက်နိုင်အောင် သီလ၊သမာဓိ၊ပညာများ၊၀ိပသနာတရားနဲ့ အဆင့်ဆင့်ကြိုးစားအားထုတ်ကြပါ ဟု မိန့်တော်မူပြီး ဆရာတော်ဘုရားကြီးရေးသားဟောကြားတော်မူခဲ့တဲ့ (နိဗ္ဗာန်ဝင်လမ်း မြတ်ကမ္မဋ္ဌာန်းတရားစာအုပ်) စာအုပ်ကို ဓမ္မဒါနအဖြစ်ပေးလိုက်ပါတယ်။
ဆရာတော်ဘုရားကြီးရဲ့ ကျောင်းဘေးကနေ တောင်ပေါ်ကိုတက်သော ကျောက်လှေခါးများအတိုင်း တောင်ထိပ်သို့ စာရေးသူနဲ့ ရွာက လိုက်ပို့သူတစ်ဦးတို့ တက်ခဲ့ပါတယ်။ တောင်ပေါ်အတက်တစ်နေရာတွင် သဘာဝအတိုင်းဖြစ်နေသော ဘီးလူးခေါင်းကျောက်တုံးကြီးကို ဆေးများချယ်သထားပြီး သေလာယက္ခစေတီကို တွေ့ရပါတယ်။ အဲဒီနေရာတစ်ဝိုက်ကိုရောက်တော့ ဘီးလူးခေါင်းကြီးကို ကိုင်ကြည့်တဲ့အခါ ကြက်သီးမွေးညင်းများ ထလာပါတယ်။ ဒီစေတီကနေ မတ်စောက်တဲ့ လှေခါးကိုတက်လိုက်တော့ တောင်ထိပ် အငူတစ်ခုပေါ်ကို ရောက်ပါတယ်။ အဲဒီတောင်ထိပ်မှာ စေတီသုံးဆူနဲ့ ဇရပ်တစ်ဆောင်၊ တရားထိုင်တဲ့ ကျောင်းတစ်ခုကိုတွေ့ရပါတယ်။ မြောက်ဖျားဆုံးစေတီရဲ့ အောက်ခြေမှာ ကျောက်သားတုံးကြီးတစ်ခုရှိပါတယ်။ မြေသားများလုံးဝမတွေ့ရဘဲ ကျောက်တုံးပေါ်မှာ ပန်းပင်တစ်ပင်ပေါက်နေပါတယ်။ ဒီပန်းပင်ရဲ့ဘေးမှာ အပေါက်သုံးပေါက်ကိုတွေ့ရတယ်။ အဲဒီကျောက်တုံးကြီးပေါ်က အပေါက်သုံးပေါက်က တစ်ပေါက်ကို ပါးစပ်နဲ့ ကုန်းမှုတ်လိုက်တဲ့အခါ ကျန်အပေါက်နှစ်ပေါက်ကနေပြီး ရေတွေပန်းထွက်လာတာကို တွေ့မြင်ခဲ့ရပါတယ်။ သည်ကျောက်တုံးကြီးကို စာရေးသူတို့နှစ်ဦး ခဏ ခဏ လေမှုတ်ပြီးစမ်းကြည့်ကြပါတယ်။ ရေကတော့လေမှုတ်တိုင်းပဲ ထွက်ထွက်နေပါတယ်။ နွေရာသီ မိုးလုံးဝမရွာတဲ့အခါမှာလဲ ရေအမြဲထွက်နေကြောင်း လိုက်ပို့သူ ဦးခင်မောင်နိုင်ရဲ့သားက ပြောပြပါတယ်။ကျောက်တုံးအောက်က စီးကျနေတဲ့ကျောက်ခွက်ကို မျက်စဉ်းခွက်လို့သိရပါတယ်။ အဲဒီမျက်စဉ်းကျောက်ခွက်ကရေကိုသုံးရင် မျက်စိရောဂါများ ပျောက်ကင်းကြောင်း ဆရာတော်ကြီးက ပြောပါတယ်။
တောင်ပေါ်ကအဆင်းမှာ မြို့ကြီးရွာထဲက နတ်ရေကန်ကိုဝင်ခဲ့ပါတယ်။ ဒီနတ်ရေကန်ဟာ ရှေးနှစ်ပေါင်းများစွာက တည်ရှိခဲ့ကြောင်း၊ ကန်ရဲ့အောက်က ထွက်တဲ့နေရာမှာ အမျိုးသား၊ အမျိုးသမီးများရေချိုးရန် ၀ါးလုံးများနဲ့တန်းပြီးခွဲခြားထားတဲ့တဆင့်နိမ့်တဲ့ရေကန်တစ်ကန်ရှိပါတယ်။ရေချိုးနေကြတာကို မြင်တွေ့ရပါတယ်။ အထက်ကန်ကိုတော့ မည်သူမှ ရေမချိုးအ၀တ်မလျှော်ရပါ။ ခြင်ထောင်တစ်ထည်ကို အဲဒီ အထက်ကန်ထဲကို ဆင်းပြီးလျှော်လိုက်တာနဲ့ အဲဒီနတ်ရေကန်ထဲမှ စိမ့်ထွက်နေတဲ့ ရေတွေဟာ ချက်ချင်းခန်းချောက်သွားကြောင်း လိုက်ပို့သူ ကိုခင်မောင်နိုင်(ဆည်မြောင်းဝန်ထမ်း)က ပြောကြားပါတယ်။ အဲဒီလို ရေတွေခန်းချောက်သွားရင် နတ်ရေကန်ထိပ်မှာ ကန်တော့ပွဲပေးပြီး တင်မြှောက်တောင်းပန်လိုက်ရင် ရေများက ချက်ချင်းပြန်ထွက်လာ ကြောင်း၊ သူကိုယ်တိုင် စမ်းသပ်ကြည့်ဘူးခဲ့ကြောင်း ပြောကြားလို့ သတင်းရယူခဲ့ပါတယ်။
ရွှေလမ်းငွေလမ်းဝင်းကြည်
၂၄-၇-၂၀၁၀
ခေတ္တ မန္တလေး။
0 comments:
Post a Comment