အငယ်လေးကို ချစ်ခဲ့မိလို့ (၁)

အငယ်လေးကို ချစ်ခဲ့မိလို့ (၁)
ရွှေလမ်းငွေလမ်း ၀င်းကြည်

ဦးရွှေဝင်းသည် အသက်(၄၉)နှစ်ရောက်မှ ဗွေဖောက်လာပြီဟု ပတ်ဝန်းကျင်က မေ့ငေါ့ကြ၏။ သူ့ဘ၀သူလဲ အသိသား။ ဖြစ်ပုံကလည်း အများအမြင်မှာတော့ အဆန်းတကြယ်၊ မကြားဝံ့ မနာသာပါပဲ။
ဦးရွှေဝင်းမှာ ပထမဇနီးကြီး ဒေါ်ဌေးကြည်နှင့် အိမ်ထောင်သက် (၂၆)နှစ်ရှိလေသည်။ သားကြီး မောင်ထိပ်တင် အသက်(၂၅) နှစ်ပြည့်ပြီ၊ သမီးငယ် ဂျမ်းထော်မှာ အသက် (၂၃)နှစ်ပြည့်၍ သားသမီး (၂)ဦးသာရှိ၏။ စီးပွားရေးလုပ်ငန်းမှာ အထည်ချုပ် စက်ရုံတစ်ခု တည်ထောင်ထားသည်။ အမျိုးသမီးလုပ်သား ၁၀၀ ကျော်ရှိ၏။ နေ့ဆိုင်း၊ ညဆိုင်းခွဲ၍ အလုပ်ဆင်းကြရသည်။ အလုပ်သမား များကို ဦးရွှေဝင်း ဇနီး ဒေါ်ဌေးကြည်က မန်နေဂျာမကလေးများ အဆင့်ဆင့်ဖြင့် အုပ်ချုပ်စီမံ လုပ်ကိုင်ကြသည်။
လောကကြီးတွင် အရာရာမှာ ပြည့်စုံခြင်းနှင့် လောကမှာ အကောင်းဆုံးဘ၀၊ အကောင်းဆုံးအချိန်၊ အကောင်းဆုံးအရာသည် ဘာကို ခေါ်ပါသနည်း။ ဦးရွှေဝင်းတွေး၍ ပြုံးနေမိ၏။
ဒေါ်ဌေးကြည်သည် ဦးရွှေဝင်း၏ ၀တ္ထုစာမူကြမ်းများထားသော စာအုပ်နှင့် ကောင်မလေးအကြောင်း တစ်ပိုင်း တစ်စ ရေးသားထားသော ပေးစားများ၊ ပြန်စာများအား တစ်ရွက်ခြင်း ရှာဖွေ ဖတ်နေသော အခါ…..
ဦးရွှေဝင်း၏ ချေပုန်းခုတ်နေသော ဇာတ်လမ်းများ ပီပြင်စွာ ရုပ်လုံး ပေါ်ပေတော့သည်။

ချစ်စုမ
နေ့။ ၁၅-၃-၂၀၀၀။

ရက်စက်လိုက်တာ ကလေးရယ်--
အပြောတခြား၊ အလုပ်တစ်ခြား ပါစင်အောင် လွဲသွားပါရော့လား..။ဒီကမ္ဘာမှာ ယောက်ျားတွေထဲက ဦးဦးဖျားဖျား ချစ်မိခဲ့ပြီး မိန်းကလေးရဲ့ ပထမဆုံး အတွေ့အထိ အနမ်းပန်းတွေနဲ့ ကျမရဲ့ ဘ၀ပန်းပွင့်ကလေး ကြွေခဲ့ရပါပြီ

လို့ ချစ်စုမရဲ့ လက်ရေးနဲ့ ရေးထားတဲ့ စာကလေးတွေ၊ ကဗျာလေးတွေ အမြတ်တနိုး သိမ်းဆည်းထားချင်လို့ နင့်စာတွေ မိတ္တူကူးပြီး ယူထားလိုက်ပါတယ်။ မူရင်းစာတွေကိုပြန်ပေးလိုက်ပါတယ်။ ချစ်စုမအတွက် နောက်ကြောင်းရှင်းအောင် ဦးဘ၀နဲ့ ရင်းပြီး တာဝန်ယူ ကတိပေးပါတယ်။

သုိ့
ဦးအတွက်


ကဗျာ(၁)
အချိန်တစ်ခုမှာ စတင်တဲ့ အချစ်၊ ရင်ထဲခံစားချိန်မှာ စိတ်တွေက တိမ်တွေလို၊ ကြည်နူးလွမ်းဆွတ်မှုတွေက တစ်လှည့်စီ ဘယ်အချိန်မှာ ဆုံမယ်တော့မသိ၊ သေချာတဲ့ အခြေမှန် တစ်ခုက တကယ်ချစ်ခဲ့တဲ့သူ ရင်မှာ၊ ထာဝရ သတိရနေမှာပါ။ သူနားလည်နိုင်ပါစေ။
၁၄-၃-၂၀၀၀

ကဗျာ(၃)
ကြင်နာသူ အချစ်ရိပ်

ချိုမြိန်တဲ့ အနမ်းပွင့်
ကြေးမှုံပေါ်က ပုံရိပ်နှစ်ခု
ပျံ့လွင့်နေတဲ့ ရယ်သံ
စီးဆင်းနေတဲ့ မျက်ရည်
မျက်စိထဲနားထဲ မြင်ယောင်ကြားယောင်
တမ်းတသတိရ အချိန်တိုင်းလွမ်းကွယ်။

ချစ်စုမ

စာ(၂)
ဦးရေ
ဦးဘ၀ထဲက အိပ်မက်ကလေးတစ်ခု ဖြစ်ခဲ့ပေမယ့်၊ ထာဝရ သတိရပေးရင် အရာရာအတွက် ကျေနပ်ပါတယ် ဦးရယ်---။
ဦးရဲ့ သမီး။

သို့
ဦးရေ
ကျမ အချစ်က လေးနက်မှု အပြည့်နဲ့ သူ့တစ်ယောက်တည်းအတွက် တန်ဖိုးအရှိဆုံး ရင်ခုံမှုများစွာ ပေးအပ်ခဲ့ရတယ်ဆိုတာ မိမိကိုယ်မိမိသာ အသိဆုံးပါ။ ဒါပေမယ့် အဲဒီအချစ်က ပေးဆပ်မှုလား၊ စွန့်လွှတ်မှုလား၊ ပိုင်ဆိုင်ဖို့လားဆိုတာ မသေချာသေးပါဘူး၊ သေချာတာတစ်ခုကတော့ နောက် ဘယ်ယောက်ျားအတွက်နဲ့မှ နှလုံးသားက ငိုမှာ မဟုတ်တော့ပါဘူး။ သူတစ်ယောက်တည်းအတွက်ပဲ ခံစားရတဲ့ အချစ်က ဒီတစ်သက်မှာ အမြဲတမ်း စိုးမိုးနေတာမို့ပါ။ သူ့တစ်ယောက်တည်းအတွက်ပဲ နှလုံးသားက ခံစားရတဲ့ အချစ်ဟာ ဒီတစ်သက်မှာ အမြဲစိုးမိုးနေတာမို့ပါ။ သူတစ်ယောက်တည်းအတွက်ပဲ နှလုံးသားက ၀မ်းနည်းခြင်း၊ ၀မ်းသာခြင်းတွေနဲ့ ထာဝရ ရှင်သန်နေမှာပါ။ ပြောရတိုင်း၊ ရေးရတိုင်း အလွယ်ရေး ပြောနေတာ မဟုတ်ပါဘူး။ ရင်ထဲက ခံစားချက်အတိုင်းပါပဲ။ အဲဒီခံစားချက်တွေကို ဖြစ်မြောက်ခံစားနိုင်ဖို့ အချိန်အများကြီးကို ပေးဆပ်ရသည့်ကြားမှာ မသေချာတဲ့ ကံကြမ္မာဆိုးတွေ ကြုံလာခဲ့ရင်ဖြင့် မိန်းမသားဘက်က နာစရာရှိရင် နာရ၊ အရှက်ရမှာပါ။ သုံးနှစ်အတွင်း သောကတွေနဲ့ မရှင်သန်ရှင်ဘူး။ သန့်ရှင်းစင်ကြယ်တဲ့ အချစ်တွေနဲ့ပဲ အချစ်တွေကို အားကိုးပြီး အမြန်ဆုံးပြီးဆုံးမဲ့ရက်တွေကို ကျော်ဖြတ်ပါရစေ။ နားလည်ခွင့်လွှတ်ပါ။ ကြားထဲမှာ ဘ၀နဲ့ နှိုင်းဆပြီး ဘာအပြစ်မှ မတင်ချင်ပါဘူး။ ကျမက တစ်ခြား ကောင်လေးတွေနဲ့ ရှုပ်တယ်ဆိုတာ ရင်ထဲမှာ ဘာခံစားချက်မှ မရှိပါဘူး။ သူ့တစ်ယောက်အတွက်ပဲ လုံလောက်တဲ့ အချစ်တွေကို အစွမ်းကုန်ပေးပြီးသားပါ။ အမြဲတမ်း ရှင်သန်နုပျိုခြင်းတွေနဲ့ စိတ်ရှည်လက်ရှည် စောင့်ပါဦးရယ်။

