မကွေးခရိုင်၊ ချောက်မြို့နယ်၊ စလင်းတောင်ကျေးရွာအုပ်စုပိုင် မြေနုကျွန်းကွင်းအမှတ်(၂၄၇၉-ခ) ဧက(၈၆) အား စလင်းတောင်ကျေးရွာတောင်သူများသည် (၅-၁၂-၂၀၁၂) နေ့ နံနက်ပိုင်းတွင် တိုင်းတာခွဲဝေနေရာချထားနေစဉ် ၀င်္ကဘာကျေးရွာတောင်သူများမှ၊ လူစုလူဝေးဖြင့်လာရောက်တားဆီး အငြင်းပွားရန်များကြကြောင်း သတင်းရရှိပါသည်။
ဖြစ်စဉ်အကျဉ်းမှာ မြေပုံပါအတိုင်း မြေနုကျွန်းကွင်းအမှတ် (၂၄၈၄-က)အား ၀င်္ကဘာကျေးရွာပိုင်၊ (၂၄၇၉-က)အား သာစည်ကျေးရွာပိုင်၊ (၂၄၇၉-ခ)အား စလင်းတောင်ကျေးရွာပိုင် ဟု စလင်းတောင်ကျေးရွာအုပ်စုအတွင်းမှာ မြေနုကျွန်း(၃) ကျွန်း တို့ကို ရှေးယခင်အခါကအတိုင်း တည်နေရာပုံသဏ္ဍာန်မပျက်ခြင်း၊ နှစ်ချင်းပေါ်သော မြေနုကျွန်းများ မဟုတ်ခြင်း တို့ကြောင့် ဘိုးစဉ်ဘောင်ဆက် အစဉ်အလာမပျက် တိုင်းတွာ၍ ခွဲဝေလုပ်ကိုင်စားသောက်ခဲ့ကြသည်ဆို၏။ ၂၀၁၂ ခုနှစ် တွင် ၎င်းမြေနုကျွန်းများစိုက်ပျိုးရာသီတွင် ချောက်မြို့နယ်မြေယာကော်မတီမှ တားဆီးချက်ကြောင့် စလင်းတောင်ကျေးရွာကွင်း အမှတ်(၂၄၇၉-ခ)အား လုပ်ကိုင်စားသောက်ခြင်းမပြုခဲ့ရသည်မှာ ယနေ့ ဇန္န၀ါရီ(၉)ရက်ဆိုလျှင်(၂)လခန့်ကြာခဲ့ပါပြီ။ သီးနှံများစိုက်ပျိုးချိန် တော်တော်ကို နောက်ကျနေပြီဟု တောင်သူများမှပြောသည်။ ပြဿနာမှာ ၀င်္ကဘာရွာမှ တောင်သူများသည် ၎င်းတို့ပိုင်ဆိုင်လုပ်ကိုင်စိုက်ပျိုးထားသော မြေနုကျွန်းအမှတ် (၂၄၈၄-က) စိုက်ဧကများအပြင် စလင်းတောင်ကျေးရွာပိုင် သော ကွင်းအမှတ်(၂၄၇၉-ခ)၏ (၈၆)ဧကထဲမှ မြေဧက(၂၅)ဧကကို ချောက်မြို့နယ်မြေယာ ကော်မတီ အတွင်းရေးမှူး နှင့် ပူးပေါင်း၍ တောင်းဆိုခြင်းကြောင့် ပြဿနာဖြစ်ပြီး စိုက်ပျိုးချိန်(၂)လ ခန့်နောက်ကျ သွားသည်။ ယခုမှ စိုက်ပျိုးရင်လည်း စရိတ်ကုန်ပြီး ကုန်ကျငွေ အရင်းတောင်မရနိုင်ဘူး။ အလိုလိုမှ ဆင်းရဲနေကြတာ ပိုပြီး မွဲတေကြတော့မယ် ဟု စလင်းတောင်ကျေးရွာမှ တောင်သူများက ပြောသည်။
