ဆရာနေ၀င်းမြင့် နှင့် ယနေ့ခေတ် စာပေဟောပြောပွဲများ၏ အတွေ့အကြုံအင်တာဗျူး
မကွေး။ နိုဝင်ဘာ(၂၆)။
မင်းဘူးမြို့ တွင် စာပေဟောပြောပွဲလာကြသော စာရေးဆရာ ဆရာနေ၀င်းမြင့် ထံသွားရောက်ခဲ့ပါသည်။ မင်းဘူးမြို့ ကောင်းသာ ဧည့်ရိပ်သာ မှာ ခေတ္တနားနေချိန်တွင် စာဖတ်သူများ သိစေလိုသော စာပေဟောပြောပွဲများ၏ အတွေ့အကြုံများကို မေးမြန်းခဲ့ပါသည်။
မေး။ ။ ဆရာနေ၀င်းမြင့် ခင်ဗျာ ယခုလို စာပေဟောပြောပွဲ ရာသီကာလမှာ ဆရာတို့ သွားရောက် ဟောပြောခဲ့ရတဲ့ စာပေဟောပြောပွဲများရဲ့ အတွေ့အကြုံလေးများကို သိပါရစေ..။
ဆရာနေ၀င်းမြင့်။ ။ ယခုကတော့ဆရာရယ် စာပေဟောပြောပွဲ ရာသီရယ်လို့ မဟုတ်ကြတော့ပါဘူး။ တစ်နှစ်ပတ်လည်လုံးလောက် ကျွန်တော်တို့ လိုက်ပြီးဟောပြောနေကြရပါတယ်။ ရဟန်းခံ၊ ရှင်ပြု၊ ကထိန်အလှူပွဲ၊ကလေး ကင်မွန်းတပ် မွေးနေ့ပွဲတွေ၊ စာဖတ်ရှိန်မြှင့်တင်ရေး၊ စာကြည့်တိုက်ဖွင့်ပွဲ၊ နှစ်ပတ်လည်နေ့ အထိမ်းအမှတ်ပွဲ စတဲ့ စာပေဟောပြောပွဲတွေ ပါနေကြပါတယ်။ ဒီနှစ်ကတော့ တော်တော်များလာပါတယ်။ ကျွန်တော်တို့လည်း စာရေးဆရာ ပေါင်းစုံနဲ့ တွဲပြီး သွားလာဟောပြောခဲ့ရပါတယ်။ ပရိတ်သတ်ကလည်း များများလာကြပြီး တော်တော်လေးကို စိတ်ဝင်စားလာတာတွေ့မြင်ရပါတယ်။ မြို့ကြီးတွေမှ မဟုတ်ပါဘူး၊ ကျေးလက်ဒေသ နယ်လေးတွေက အထိ စာပေဟောပြောပွဲတွေကို စိဝင်စားပြီး ကျင်းပလာကြတာကို တွေ့မြင်လာရပါတယ်။ မနေ့ကဆိုရင် ဘုတလင်မြို့နယ် ညောင်ကန်အုပ်စု၊ ရွာသာရွာမှာ ကျွန်တော်တို့ဇနီးမောင်နှံသွားရောက်ဟောခဲ့ပါတယ်။ တစ်ရွာလုံး တစ်နယ်လုံက လူတွေ ကြိတ်ကြိတ်ခဲလို့ စည်ကားပါတယ်။ ယခုအခါမှာ စာတစ်အုပ်ကို ကောက်ခါငင်ခါဖတ်နေရယုံနဲ့ မကြေနပ်နိုင်တော့ပဲ စာရေးဆရာကိုယ်တိုင်လာရောက် ဟောပြောတာကို စိတ်ဝင်တစ်စားလာရောက်နားထောင်ကြပါတယ်။ ရွာမှာ ရှိနေတဲ့ စာကြည့်တိုက်တွေကိုလည်း အသုံးပြုပြီး စာဖတ်သူတွေများလာပါတယ်။ သူတို့ဖတ်ထားတဲ့ စာအုပ်ထဲမှာ နာမလည်တာ၊ မကြေနပ်တာတွေကို ကျွန်တော်တို့စာရေးသူတွေ ကိုယ်တိုင်လာရောက်တဲ့အချိန်မှာ စာဖတ်သူတွေက သိလိုတာကို ပွင့်ပွင့်လင်းလင်း မေးမြန်းလာတတ်ကြပါတယ်။ စာပေစကားရဲ့ တန်ဘိုးကို နာလည်အသိအမှတ်ပြုလာကြကို မြင်တွေ့ရပါတယ်။
