ကိုယ့်အကြောင်း သူများအကြောင်း နှင့် ပတ်ဝန်းကျင်မှ အကြား အမြင်များ
အမှတ်စဉ်(၁) `ကျွန်တော်မျိုး ကျွန်က တစ်ယောက်တည်းသာ သခင်တွေက(၆)ဦးပါ´ ၁၂-၁၂-၂၀၁၁
ကျွန်တော် ဘာကောင်မှ မဟုတ်ပါ။ ပေးထားတဲ့ ခေါင်းစဉ်အတိုင်း ကျွန်တော့်ကိုယ် ကျွန်တော် မညှာမတာ ပြန်လည် ဝေဖန်သုံးသပ်ကြည့်မိပါတယ်။ ကိုယ်ရည်သွေးမည် မဟုတ်။ ကိုယ့်အကြောင်း နဲ့ ကိုယ့်ပတ်ဝန်းကျင်၏ မြင်တွေ့သမျှတွေကို အရှိကို အရှိအတိုင်း ချပြရေးသားလိုက်ပါရစေ..။ အချိန်တွေကြာသွားရင်တော့ ကျွန်တော့် ဘ၀ မှတ်တမ်း သမိုင်းတစ်ခုအဖြစ် ကျန်ခဲ့မယ်ထင်မိပါတယ်..။ ကိုယ်ရေးအထ္ထုပတ္တိလည်းမဟုတ်လို့ ပတ်ဝန်းကျင် နဲ့ ပတ်သက်သော ကိစ္စတချို့အပေါ် သဘောထားအမြင်များ လွဲမှားမိခဲ့ရင်လည်း နာလည်ခွင့်လွှတ်ပေးတော်မူကြပါခင်ဗျာ….။
ဒီနေ့ ၁၃၇၃ ခုနှစ်၊ နတ်တော်လပြည့်နေ့ပါ။ ၁၀-၁၂-၂၀၁၁ နေ့။ ကျွန်တော့် မြေးမလေး ဖြိုးမြတ်သော်တာ ရက်တစ်ရာမွေးနေ့ကို ပြန်လည်စဉ်းစားမိပါတယ်။ မြေးမလေး ကို စတင် နာမည်ပေးတဲ့ မင်္ဂလာအခါတော်နေ့ဆိုရင် ပိုပြီးမှန်ပါလိမ့်မယ်။ မြေးမလေး နာမည်ကို စာရေးဖော် ဆရာနေခြည်(မကွေး) က တွက်ချက်ပြီး ရွေးချယ်ပေးတာပါ။ နာမည် အက္ခရာစာလုံးတွေကိုတော့ မိသားတစ်စုလုံး တိုင်ပင်ညှိနှိုင်း ရွေးချယ်ကြပါတယ်။ နောက်ဆုံး အတည်ပြုတဲ့နာမည် မဖြိုးမြတ်သော်တာ ဆိုတာကိုတော့ ကျွန်တော် အဘ ဆိုသူက ရွေးချယ်ပေးလိုက်ပါပြီ….။ မဖြိုးမြတ်သော်တာ အမည်တွင်စေသော်..။ အသက်တစ်ရာ ကျော်ရှည်ပါစေသော်..။ ဘုန်းကြီးလို့ သက်ရှည် ကျမ်းမာ ချမ်းသာ လို့ လောကီ လောကုတ္တရာ အတွက် ကောင်းမှု ကုသိုလ်ရှင်ကြီး ဖြစ်ပါစေသော်… လို့ ချစ်သော မြေးမလေးကို ဆုတွေ တစ်သီကြီး ပေးလိုက်မိပါတယ်….။ သြော် သား သမီးအချစ်၊ မြေးအနှစ် ဆိုတာ မှန်ပါပေတယ်။ ကျွန်တော့်ဘ၀မှာ မြေးဦးလေးက မောင်ဘုန်းနေခန့်၊ မြေးမလေးက မဖြိုးမြတ်သော်တာ လို့ မြေးနှစ်ဦးရခဲ့ပါပြီ..။ ဒီမြေးနှစ်ဦးဟာ နေတစ်စင်း၊ လ တစ်စင်း လို့ ကျွန်တော့် ဘ၀အတွက် ပြည့်စုံခဲ့ရပါပြီဗျာ…..