ဦးရဲ့သမီး

ကျွန်ုပ်သည် ဇနီးကြီး ဒေါ်ဌေးကြည်အား များစွာမှ ချစ်မြတ်နိုးခဲ့ရပါ၏။ ကျွန်ုပ်ဇနီးကြီးသည် ကျွန်ုပ်ထက် (၈)နှစ်ခန့် အသက်ကြီး၍ ခေတ်ပညာတတ် ဘွဲ့ရ အမျိုးသမီး တစ်ဦးပါ။ ရိုးသား၏၊ လောကွတ်မပါ။ မျက်နှာထား ပုံမှန်ဖြင့် မည်သူ့ကိုမဆို ဆက်ဆံပါ၏။ အပိုစကားဖြစ်တဲ့ “ ဟော မတွေ့ရတာကြာပေါ့။ ကျမက သိပ်တွေ့ချင်ပြီး သတိရနေတာ ကြာပြီ” စသည့် စကားပိုများ မပြောတတ်။ “ကဲ ဘာကိစ္စရှိလဲ၊ ဘာလုပ်ပေးရမလဲ“ ကျမတို့ လုပ်ငန်းက ကိုယ့်အလုပ်နဲ့ကိုယ် ရှုပ်နေတာ--” ထိုကဲ့သို့ ကိုယ့်မိသားစု လုပ်ငန်းခွင် အရှိ အမှန်အတိုင်း ဒဲ့တိုးကြီး ပြောတတ်ပါ၏။ သားနှင့်သမီးကိုလည်း သားရေ--၊ သမီးရေ--ဟု ဘယ်တော့မှ မခေါ်၊ နာမည်ကိုသာ တက်၍ ခေါ်ပါ၏။ ထိပ်တင်နှင့် ဂျမ်းထော်ဟု ခေါ်၏။ ကျွန်တော် သူ့ယောက်ျားကိုတော့ သူ့ထက် အသက်ငယ်သော်လည်း ကိုတတ်၍ ကိုရွှေဝင်းဟု အသံခပ်ပြတ်ပြတ်နဲ့သာ ခေါ်တတ်သည်။
ကိုရွှေဝင်းရေ--ယောက်ျားရေး--လို့ ဘယ်သောအခါမှ ချွဲချွဲ ပျစ်ပျစ်မခေါ်တတ်၊ မသုံးတတ်ပါ။ အညုအခရာ ဆိုရင်တော့ ဝေလာဝေးပါပဲခင်ဗျား။
မချစ်၍ အပြစ်ရှာခြင်း မဟုတ်ပါ---။
ဇနီးကြီးအပေါ် လေးစားပြီးရင်နှင့်အမျှ ချစ်ရပါသည်။ ကျွန်တော် ဘယ်လောက်ဆိုးဆိုး၊ ဘယ်လိုပင် မူးမူး၊ ဘယ်လောက်ပင် ဗျစ်တောက်၊ ဗျစ်တောက် ပြောပြောဆူဆူ၊ လုံးဝ မနာတတ်သလို ခွန်းတုံ့ခွန်းပြန် သိပ်မပြောပါ။ တစ်ခါ တစ်ခါ ဒေါသ ကြီးရင်သာ ပေါက်ကွဲပြီး အနည်းငယ်သာအော်၍ ဒေါသသံ ကြားရပါ၏။ ကျွန်တော်လိမ်၍၊ ညာ၍ လှည့်၍ ပြောသော စကားများကိုလည်း ယုံကြည်တတ်ပါသည်။ ဒါကြောင့် ပုံမှန် ရိုးသားစွာ ပြောဆိုတတ်သော ကျွန်တော့ ဇနီးကြီးအား များစွာ ချစ်မိပါ၏။
အမေလို အစ်မလို လေးစားအားကိုးပြီး ချစ်မိပါ၏။ အဲဒီလို ကျွန်တော်ဖွင့်ပြောရင်လည်း သူလုံးဝ မကြိုက်ပါ။ သြော်--လင်မယား ချစ်ဆိုသည်မှာ နှစ်ဦးနှစ်ဘက် အလိုပြည့်ခဲကြပါလား။ အသွင်မတူ အိမ်သူမဖြစ်ဆိုတဲ့ ရှေးစကားပုံရှိခဲ့သော်လည်း သူ့အကြိုက်၊ကိုယ့်အကြိုက်ပြောဆို ဆက်ဆံနေထိုင်ရန်မှာ ကြာတော့ မလွယ်ကြပါ။
ကျွန်တော်သည် သူများလင်မယားတွေကို ကြည့်ပြီး တစ်ယောက်နဲ့တစ်ယောက် တီတီတာတာသဲသဲလုပ်ဖြစ်သော လင်မယားစုံတွဲတွေ မြင်လေတိုင်းသက်ပြင်းမုန်တိုင်းတွေ မှုတ်ထုတ်မိတော့၏။

ချစ်စုမ---
ဒီကောင်မလေးသည် ပထမအကြိမ်ကျွန်တော့စက်ရုံမှာ (၁၀)တန်းကျောင်းတစ်ခါကျပြီး၊ အလုပ်ဝင်လာခဲ့၏။(၁၀)တန်းဖြေခါနီးအလုပ်မှ ထွက်၍ ဒုတိယအကြိမ်အလုပ်ဝင်လာပြန်၏။(၁၀)တန်းအောင်လာပြီ ပြော၏။ စာပေးစာယူတက်၍ ဘွဲ့ယူမည့် ဟုသိရ၏။
“ဟဲ့--ချစ်စုမ--ညီး ဒုတိယအကြိမ် အလုပ်ဝင်လာတာဟုတ်ပါပြီ။ ပထမအကြိမ် အလုပ်ဝင်တုံးကလို “ ငါ့မိန်းမကို မအော်ရဘူး၊ မလေးမစား မဆက်ဆံရဘူးနော်”
ချစ်စုမက မျက်စောင်းတစ်ချက်စူးစူးစိုက်စိုက်ကျွန်တော့်ကိုကြည့်ပြီး ခေါင်းငြိမ့်ရင်း-
“ဟုတ်ကဲ့ပါဦး၊ သမီးစကားပြောရင် အော်ပြောတတ်လို့ပါ--နောက်အော်သလို၊ ငေါက်သလို မပြောတော့ပါဘူး၊ စိတ်ချပါ”
ချစ်စုမသည် အသက်(၁၉)နှစ်သာ ရှိသေး၏။ သွက်လက်ချက်ချာ၏။သူ၏ ရယ်သံကလေးများသည် ယောက်ျားတို့ ရင်ဝယ် လှုပ်ခါသွားတတ်၏။ သူမ၏ သွားတတ်ကလေးများပေါ်အောင် ရယ်တာကြိုမင်ရလျှင် များစွာမှ ကြည့်ကောင်းပါ၏။ ယခုခေတ်မင်းသမီး ဇင်ဇင်ဇော်မြင့်နှင့်တူသည်ဟု ဆိုလျှင် လုံးဝ မမှားပါ။
နာမည်နှင့်လိုက်အောင် အချစ်တွေကိုစုပြီး ရည်းစားတွေ မှိုလိုပေါက်ထား၏။ တစ်ရက်တည်း နှစ်ယောက်လောက်ကို နာရီခြားပြီး ချိန်းတွေ့တတ်၏။ အလုပ်ဆင်း၊ အလုပ်ပြန်ချိန်နှင့် နားချိန်များတွင် အကြိုအပို့ လုပ်ခိုင်းတတ်၏။
ကျွန်ုပ်သည် ဒီကောင်မလေး ရည်းစားများသာသိ၏။ သူ့ရယ်သံ၊ ပြောသံတွေကို သာယာကြည်နူးနေမိ၏။ တစ်နေ့တွင် စာပေးစာယူဖေါင်တင်ကိစ္စ ခွင့်တောင်း၏။ ခွင့်ပေးလိုက်၏။ ခွင့်ပေးရုံတင်မက စာပေးစာယူ ကိစ္စ ကုန်ကျငွေ ၁၅၀၀၀ိ/- ခန့်အား တစ်ဝက် ၇၅၀၀ိ/- ငွေကို ကျခံမည်ဟု ပြောပြောပေးပေး ပေးခဲ့၏။ အလုပ်ပြန်ညများတွင် တစ်ခါတစ်ရံ ဆိုင်ကယ်ဖြင့် လိုက်ပို့ပေးမိပါ၏။ သူကတော့ ကိုယ့်ဦးလေး အရွယ်မို့ အားကိုးတစ်ကြီး နောက်က ယုံကြည်စွာ လိုက်ပါသည်။ ဆိုင်ကယ်စီးတော့လည်း ရဲတင်းစွာဖြင့် ကျွန်ုပ်ခါးကို ဖက်၍ ကိုင်၍ စီးလာ၏။ မိန်းမနှင့် ယောက်ျား ထိတွေ့မှု ဆိုသည်မှာ ဖိုနှင့်မ ထိလျှင် မီးပွင့်တဲ့ လျှပ်စစ်မီးသီးလို အချစ်ရင်ဖိုလာခဲ့မိ၏။ ဇရာအိုအချစ်ကညာပျိုအသစ်ငယ်ငယ်လေးနဲ့ဆိုတော့ နွားအိုမြက်နုကြိက်တယ်ပဲ၊ ဆိုကြ ဆိုကြ၊ အကျွနု်ပ်ချစ်ခဲ့မိလေပြီ။