၎င်း ကိစ္စကို ၂၀၁၃ ဇန္န၀ါရီ (၄)ရက်နေ့တွင် ချောက်မြို့နယ် လယ်ယာမြေစီမံခန့်ခွဲမှူးအဖွဲ့ အတွင်းရေးမှူး မြို့နယ်မြေစာရင်းဌာနမှ ၂၀၁၂ ခုနှစ်ထုတ်ပြန်ထားသော လယ်ယာမြေဥပဒေ၊ နည်းဥပဒေ အခန်း(၁၂)၊ အပိုဒ်(၁၀၅) အပုဒ်ခွဲ(ခ) ၏ ဖော်ပြချက်အား လက်ကိုင်ထား၍ ဆုံးဖြတ်လိုက်သည်ဟု မြေစာရင်းဦးစီးအရာရှိ မှ ဆို၏။ ထို နည်းဥပဒေ၏ ဖွင့်ဆိုချက်မှာ( မြေနုကျွန်းမြေနှင့် အနီးကပ်ဆုံး ကျေးရွာများ၏ ရွာစည်းရိုးနှင့် မြေနုကျွန်းပေါ်ရှိ လုပ်ကိုင်နိုင်သောမြေ၏ အနားရေးတို့ နှင့် အတိုဆုံးအကွာအဝေးကို နှိုင်းယှဉ်စဉ်းစားရမည်။ ကျေးရွာအုပ်စု နယ်နိမိတ်နှင့် နှိုင်းယှဉ်ခြင်း မပြုရ) ဟု အဆိုကို တရားသေလက်ကိုင်ဆုံးဖြတ်လိုက်သည်ဟု သိရသည်။ ထိုနည်းဥပဒေ အပိုဒ်(၁၀၅ ပိုဒ်ခွဲခ)အရ ၀င်္ကဘာ ကျေးရွာသည် စိုက်ပျိုးသော မြေနုကျွန်းနှင့်(၆၆၄)ပေကွာဝေး၍ စလင်းတောင်ကျေးရွာသည် မြေနုကျွန်းနှင့်(၁၀၃၀)ပေကွာ ခြင်းကြောင့် ၀င်္ကဘာရွာသည် အနီးဆုံးဖြစ်၍ မြေနုကျွန်းအမှတ်(၂၄၇၉-ခ)၏ တောင်ဘက်ခြမ်းကို ၀င်္ကဘာရွာမှ(၂၅)ဧက ရမည်။၊ စလင်းတောင်ရွာသည် ၎င်းမြေနုကျွန်း၏မြေက်ဘက်ခြမ်းမှ(၆၁)ဧကရမည်ဟု ဆုံးဖြတ်ပေးသည်ဟု သိရသည်။ သို့သော် လယ်ယာမြေနည်းဥပဒေ အပုဒ်(၁၁၀)တွင် ပါရှိသည့် ( မြေနုကျွန်းနယ်နိမိတ်ကို အငြင်းပွားမှုမရှိဘဲ ခွဲဝေချထားနိုင်ရန် အုပ်ချုပ်ရေးနယ်နိမိတ်ကို ခေတ်မီမြေတိုင်း ကိရိယာများဖြင့် စနစ်တကျ တိုင်းတာမှတ်တမ်းတင်၍ မြို့နယ် ရပ်ကွက် (သို့မဟုတ်)ကျေးရွာအုပ်စုအလိုက် သတ်မှတ်ထားသည့် အုပ်ချုပ်ရေးနယ်နိမိတ်များတွင် မှတ်တိုင်များ သတ်မှတ်စိုက်ထူးထား ရမည်။ ယင်းသို့ အခက်အခဲရှိမှသာ ယခင်က သတ်မှတ်ခဲ့သော မြေပြင်ရှိ အမာခံအမှတ်အသားများအရ တိုင်းတာရေးဆွဲ ဖော်ပြထားသည့် အမျှော်မျဉ်းကြောင်း နယ်နိမိတ်အမှတ်အသားများဖြင့် ခွဲခြားသတ်မှတ်ရမည်) ဟုလည်း ဆိုထားပြန်သည်။ ထိုမြေယာ နည်းဥပဒေ အပုဒ်(၁၁၀)ဖြင့် စဉ်းစားဆုံးဖြတ်ပေးရန် ချောက်မြို့နယ်မြေယာစီမံခန့်ခွဲမှုအဖွဲ့ဝင် စီမံကိန်း ရေးဆွဲရေးဦးစီးဌာန၊ ဦးစီးအရာရှိမှတင်ပြသေး၏ဟုဆိုသည်။ ၎င်းတင်ပြချက်အားလည်း ချောက်မြို့နယ် မြေယာစီမံခန့်ခွဲမှု အတွင်းရေးမှူး မြေစာရင်းဦးစီးအရာရှိ မှ မစဉ်းစားတော့ဘဲ အထက်က နည်းဥပဒေ အခန်း(၁၂)၊ အပိုဒ်(၁၀၅) အပုဒ်ခွဲ(ခ) အတိုင်း တရားသေဆုံးဖြတ်စီမံလိုက်သည်၊ ထိုကိစ္စအား မကြေနပ်၍ စလင်းတောင်ကျေးရွာ အုပ်ချုပ်ရေးမှူး နှင့် တောင်သူများသည် ဇန္န၀ါရီ(၉)ရက်နေ့တွင် မကွေးတိုင်းဒေသကြီး မြေစာရင်းဌာန နှင့် ခရိုင်မြေစာရင်းဌာန တို့ထံ ထပ်မံတွေ့ဆုံမေးမြန်း၍ စောတကတက်ကြသည်။ ပြည်သူ့လွှတ်တော် တိုင်ကြားစာနှင့် အသနားခံကော်မတီသို့လည်း တိုင်ကြားစာပေးပို့ထားသည် ဟုသိရသည်။
``ဘိုးစဉ်ဘောင်ဆက် နှစ်ပေါင်း(၃၀)ခန့် မြေခွန်ထမ်းဆောင်ပြီးလုပ်စားလာခဲ့ရတဲ့ မြေနုကျွှန်းကို အနိုင်ကျင့်ခံလိုက်ပါပြီ။ ယခင်ရှေးတုန်းကလဲ ကုန်းပေါ်အမာခံ အမှတ်အသား အမျှော်မျဉ်းကြောင်း နယ်နိမိတ်အမှတ်အသားနဲ့ ခွဲခြားခဲ့ကြတာကို ယခု ၂၀၁၂ ခုထုတ်ပြန်ထားတဲ့ မြေယာဥပဒေ၊ နည်းဥပဒေ အခန်း(၁၂)၊ အပိုဒ်(၁၀၅)၊ အပိုဒ်ခွဲ(ခ)အတိုင်းသာ (အနီးဆုံး)ရွာများကို ဦးတည်ဆုံးဖြတ်ပေးကြရင်တော့ ကျွန်တော်တို့လို နေရာတိုင်းမှာ မြေယာတွေ ဆုံးရှုံးမှုတွေဖြစ်ကြမယ်။ သီးနှံစိုက်ပျိုးချိန်တွေ နောက်ကျလို့ ဆင်းရဲမွဲတေမှုများနဲ့ မြေယာအငြင်းပွားပြီး ဘက်လိုက်ဆုံးဖြတ်မှုများ မြောက်များစွာ ဖြစ်ကြပါတော့မယ် ခင်ဗျာ..။´´ဟု စလင်းတောင်ကျေးရွာ တောင်သူတစ်ဦးမှ မြန်မာပို့စ် ကိုပြောသည်။
ဝိုင်းကြည်အောင်
0 comments:
Post a Comment