။ ကျွန်တော်တို့ အဖေဘက်က အမျိုးတွေမှာ သား သမီး နှစ်ယောက် သာ ထွန်းကားခဲ့ပါတယ်။ ကျွန်တော့်မှာလည်း သားတစ်ယောက်၊ သမီးက တစ်ယောက် စုစုပေါင်း နှစ်ယောက်တည်းသာ၊ သား သမီးရှိပါတယ်။ ယခု မြေး နှစ်ယောက်ကတော့ သမီးက မွေးထားတဲ့ မြေးလေး နှစ်ဦးပါ။ တိုက်တိုက် ဆိုင်ဆိုင် ကျွန်တော့် သမီးကလည်း ဒီ မြေးလေး နှစ်ဦး သာ ကလေးယူတော့မယ်တဲ့။ ကျွန်တော့် သားကြီးကတော့ မိန်းမ မယူဘဲ နေသူပါ။
ဒီနေ့ ကျွန်တော့်အတွက် စီးပွားရေးကတော့ ဈေးရောင်းပါတယ်။ အမေထွား ပဲဆီ၊ နှမ်းဆီ ဆိုင်မှ ၀န်ထမ်းထွက်သွားလို့ ကိုယ်တိုင် ဆိုင်ထိုင်ပြီး ဈေးရောင်းနေပါတယ်။ ၀န်ထမ်းစားရိတ် လေးသောင်းသက်သာပြီး ကိုယ်ရတာပေါ့။ ဆီ ဆိုင်မှာ ဈေးရောင်းရင်း ပုတီးစိတ်ပါတယ်။ လောဘနဲ့ ဈေးရောင်းကောင်းအောင် သစ္စာမေတ္တာဆရာတော်(မင်းဘူး စက္ကိန်းတဲ) ခိုင်းတဲ့ ကျင့်စဉ်ကို ဇွဲနဲ့ နေ့စဉ် မပျက်မကွက် စွဲစွဲမြဲမြဲ စရဏ လုပ်ပါတယ်။ နောက်ပြီး လက်တော့ပ် ကွန်ပျူတာတစ်လုံးနဲ့ အင်တာနက်လိုင်းမှာ ပြည်တွင်း ပြည်ပသတင်း နဲ့ ဘလော့များစုံအောင်လည်ပါတယ်။ စာဖတ်ပါတယ်။ သတင်း ကို အဓိကထားပြီးကြည့်ပါတယ်။ အင်တာနက် သတင်းကို အားမရနိုင်ဘဲ ပြည်တွင်း သတင်းဂျာနယ်များကိုလည်း အားလုံးဖတ်ပါတယ်။ ၀ယ်၍ မဖတ်နိုင်ပါ။ အိမ်ကထီဆိုင်ရှေ့မှာ ဂျာနယ်များ ရောင်းပါတယ်။ အတွေးရိပ် စာပေ မှ မနက်ယူရောင်းပြီး မကုန်တာကို ညနေပိုင်းမှာ ပြန်ပေးပါတယ်။ တစ်ပတ် တစ်ခါ ငွေရှင်းရပြီး တစ်ပတ်မှာ ငွေနှစ်ထောင်လောက်တော့ အမြတ်ငွေရပါတယ်။
ဒီနေ့ ကျွန်တော့်အတွက် ဘာသာရေးကတော့ ညနေ(၄)နာရီ မှ (၅)နာရီအထိအချိန်ယူပါတယ်။ ပုည၀တီ မိုးကုတ်ဝိပဿနာ တရားရိပ်သာသို့ သွားပါတယ်။ တရားနာ၊ တရားငိုက် အဆင့်မှာသာ ရှိပါသေးတယ်။ လုံးဝ တရား မတွေ့သေးပါ။ ညနေ အပြန်မှာ စာရေးဆရာ သတင်းထောက် မိတ်ဆွေတွေနဲ့ စွဲမက် လက်ဖက်ရည်ဆိုင်မှာ ထိုင်ကြပါတယ်။ အများအတွက် သတင်းများ နဲ့ ကိုယ်ရေးကိုယ်တာ ကိစ္စများကို ရင်ဖွင့်ဖြစ်ကြပါတယ်။ တစ်နေကုန် အိမ်ကိစ္စ ရုံးကိစ္စတွေကို ခဏနားထားကြပြီး ဦးနှောက်ဆေးကြတယ်လို့ ဆရာကြီး မကွေးဝင်းမြင့် က ဆိုပါတယ်။ ယနေ့ မြန်မာနိုင်ငံမှာ ပြုပြင်ပြောင်းလဲ မှုများကို ကိုယ်သိသလောက် တစ်ဦးချင်းက ဖောက်သည်ကျပြီး စကားဝိုင်းဖွဲ့ကြပါတယ်။ ဒေါ်အောင်ဆန်းစုကြည်တို့ NLD က ကျင်းပမဲ့ တိုင်းရင်းသားပညာရေးထောက်ပံ့ရေး ရံပုံငွေပွဲ ပွဲမိန့်မရဘူးတဲ့။ ဒါအပြင် NLD ပါတီ ရံပုံငွေပွဲ၊ ဈေးရောင်းပွဲတော်တွေလည်း လုပ်ခွင့်မရဘူး သိရပါတယ်။ အနုပညာရှင် အဆိုတော်တွေ ငါးဆယ်နဲ့ ကျင်းပဖို့ လက်မှတ်များတောင် ကြိုတင်ရောင်းထားကြောင်း ဂျာနယ်တစ်ဆောင် မှာဖော်ပြထားပါတယ်။ ရက်ရွှေ့ဆိုင်းကြောင်း သတင်း သိရပါတယ်။
မကွေးစာနယ်ဇင်း နဲ့ စာပေ၀ါသနာရှင် လူငယ်များ ဦးဆောင်ကျင်းပမယ့် မကွေးမြို့ စာပေဟောပြောပွဲ ဒီနှစ်တော့ ဖြစ်တယ်တဲ့။ ဒီိဇင်ဘာ(၂၉)ရက်နေ့ မကွေးမြို့ မြို့တော်ခန်းမ မှာ ည(၇)နာရီစတင်ပါမည်။ ဒေါက်တာထွန်းလွင်( မိုးလေ၀သ/ ညွှန်ကြားရေးမှူး(ငြိမ်း)၊ စာရေးဆရာ နေ၀င်းမြင့်၊ ဆရာမ ခင်ခင်ထူး၊ ဆရာ ညိုထွန်းလူ၊ တို့ ပါမယ် သိရပါတယ်။ ယနေ့ ဗီနိုင်းဆိုင်းဘုတ်ကိစ္စ၊ မြို့တော်ခန်းမ ခွင့်ပြုရေးအတွက် မကွေးမြို့နယ် စည်ပင်သာယာရေးအဖွဲ့မှ ခွင့်ပြုလိုက်ကြောင်း သိရပါတယ်။ ဒါကြောင့် ဒီနေ့ ဆိုင်းဘုတ်ကြော်ငြာများ စိုက်ထူဖြစ်ကြပါတယ်။ ဒီကိစ္စတွေကို စာနယ်ဇင်း အတွင်ရေးမှူး နေခြည်(မကွေး) တို့ အဖွဲ့က ဆောင်ရွက်ပြီးကြောင်း သိရပါတယ်။
ည(၇)နာရီမှာ ကိုယ့်အတွက် ဘုရားရှစ်ခိုးပါတယ်။ တရားမထိုင်နိုင်ပါ။ ဈေးဆိုင်ကို ည(၁၀)နာအထိ ဖွင့်ပြီး ရောင်းချနေရပါတယ်။ ယနေ့အတွက် ကျွန်တော်ရရှိတဲ့ ကုသိုလ် နဲ့ အကုသိုလ်များကို ချိန်ဆကြည့်မည် ဆိုရင် အကုသိုလ်က အချိန်များနေပါတယ်။ ဒါပေမယ့် အများအတွက်တော့ အကျိုးပြုမယ်တော့ ထင်မိပါတယ်။ ဘာကြောင့်လည်းဆိုတော့ အင်တာနက် မှ ကြိုက်နှစ်သက်တဲ့ သတင်းများ ဆောင်းပါးများကို