ကျွန်တော်သည် အစပထမတော့ အတွေ့အထိဖြင့် ခေတ္တသာယာမှုကို ရှာမိခဲ့ပါသည်။ အလုပ်ရှင် အလုပ်သမားဖြစ်၍ ကြောက်၍ လိုက်လျောသည်လား၊ တကယ်ချစ်၍လား မပြောတတ်၊ ကျွန်တော်တို့နှစ်ဦး အပြန်အလှန် ချစ်တင်းနှောမိခဲ့ကြပါ၏။ အထက်ကစာတွေက ကျွန်တော်တို့ ဘယ်လောက်အထိ ခရီးပေါက်ခဲ့ကြသလိုဆိုတာ ဖော်ပြကြပါ၏။ ဘယ်လောက်အထိ သံယောဇဉ် တွယ်တာစွဲလမ်းလာခဲ့မိကြတယ်ဆိုတာ ကျွန်တော်တို့နှစ်ဦးကလွဲလို့ မည်သူမျှ သိကြမည် မထင်ပါ။
ကျွန်တော်သည် ကြီးတောင့်ကြီးမားဘ၀မှာ ကြီးမှ ပေါက်သည့် ၀က်သက်အချစ်ရောဂါမီးကို မွှေးခဲ့မိပါ၏။ ငယ်စဉ်က မြီးကောင်ပေါက် မိုက်ရူးရဲ အချစ်ထက် ကြီးမှ ထသည့် အချစ်ရောဂါသည် သိလျှက်နဲ့ တိုး၍ အဆပေါင်း တစ်ထောင်မက ပိုသည်ဟု ဆိုလျှင် မှန်ပါသည်။
ပတ်ဝန်းကျင် အသိုင်းအ၀ိုင်းဆိုသည်မှာ မသိလို့ ဆိုးသော လူမိုက်ကို သနားညှာတာ ခွင့်လွှတ် တတ်ကြသော်လည်း သိလျှက်နဲ့ဆိုးသော လူမိုက်ကိုတော့ ခွင့်မလွှတ်ကြရုံမက အားလုံးကး နားခေါင်းရှုံ့ကြမည်မှာ ဓမ္မတာပါ။
ချစ်စုမကို ကျွန်တော့်ရင်ထဲမှာ… ၄၉ နှစ်လုံးလုံး မရရှိ၊ မကြုံဖူးခဲ့၊ မခံစားဖူးခဲ့တဲ့၊ ကြည်နူးသာယာမှု အချစ်တွေအားလုံး ပေးဆပ်ခဲ့မိပါ၏။ ချစ်စုမကလည်း အရွယ်နှင့်မမျှ ချစ်တုံ့ပြန်တဲ့နေရာမှာ လူငယ်ပီပီ ပွင့်ပွင့်လင်းလင်း၊ မြန်မြန်ဆန်ဆန်၊ သွက်သွက်လက်လက် ၊ ကိုယ်အမူအရာ၊ နှုတ်အမူအရာတွေနဲ့ ကျွန်တော့်ကို သာယာမှု အပြည့်အ၀ဖြင့် အချစ်တွေ ပေးခဲ့ပါ၏။
သူဘာတစ်ခုမှ တောင်းဆိုခြင်း မပြုဘဲ ရွှေလက်စွပ်၊ ရွှေဆွဲကြိုး၊ ရွှေအသဲပုံ လည်ဆွဲလေးရယ်၊ အင်္ကျီပုံဆန်းနှင့် ပါတိတ်ဝမ်းဆက်တွေ အသေးသုံး တစ်ထောင်တန် ငွေစက္ကူတွေကို ကျွန်တော် လှိုက်လှိုက်လှဲလှဲ ကြည်ကြည်ဖြူဖြူ လက်ဆောင်တွေ ပေးခဲ့ပါ၏။(ယခုခေတ်စားနေတဲ့ အဆိုတော် ထွန်းထွန်းတို့အဖွဲ့)ဆိုတဲ့ ကိုကြီးဖြစ်ချင်တဲ့ ဒီရောဂါဆန်းကြီးကို ကျွန်တော့်ရင်ထဲမှ ဒဲ့တိုးကြီး ခံစားမိခဲ့ရပါ၏။ ဒီသီချင်းသံကြားတိုင်းလည်း ကိုယ့်ကိုကိုယ် ပြန်ပြီး ရှက်တက်၊ ကြောက်တတ်လာ ပါတော့၏။
ရက်စက်လိုက်တာ ချစ်စုမရယ်--ငါကတော့ သူငယ်ပြန်အချစ်နဲ့ ရက်ရက်ရောရော ချစ်ခဲ့မိတာ အမှန်ပါ။