မေး။ ။ ဆရာနေ၀င်းမြင့် ခင်ဗျာ… ကျွန်တော်တို့ မကွေးမြို့ နဲ့ ယခင်က မကွေးတိုင်း၊ ယခု မကွေးတိုင်းဒေသကြီးထဲက ဘယ်မြို့တွေကို စာပေဟောပြောပွဲရောက်ဖူး ဟောဖူးခဲ့ပါသလဲဆရာ..။
ဆရာနေ၀င်းမြင့်။ ။ ဟိုတုန်းက တောင်တွင်းကြီးမှာလဲ ဟောခဲ့ပါတယ်။ ရေစကြိုမြို့လဲ ဟောခဲ့ပြီးပါပြီ။ မကွေးတိုင်းထဲမှာ အများကြီးလောက် ရောက်ခဲ့ပါတယ်။ ယခင်က မင်းဘူးမြို့ကိုလည်း ဟိုတုန်းက ဆရာမြသန်းတင့် တို့နဲ့ဟောပြောခဲ့ပါတယ်။ ဒါရောဆိုရင် မင်းဘူးမှာ (၂)ခါဟောရတာပေါ့။ မကွေးမြို့ကိုတော့ လုံးဝ မဟောဖူးသေးပါဘူး။
မေး။ ။ မကွေးမြို့မှာ စာပေဟောပြောပွဲ ဟောဖို့အတွက် ၂၀၀၇/ ၂၀၀၈ နှစ်တွေက စီစဉ်ခဲ့တယ်လို့သိရပါတယ်။ ဆရာကံချွန် မသေခင်က တစ်နှစ် နဲ့ (၂)နှစ်တိတိ ဆက်တိုက်စီစဉ်ထားခဲ့တာ အကြောင်းမညီညွှတ်လို့ ပျက်ကွက်ခဲ့ရတယ်လို့သိရပါတယ်။ ယခုနှစ် ၂၀၁၁၊ ဒီဇင်ဘာလ(၂၉)ရက်နေ့မှာတော့ မကွေးမြို့မှာ စာပေဟောပြောပွဲ ဟောရန်ဖိတ်ကြားထားတယ်လို့ ကြားသိရပါ တယ်။ ဒါကြောင့် အဲဒီပျက်ခဲ့တဲ့အချိန်နဲ့ ယခု ပြန်လည်ရတဲ့ ဒီနှစ်မှာ ဆရာနေ၀င်းမြင့် ဘယ်လိုခံစားရပါ သလဲဆိုတာကို သိပါရစေ..။
ဆရာနေ၀င်းမြင့်။ ။ စာပေဟောပြောပွဲကျင်းပပြုလုပ်တဲ့ အဖွဲ့တွေဟာ အင်မတန်မှ တာဝန်ကြီးကြပါတယ်။ တာဝန်ကြီးတယ် ဆိုတာ အချိန် နဲ့ ငွေရေးကြေးရေး၊ စုစုစည်းစည်းဝိုင်းဝန်းဆောင်ရွက်ကြရပါတယ်။ နောက်တစ်ခုက စာပေ စိတ် ဇော ဆန္ဒတွေက သိပ်ကြီးကြရပါတယ်။ ကိုယ့်နယ် ကိုယ့်အရပ်ဒေသတွေမှာအကျုိးရှိမယ့်၊ ဗဟု၊သုတ၊ ပညာတွေ၊ အသိတွေ တိုးစေမယ့် စာစကား၊ ပေစကားတွေကိုကြားစေချင်ကြသူတွေ ဖြစ်ကြပါတယ်။ အဲဒီလို အများကြီး ရင်းနှီးမြုပ်နှံထားပြီး ဒီနှစ်တော့ ဒို့နယ်စာပေဟောပြောပွဲမှာ ဘယ်ဆရာ၊ ဆရာမတွေကို ဖိတ်ကြားမယ်၊ စာပေ၀ါသနရှင်များ လည်း ကြိုက်နှစ်သက်အောင် လူကြီးများလည်း လက်ခံမယ့်စာရေးဆရာတွေလည်း ဖြစ်အောင် အဖက်ဖက်က ထောင့်စေ့အောင် ၀ိုင်းဝန်းညှိနှိုင်း ဆောင်ရွက်ကြရပါတယ်။ ဒီကြားထဲမှာ တစ်ခုခုအကြောင်းကြောင်းကြောင့် ပျက်သွားတယ် ဆိုရင် ဆရာတို့လို စီစဉ်တဲ့သူတွေ အများကြီး ဒုက္ခရောက်ကြရတာပေါ့လေ။ ဟောပြောကြမယ့် စာရေးဆရာတွေအနေနဲ့က တော့ ပွဲပျက်ရင် မလာရုံဘဲပေါ့။ ပွဲစီစဉ်သူတွေမှာတော့ အလှူငွေထည့်ဝင်ထားတဲ့ မြို့လူထုနဲ့ တစ်မျိုး၊ စာပေ၀ါသနာရှင် လူငယ်တွေနဲ့တစ်မျိုး အမျိုးမျိုးရှင်းလို့ကို မပြီးနိုင်ကြတော့ဘူးပေါ့။ ဒါကြောင့် ကျွန်တော့် အနေနဲ့ကတော့ စာပေဟောပြောပွဲဆိုတာ ကြောက်စရာ မဟုတ်ပါဘူးလို့ ပြောချင်ပါတယ်။ စေတနာနဲ့ပဲ နာလည်ပေးပြီး ခွင့်ပြုပေးလိုက်ရင် ရှင်းပါတယ်။ ဘယ်သူမှ အရုပ်ဆိုး အကြီးတန်သွားအောင် မလုပ်ကြပါဘူး။ ဘာပြုလဲဆိုတော့ စာပေဟောပြောပွဲကို ဦးဆောင်ကျင်းပသူတွေက ဒီမြို့မှာ နေကြရအုံးမှာပါ။ မြို့ခံမှ ကျင်းပတဲ့သူတွေက (ဖိတ်ကြားထားတဲ့ စာရေးဆရာတွေအတွက်)ကို အာမခံပေးထားကြတာပါ။ စာရေးဆရာဆိုတာကတော့ ဧည့်သည်တွေပါ။ ဧည့်သည်စာရေးဆရာ တွေကလဲ စောစောက ပြောခဲ့သလို ဘယ်သူ့ကိုမှ အရုပ်ဆိုးသွားအောင်၊ အကြီးတန်သွားအောင် မလုပ်ကြ မပြောကြပါဘူး။ ဒါကြာင့် ကျွန်တော့်အနေနဲ့တော့ စာပေဟောပြောပွဲတွေကို မပြက်ကွက်စေချင်ပါဘူး။ ရှေ့ရှောက်လဲ စာပေဟောပြောပွဲတွေ မပျက်တော့ပါဘူးလို့ ကျွန်တော် ယုံကြည်ပါတယ်။ ဟု ဆရာနေ၀င်းမြင့်မှ ပြောဆိုသွားပါသည်။
ဆရာနေ၀င်းမြင့်၏ ပြောကြာချက်အရ ၂၀၁၁၊ ဒီဇင်ဘာလ(၂၉)ရက်နေ့တွင် မကွေးတိုင်းဒေသကြီး မကွေးမြို့ မြို့တော်ခန်းမမှာ ဆရာနေ၀င်းမြင့်၊ ဒေါက်တာထွန်းလွင်(မိုးလေ၀သ)၊ ဆရာညိုထွန်းလူ၊ ဆရာမ ခင်ခင်ထူး တို့ ဖြင့် စာဆိုတော်နေ့အထိမ်းအမှတ် စာပေဟောပြောပွဲ စီစဉ်ထားကြောင်း သတင်းရရှိခဲ့ပါသည်။
ရွှေလမ်းငွေလမ်းဝင်းကြည်
0 comments:
Post a Comment