ဖတ်ပြီး လက်ဆင့်ကမ်းပါတယ်။ အိုင်တီ လူငယ်များ ဆိုဒ်ထဲမှာ ကိုယ်နှစ်သက်သော သတင်း၊ဆောင်းပါးများကို တင်ပေးပါတယ်။ စိတ်ကူးရရင်လည်း ကဗျာ လေးများကိုလည်း တင်ပြပေးလိုက်ပါတယ်။ အဲ အင်တာနက်သတင်း နဲ့ အားမရနိုင်ဘဲ ရေဒီယို နိုင်ငံခြားသတင်းများကိုလည်း ဖွင့်ပြီး နားထောင်မိပါတယ်။ ပြည်တွင်းသတင်းအတွက်လည်း ည(၈)နာရီမှာ ရုပ်မြင်သံကြားကိုလည်း ဖွင့်မိပြန်ပါတယ်။ အကြားအာရုံ၊ အမြင်အာရုံ၊ အတွေ့အာရုံ၊ အသိအာရုံတွေကြားမှာ ကျွန်တော် ဗျာများနေရပါတယ်။
ယနေ့ ဈေးရောင်းကောင်းပါတယ်။ ဒါပေမယ့် ကျွန်တော်ရဲ့ အသိဥာဏ်ထဲမှာတော့ ဘာတွေကိုမျှ အဖတ်မတင်ဘူး ထင်မိပါတယ်။ မိုးကုတ်ဆရာတော်ဘုရားကြီး ဆုံးမတဲ့ အာရုံ(၆)ပါး ခိုင်းတာကို အလုပ်သမားရုပ်ကြီး ဖြစ်တဲ့ ကျွန်တော်တစ်ယောက်တည်း လိုက်ပြီး လုပ်နေရတော့ ဖတ်ဖတ်ကို မောနေပြီပေါ့။ အင်း ကျွန်တော်က တစ်ယောက်တည်းပါ။ ကျွန်တော့်ကို အလှည့်ကျ မပြတ်အောင် ခိုင်းနေသူတွေကတော့ မျက်စေ့၊ နား၊ ၊ နှာခေါင်း၊ လျှာ၊ ကိုယ်၊ စိတ် ဆိုတဲ့ ကျွန်တော့်မှာရှိနေတဲ့ ကိုယ်ပိုင်ပစ္စည်းတွေကို ပြင်ပ ဧည့်သည်ရန်သူတွေဖြစ်ကြတဲ့ အဆင်း၊ အသံ၊ အနံ့၊ အရသာ၊ တွေ့ထိစရာ၊ ကြံစည်တွေးတောစရာ တွေက တစ်ခုပြီး တစ်ခု ဒလဇတ် မပြတ် အကြားမရှိ ဆက်၍ ဆက်၍ ခိုင်းနေကြပါပြီ..။ သူတို့ခိုင်းတဲ့အတိုင်း ကျွန်တော်ကလည်း တစ်ခုပြီး တစ်ခု အပြေးလိုက်မိနေပါပြီ…။
ကျွန်တော်မှာတော့ သူတို့အားလုံးက ခိုင်းတဲ့အတိုင်းပဲ မြင်စိတ်၊ ကြားစိတ်၊ နံစိတ်၊ စားစိတ်၊ တွေ့ထိစိတ် ၊ ကြံစည်တွေးတောစိတ်တွေနဲ့ သာ လုံးချာလိုက်ပြီး အလှည့်ကျ နဘမ်းလုံးနေပါပြီ…….။ဒီလိုနဲ့သာ ည(၁၁)နာရီထိုးသွားပြီ.။ ဒါကြောင့် အမြန်အိပ်ယာထဲ ပြေးဝင်မိပါတယ်။ ဒါပေမယ့် အိပ်နေတာတောင် အိမ်မက်ထဲမှာတောင် မနားတန်း အတွေးလောဘစိတ် မောဟစိတ်တွေက ကျွန်တော်နောက်ကို လိုက်လာနေကြပါသေးတယ်ဗျာ..။
ရွှေလမ်းငွေလမ်းဝင်းကြည်
၂၀၁၁၊ ဒီဇင်ဘာလ(၁၃)။
0 comments:
Post a Comment