သူကတော့ ၀တ္ထုဆန်ဆန်၊ ရွယ်တူ ရည်းစားကောင်လေးတွေနဲ့ ထည်လဲတွဲပြနေပြီး၊ င့ါကိုကျတော့ နောက်ကွယ်မှာထား၊ တိတ်တိတ်ပုံးအရံ အချစ်ဇရာအိုကြီးအဖြစ်နဲ့ ကောက်ရိုးခြောက်ပုံကြီးကို ခေါင်းထိုးထားခဲ့တဲ့ နွားကြီးလို ချစ်စုမရဲ့ အချစ်နှောင်ကြိုးကြီးနဲ့ ချည်ထားခဲ့တာပါလား--။ ယခုမှ တွေးကြည့်မိပါ၏။
ငါပေးတဲ့စာတွေကို င့ါသားကြီး၊ သမီးကြီးနဲ့ တစ်ခြား လုပ်ဖော်ကိုင်ဖက် အလုပ်သမားတွေကို ပြပြီး၊ သူမှားကြောင်း ၀န်ခံလိုက်သတဲ့။ ကျွန်တော့်ရဲ့ဇနီး သိသွားတော့ ဒေါသခြောင်းခြောင်းထွက်ပြီး ရွှေရင်တွေ တဖြန်းဖြန်းထုလျှက် ငိုပွဲဆင်တော့၏။ ကျွန်တော့်ရဲ့ ဘယ်ဘက်ပါးကို ရှစ်စိတ်ကွဲသွားမတတ်၊ အရိုက်ခံခဲ့ရပါ၏။
လောကကြီး ပြောင်းပြန်ဖြစ်ပြီး သားသမီးများက ဖအေရဲ့ရည်းစားစာကို လက်ပူးလက်ကျဖမ်းပြီး အဆုံးအမ ခံလိုက်ရပါ၏။ ဖခင်က သားသမီး၊ မိသားစုတစ်စုလုံးကို ၀န်ခံကတိတွေပေးပြီး ဒူးထောက်လက်မြှောက် အရှုံးပေးခံလိုက်ရ၏။ လုပ်ငန်းထဲမှာ အာဏာတွေ၊ ပါဝါတွေ အကုန်ကျ၊ ငွေရေး၊ ကြေးရေးကအစ လုံးဝ မယုံကြည်၍ ငွေစာရင်းနဲ့ ငွေတွေကို မကိုင်ရတော့ပါ။
ချစ်စုမကို ယုံပြီး ကျွန်တော့်အသဲတွေ ပုံပေးပြီး ချစ်ခဲ့မိ၍ အသဲတွေ ကွဲနေရတဲ့အပြင် မိသားစုတွေလည်း စိတ်ဝမ်း တစ်ကွဲတစ်ပြားစီ ဖြစ်ကုန်ရပါ၏။ ချစ်စုမလဲ ကျွန်တော့်ရဲ့ မိသားတစ်စုလုံးရဲ့ ပြောဆိုညိုညင်မှုတွေကိုလည်း မခံနိုင်၊ အလုပ်သမား အချင်းချင်းပတ်ဝန်းကျင်ရဲ့ မေးငေါ့မှုတွေကိုလည်း မခံနိုင်တော့ပဲ စက်ရုံမှ ထွက်သွားပါပြီ။ ကျွန်တော်နဲ့ ချစ်စုမ ကတိတွေ ထားခဲ့ပါ၏။ သစ္စာကတိပြု တဲ့နေရာကတော့ ရာဇမုနိဆုတောင်းပြည့်ဘုရားမှာပါ။ အကြပ်အတည်း အခက်အခဲတွေနဲ့ ရင်ဆိုင်ရရင် တစ်ပါတည်း ထွက်ပြေးကြမယ်၊ အေးအေးဆေးဆေးဖြစ်ကြရင် (၃)နှစ်(၃)မိုး စောင့်ကြမယ်။ ချစ်စုမရဲ့ မိဘကို လုပ်ကြွေးရင်း ဘွဲ့ရတဲ့အထိ စောင့်ကြမယ်။ပေါ့။ ကတိသစ္စာတွေ ထားခဲ့ကြပါ၏။ အင်္ဂလိပ်လဆန်း ၁ ရက်နေ့ရယ်။ ၁၆ ရက်နေ့ညနေ ၆ -နာရီမှ ၇ နာရီအထိ ရာဇမုနိဘုရားမှာ ဆုံကြမယ်လို့ ကတိထားခဲ့တဲ့အတိုင်း ကျွန်တော် (၂)လတိတိ သွားပြီး စောင့်ခဲ့မိပါတယ်။ ချစ်စုမကတော့ လုံးဝ ပေါ်မလာတော့ပါ။
ယခုမှ ပြန်လည်၍ စဉ်းစားမိပါ၏။ ချစ်စုမကို ပထမဆုံး အကြိမ် စ၍ ချိန်းတွေ့တဲ့ ဟိုတယ်တစ်ခု အခန်းအကျယ်ကြီးထဲရှိ မှန်တစ်ချပ်ရှေ့မှာ နှစ်ယောက်သား ကြည်ဆည်နေရင်းက ပြောသွားတဲ့စကား။
