ဧရာဝတီတံတား(မကွေး) ဖြတ်သန်းခများ
မသိနာမလည်သူ အများပြည်သူများမှာ နှစ်ဆပေးနေရပြီ…
ရွှေလမ်းငွေလမ်းဝင်းကြည်
စာရေးသူ (၅-၅-၂၀၁၀)နေ့က မကွေးမြို့မှ အထက်မင်းလှသို့ ဆိုင်ကယ်နဲ့ ခရီးထွက်ခဲ့ပါတယ်။ ဧရာဝတီတံတား(မကွေး) ဖြတ်သန်းခ ငွေ(၂၀၀)ကျပ်တောင်းပါတယ်။ ယခင်က(၁၀၀)ကျပ် သာ ပေးရပါတယ်။ အပြန်ခရီး တံတားဖြတ်သန်းခကိုလည်း ငွေ(၂၀၀)ကျပ် ပဲ ပေးခဲ့ရပါတယ်။
မင်းဘူးမြို့မှ ၀န်ထမ်းတစ်ဦးနှင့် မကွေးမြို့က ဆေးကျောင်းသားတစ်ဦး တို့ကလည်း တံတား ကြေးများ နှစ်ဆပေးနေရကြောင်း လက်ဖက်ရည်ဆိုင်မှာ ပြောကြားနေတာကို ကြားသိရ ပြန်တယ်။ မင်းဘူးမြို့မှ မကွေးမြို့ ဈေးကြီးသို့ ဆိုင်ကယ်နဲ့ ဈေးရောင်း၊ ဈေးဝယ်လာ သူများ ကလည်း တံတားကြေးနှစ်ဆ ပေးနေရလို့ ကုန်စိမ်းဈေးများ တက်လာကြောင်း ပြောကြား သံများကို ကြားသိခဲ့ရပါတယ်။
ဂျာနယ်များတွင်လည်း လမ်း၊တံတားကြေးများကို ကန်ထရိုက်စနစ်ဖြင့် ကုမ္ပဏီများအား ပေးလိုက်ရာ ယခင်ကြေးများထက် စည်းကမ်းမဲ့စွာ ပို၍ကောက်ခံတောင်းယူနေကြကြောင်း သတင်းများကိုဖတ်ရပါတယ်။ ဧရာဝတီတံတား(မကွေး) ကိုလည်း ဆောက်လုပ်ရေး ၀န်ကြီးဌါနမှ ကောင်းမွန်ဆောက်လုပ် ရေး ကုမ္ပဏီက လေလံဆွဲလိုက်ကြောင်းသိရပါတယ်။
ဒီသတင်းကို အတည်ပြုချက်ရယူရန် ဧရာဝတီတံတား(မကွေး) သို့ (၉-၅-၂၀၁၀)နေ့က တစ်ခေါက် သွားရောက်ခဲ့ပါတယ်။ စက်ဘီး၊ မော်တော်ဆိုင်ကယ်၊ ကားလေး၊ ကားလတ်၊ ကားကြီး များကို တရားဝင်ကောက်ခံရန် သတ်မှတ်ထားသော ဈေးနှုန်းများစာရင်းအား မိတ္တူတစ်စောင် ပေးပါရန်တောင်းခဲ့ပါတယ်။လုံးဝ မပေးပါ။ တံတားတိုးဂိတ်တွင်လည်း သတ်မှတ်ဈေးနှုန်းများကို အများပြည်သူမြင်သာအောင် ရေးသားပြသ ထားခြင်းကိုလည်း ယခုသတင်းရေးနေချိန်(၁၃-၅-၂၀၁၀)ရက်အထိ မရှိပါ။ မကွေးစာနယ်ဇင်းမှ တာဝန်ရှိသူများ လာရောက် ကြောင်းကိုလည်း တံတားတိုးဂိတ် တာဝန်ခံအား ပြောပြပါတယ်။ သူတို့ကုမ္ပဏီ ပိုင်ရှင်ရဲ့ ခွင့်ပြု ချက် တောင်းခံပြီးမှ သာ ပေးမည်ဖြစ်ကြောင်း၊ ၁၃-၅-၂၀၁၀ နေ့တွင် တစ်ခေါက်လာယူ ပါဟု ချိန်းပါတယ်။ အဲဒီနေ့ သွားခဲ့သော အခါ… သူတို့ ကုမ္ပဏီ ရှယ်ယာ ပိုင်ရှင်တစ်ဦးထံ သွားရောက်မေးပါရန်၊လာရောက်သူ ကျွန်တော်တို့နှစ်ဦးကိုလည်း အမည်၊လိပ်စာရေးသား၍ လက်မှတ်ထိုးပေးခဲ့ရန် တာဝန်ခံမှ တောင်းဆိုနေပြန်ပါတယ်။ မကွေးစာနယ်ဇင်းက ဒုဥက္ကဋ္ဌ နှင့် အတွင်းရေးမှူးများဖြစ်ကြောင်းသာ ပြောဆို အသိပေးထားခဲ့ပါတယ်။တံတားဂိတ်တာဝန်ခံကဆက်လက်ပြီး သူတို့ ကောင်းမွန်ဆောက်လုပ် ရေး ကုမ္ပဏီမှ သတင်းစာရှင်းလင်းပွဲလုပ်၍ စာနယ်ဇင်းသမားများကို အကျွေး အမွေး၊ လက်ဆောင်များပေး၍ ကျင်းပပြုလုပ်သွားပါမည်…ဟု ဧရာဝတီတံတား (မကွေး) တိုးဂိတ်တာဝန်ခံမှ ဒုတိယအကြိမ် ပြောကြား၍ ငြင်းဆိုလိုက်ပြန်ပါတယ်..။
သတင်းသမားဆိုတာ မှန်ကန်သောအများပြည်သူတွေရဲ့ ဘက်ကသာ ရပ်တည်ပါတယ်။ ကုမ္ပဏီတွေအတွက် အသုံးချခံသူများ မဟုတ်ပါကြောင်း၊ စားချင်၊သောက်ချင်၊ လက်ဆောင် လိုချင်၍ လာရောက်သူများ မဟုတ်ပါကြောင်းကိုတော့ တိုးဂိတ် တာဝန်ခံအားသိအောင် ပြောကြား၍ ပြန်လာခဲ့ရသော ဤသတင်းကောင်းအား တင်ပြ လိုက်ရပါတယ်…။
ရွှေလမ်းငွေလမ်းဝင်းကြည်
၂၀၁၀ ခု၊မေလ(၁၆)ရက်၊ည(၇)နာရီတင်သည်။
မကွေးမြို့။ ၀၆၃-၂၅၁၉၇
0 comments:
Post a Comment