``ဆရာညိုထွန်းလူ နှင့် စာပေဟောပြောပွဲ ခရီးစဉ်များ အတွေ့အကြုံ အင်တာဗျူး´´
စာရေးသူ (၂၅-၁၁-၂၀၁၁)နေ့တွင် မင်းဘူး(စကု)မြို့နယ်မှာ ကျင်းပသော စာပေဟောပြောသို့ရောက်ခဲ့ပါသည်။ စာပေဟောပြောပွဲမစမှီ စာရေးဆရာ နေ၀င်းမြင့်၊ ဆရာညိုထွန်းလူ ၊ ဆရာမ ခင်ခင်ထူးတို့နဲ့ ခေတ္တ ခဏ တွေ့ဆုံခဲ့ပါသည်။ အချိန်တိုအတွင်းမှာ ဆရာညိုထွန်းလူ အား စာပေဟောပြောပွဲများ သွားလာရာတွင် တွေ့ကြုံရသော ပျော်ရွှင်မှုများ၊ ဆင်းရဲ ပင်ပမ်းမှုများနှင့် ယခင်ခေတ်၊ ယခုခေတ်မှ စာပေဟောပြောပွဲများအပေါ် ဆရာရဲ့ အမြင်များ ကို စာဖတ်ပရိတ်သတ်များ အတွက် တွေ့ဆုံမေးမြန်းခဲ့ပါသည်။
မေး။ ။ ဆရာညိုထွန်းလူ ခင်ဗျာ..၊ ယခုလို ဆရာတို့ စာပေဟောပြောပွဲတွေ သွားလာနေရတဲ့ခရီးစဉ်များမှာ ၀မ်းသာပီတိ ဖြစ်ရတာလေးတွေ၊ ဆင်းရဲဒုက္ခဖြစ်လို့ ၀မ်းနည်းမှုဖြစ်ရတာလေးတွေ စတဲ့ ဆရာတို့ စာပေဟောပြောပွဲခရီးစဉ်များရဲ့ အတွေ့အကြုံ အမြင်လေးတွေ ကို သိပါရစေဆရာ။
ဆရာညိုထွန်းလူ။ ။ ပိုင်လိုက်တာ.. မေးတဲ့သူက မေးတော့ ဖြေရမှာပေါ့။ (ထိုသို့ မေးနေစဉ် ဆရာနေ၀င်းမြင့်မှ ကြားဝင်၍ ထောက်လာပါသည်။ စာရေးဆရာများကတော့ ကန်တော့တဲ့ငွေများရင် ၀မ်းသာပီတိဖြစ်ပြီး နည်းရင်တော့ ၀မ်းနည်းတာပေါ့ဆရာရယ်..။ ဟု လှမ်း၍ နောက်နေပြန်၏။) ကျွန်တော်က ဒီနှစ်မှ စပြီး စာပေဟောပြောပွဲတွေကို ပြန်ဟောဖြစ်တာပါ။ ကျွန်တော် စာပေဟောပြောပွဲ မလိုက်တာ တော်တော်ကြာပါပြီ..။ ဒီနှစ်မှ ဘာထူးခြားလာလဲ ဆိုတော့ အရင့် အရင်နှစ်တွေကထက် ဟောပြောပွဲတွေပိုများလာပါတယ်။ မြို့တွေအပြင် အလွန်ဝေးလံတဲ့ဒေသ ရွာတွေအထိ စာပေဟောပြောပွဲတွေ ဖြစ်လာတာကို တွေ့ရပါတယ်။ ကျွန်တော်တို့ဘာသွားတွေ့လဲဆိုတော့ ၀မ်းသာစရာကောင်းတာက အချို့နယ်တွေမှာ စာဖတ်ပရိသတ် သိပ်တောင့်တာကိုတွေ့မြင်ရပါတယ်။ အထူးသဖြင့် စာပေဟောပြောပွဲမှာ စနေ၊တနင်္ဂနွေ နေ့တွေ ဟောရရင် ကျွန်တော်တို့ ပရီမီယားအသင်းနဲ့ယှဉ်ပြိုင်ရတာပဲ။ ဒါပေမယ့် ဘောလုံးက ဘောလုံးပါ။ စာပေပရိသတ်ကလဲ စာပေပရိသတ်ပါပဲ၊ စာပေက အားတောင့်ပါတယ်။ တစ်ချို့နေရာတွေကျပြန်တော့ စာပေဟောပြောပွဲက ပထမ အကြိမ်ကျင်းပပြီး စလုပ်တာဆိုတော့၊ စာပေဟောပြောပွဲဆိုတာ ဘာများပါလိမ့်ဆိုပြီး ပရိသတ်က လာနားထောင် ပေးကြတာပါ။ အဲဒါမျိုးကျတော့လဲ ကျွန်တော်တို့ တော်တော်ကုသိုလ်ရတယ်၊ ပရိသတ်ကိုလဲ ၀မ်းသာပီတိဖြစ်ရပါတယ်။ ကျင်းပရေးကော်မတီတွေလဲ တော်တော် သဘောကျသွားကြပါတယ်။ နောက်နှစ်တွေမှာလဲ ဒီလိုစာပေဟောပြောဖြစ်ဖို့ ကြိုတင်တောင်းဆိုသွားကြပါတယ်။ ဘယ်လောက်ပဲ စာပေဟောပြောပွဲကော်မတီ က ဦးဆောင်ကျင်းပချင်မေမယ့် စာပေပရိသတ်ဖြစ်တဲ့ စာပေချစ်မြတ်နိုးတဲ့သူတွေရှိမှ ကျင်းပနိုင်ကြတာပါ။ အချို့နေရာတွေကျ တော့ လဲ စာပေဟောပြောပွဲ ကျင်းပလာတာ အကြိမ်ရေများတော့ အထူးပြောစရာမလိုပဲ စာပေကို စိတ်ဝင်စားသူ၊ ချစ်မြတ်နိုးသူတွေ များပြားပြီး ပရိသတ်က အသားကျနေကြတာကိုတွေ့ရပါတယ်။စာပေဟောပြောပွဲ ဖြစ်မြောက်ရေးအတွက် ဒီနှစ်မှာ ထူးထူးခြားခြား တွေ့မြင်ရတာကတော့ အားလုံး တက်တက်ကြွကြွ နဲ့ ၀ိုင်းဝန်းဆောင်ရွက်နေကြတာကို နေရာတိုင်းမှာ တွေ့မြင်နေရပါတယ်။ နားထောင်တဲ့ ပရိသတ်တွေလဲ ကောင်းကြပါတယ်။ သူ့ပရိသတ်နဲ့ သူပေါ့ (အန်တာနိမ်းမန့်-ဖျော်ဖြေရေးတွေ)ကို ကြည့်တဲ့ ပရိသတ်ရှိသလို၊ (ဒီလို ဟောပြောပွဲတွေ)ကိုသာ နားထောင်ချင်တဲ့ ပရိသတ်လဲ ရှိနေကြပါတယ်။
ဒီလို စာပေဟောပြောပွဲတွေကို အနယ်နယ်အရပ်ရပ်မှာ ဘာကြောင့်စိတ်ဝင်စားလာကြတာလဲဆိုရင်တာ့ သတင်း ဆက်သွယ်ရေး မြန်ဆန်မှုတွေကြောင့်ပါ။ သတင်းဂျာနယ်တွေမှာ ဘယ်မြို့၊ ဘယ်ရွာတွေမှာ စာပေဟောပြောပွဲကျင်းပ နေတယ် ဆိုတာတွေကို ဂျာနယ်တိုင်းမှာဖော်ပြပေးနေတော့ အမြဲလိုလို ဖတ်ကြားသိရှိကြရပါတယ်။ ဒါကြောင့် ငါတို့မြို့၊ ငါတို့ရွာမှာလည်း သူတို့လို စာပေဟောပြောပွဲကျင်းပချင် ပါတယ် ဆိုပြီး ဖြစ်လာကြတာပါ။ သတင်းမီဒီယာတွေက တင်ပြလိုက်တော့ စာပေဟောပြောပွဲ လုပ်ဖို့ အာရုံလေးတွေနိုးကြား လာကြပါတယ်..။အချို့နေရာတွေမှာဆိုရင် အလှူ၊ ကထိန်ပွဲတွေမှာကို စာပေဟောပြောပွဲထည့်နေကြပါပြီ..။ စာပေ ဟောပြောပွဲအတွက်ကို ပွဲမိန့်တောင် အထူးတင်ပြစရာ မလိုကြပါဘူး။ ဒါပေမယ့်လဲ အချို့နယ်တွေမှာ မလိုမေမယ့် အချို့နယ်တွေကျပြန်တော့လဲ သက်ဆိုင်ရာ မြို့နယ်စာနယ်ဇင်း အဖွဲ့ထောက်ခံချက် နဲ့ အဆင့်ဆင့်တင်ပြတောင်းခံကြရတယ် လို့ သိရပါတယ်။ ယခင်ခေတ်ထက် ယခုခေတ် အနယ်နယ် အရပ်ရပ် မှာ စာပေဟောပြောပွဲတွေများလာတာက ကောင်းတဲ့လက္ခာတွေပါ။ ဘာပဲပြောပြော ယခုခေတ်မှာ နိုင်ငံတော်အစိုးရက တော်တော်များများကို စာပေလွတ်လပ်ခွင့်တွေကို ပေးနေပါပြီ..။ ဟု ဆရာညိုထွန်းလူ မှ ပြောကြား၍ သတင်းရယူခဲ့ပါသည်။
ရွှေလမ်းငွေလမ်းဝင်းကြည်
0 comments:
Post a Comment