“ ဦးရယ်--သမီးနဲ့ ယခုတွဲနေတဲ့ ရည်စားရွယ်တူ ကိုဝင်းမင်း သာ ဦးဖြစ်လိုက်ရင် ဘယ်လောက်ကောင်းလိုက်မလဲ ဦးအမေက သမီးထက် ဘာကြောင့် အနှစ်(၃၀) ကြီးတောင် စောပြီး မွေးလိုက်တာလဲနော်--သမီးအခုတွဲနေတဲ့ ၀င်းမင်းဆိုတဲ့ ကောင်လေးကို သမီး တကယ်မချစ်ပါဘူး။ ရင်ထဲမှာ မရှိပါဘူး။ ပတ်ဝန်းကျင်က သူနဲ့ တွဲနေတော့ သမီးနဲ့ ဦးကို အထင်မမှားကြပဲ ဦးနဲ့သမီးစိတ်ချလက်ချ ကွယ်ရာမှာပျော်ရတာပေါ့ ဦးရဲ့။ ပထမဦးဆုံး ချစ်သူ ယောက်ျားလေးဟာ ဦးတစ်ယောက်ထဲသာ ဖြစ်နေရပါပြီ---ယုံပါနော်” ။
“ အိုကလေးရယ်၊ ဦးကလဲ ဦးရဲ့ ဘ၀တစ်သက်မှာ ယခုလို တွတ်တီးတွတ်တာနဲ့ သာယာကြည်နူးမှုတွေ အပြန်အလှန်ပေးပြီး ချစ်ပေးခဲ့တဲ့ ကလေးကို သေတဲ့အထိ၊ အသက်ထက်ဆုံးဆက်ပြီး စွဲစွဲမြဲမြဲ ချစ်သွားမှာပါကွယ်။ အချစ်ဆိုတာ---သ၀န်တိုတာပဲကွာ၊ ကလေးနဲ့ အခုတွဲနေတဲ့ ၀င်းမင်းကို ဖြတ်စာပေးလိုက်ပါနော်--ကလေးအတွက်ဆိုရင် ဦး ဘာကိုပဲ ပေးရပေးရ၊ ဦးရဲ့ ရင်ကိုခွဲ အသဲကိုပဲ ယူအုံးမလား၊ ဒီကောင်ကြီးက ပေးမှာပါဗျာ”
“ ဦးကလဲ သမီးပြောတာ နားလည်ခွင့်လွှတ်ပေးပါနော်၊ ၀င်းမင်းကို သမီးချစ်ဟန်ဆောင်နေတာပါလို့ဆို--- --- --- သူခေါ်တဲ့နောက် သမီး ဘယ်ကိုမှ မလိုက်ဘူး--သူချိန်းတဲ့နေရာ ဘယ်တော့မှာ မသွားပါဘူး ဦးရယ်--။- ဒီလိုဆိုရင် သူကြာလာရင် သမီးကို စိတ်ပျက်ပြီး အလိုလို နောက်ဆုတ်သွားပါလိမ့်မယ် ဦးရယ်--နော်..။ ဦးကလွဲပြီး၊ အခုသမီးတွဲနေတဲ့ ရည်းစားတွေ ဘယ်သူ့ကိုမှ မချစ်ပါဘူး၊ လက်ကလေးကိုတောင် အကိုင်ခံတာ မဟုတ်ပါဘူး ဦးရယ်--သမီးကို နားလည်ပေးပါနော်။ သမီးကို တကယ်ချစ်ရင် နားလည်ပေးပါဦးရယ်---နော်---နော်--”
အချစ်ဆိုသည်မှာ အိုသည်မရှိပါ။ ထာဝရ ရင်ထဲ အသဲထဲမှာ သစ်လွင်တောက်ပနေပါသည်။ အချစ်နဲ့ စစ်ပွဲမှာ မတရားဘူး ဆိုတာလည်း မရှိကြပါ။ အရွယ်တူတူ ၊ မတူတူ၊ ဂုဏ်ဓန တံတိုင်း ဘယ်လောက်ပဲ ခြားခြား မရပါ။ ချစ်တဲ့စိတ်ကို သံကွန်ခြာခုနှစ်ထပ်နဲ့ အုပ်ထား၍ မရနိုင်ပါ။ အချစ်မှာ မဖြစ်နိုင်သော အရာဆိုသည်မှာ ဘာတစ်ခုမှ မရှိကြပါ။
ကျွန်ုပ် အချစ်အဘိဓမ္မာအိုးကွဲကြီးမှာ ကြောက်စိတ်၊ ရှက်စိတ် လုံးဝ မရှိပါ။ ချစ်စှုမ သွားလေရာ နောက်ယောင်ခံ၍ တကောက်ကောက် လိုက်ကြည့်မိနေ၏။ ချစ်စုမကလဲ ရွယ်တူ ကောင်လေးတွေနဲ့ တစ်ယောက်ပြီး တစ်ယောက်တွဲပြနေ၏။ သူ့ကိုမေးတော့လဲ ဒါသမီးရဲ့ ငယ်သူငယ်ချင်းတွေပါ ဦးရယ်တဲ့။ ဒါပဲပြောပါ၏။
တစ်နေ့မှာ သိသိကြီးနဲ့ အခံရခက်လွန်းစရာ တစ်ခုကို ကြုံခဲ့ရပါ၏။ ချစ်စုမရဲ့ နောက်ကို အများဆုံးတွဲနေတဲ့ ၀င်းမင်းကို တွေ့ရ၏။ အချစ်ဆို အိုသည်မရှိ၊ ချစ်လွန်းလျှင် သ၀န်တို၊ သ၀န်ကြောင်တတ်ကြ၏။ ဒါကြောင့် စက်ဘီး နှစ်စင်း အတူယှဉ်းစီးလာတဲ့ ချစ်စုမနဲ့ ၀င်းမင်းကို တွေ့ရတော့ အချစ်ဒေါသမီးမုန်တိုင်း ထလာခဲ့မိပါသည်။ ရင်ထဲက မခံနိုင်တော့၍ ပြောမိပြောရာ ပြောချမိပါတယ်--။
“ဟေ့ကောင်ဝင်းမင်း၊ မင်းချစ်စုမ နောက်ကို လိုက်နေလဲ အလကားပဲ၊ ချစ်စုမနဲ့ငါ တကယ်ချစ်နေကြပြီကွ။”
“ဗျာ--ဘာဖြစ်တယ်၊ ခင်ဗျားကြီးမှာ မိန်းမနဲ့၊ သားကြီး၊ သမီးကြီးတွေနဲ့ဒီလိုလုပ်တာ ရိုင်းလိုက်တာဗျာ၊ ဘာပဲဖြစ်ဖြစ် ချစ်စုမကို ကျုပ်ကြိုက်လို့ လိုက်နေတာ။ သူနဲ့ တွေ့ချင်ပါတယ်---ဒီမှာ ခင်ဗျား မှတ်မိသေးလား၊ ပန်းခြံဘေးမှာ ခင်ဗျားနဲ့ကျုပ် ချစ်စုမကို နှစ်ယောက်ပြိုင်စောင့်စဉ်က ခင်ဗျားကိုထားပြီး ကျုပ်ကို ဇွတ်အတင်းဆွဲခေါ်ပြီး ဘုရားကို လိုက်ခဲ့ဖို့ ခေါ်တာလေ၊ မှတ်မိသေးလား၊ ကျုပ်တို့ လူငယ်တွေ ချစ်ရေးကိုခင်ဗျားကြီး လိုက်ပြီး မနှောင့်ယှက်ချင်ပါနဲ့တော့ဗျာ၊ ချစ်စုမနဲ့ တွေ့ခွင့်ပေးပါ။
“ မပေးဘူး ၀င်းမင်း၊ အချစ်မှာ မလုပ်သင့် မဖြစ်သင့်တဲ့ ဘာအတားအဆီးမှ မရှိဘူး၊ မတွေ့ရဘူး၊ ဘာကိုမှ ဂရုမစိုက်ဘူးကွ၊ မင်းဒီကနေ လှည့်မပြန်ရန် မင်းလက်ရှိ လုပ်ကိုင်စားနေတာက နှစ်လုံးထီ ရောင်းနေတာနော်၊ မင်းကိုငါ ရဲလက်ထဲ အပ်လိုက်မှာနော်။ ဒါပဲ (၃)ရက်အတွင်း မင်းနောက်ဆုတ်ပါ။ ဒီမြို့က ထွက်ခွာသွားပါ။ နောက်ထပ်မင်း ချစ်စုမရဲ့ နောက်မှာ မြင်ရင် မင်းထောင်ထဲ ရောက်ပြီသာမှတ်ပါ”
ကျွန်တော်ပြောပြီးနောက် ၀င်းမင်း ပျောက်ကွယ်သွားပေသည်။
ချစ်စုမကတော့ မျက်ရည်လည်ရွှဲနဲ့ “ ဦး မကောင်းဘူး--ဦးက လူကြမ်းကြီးပဲ၊ အားလုံးကို ဦးက အနိုင်ယူတာပဲ---သမီး စကားကို လုံးဝ နားမထောင်တာ ဦးတကယ်သမီးကို မချစ်လို့ပါဦးရယ်---သမီးကို ချစ်ရင် နားလည်ပေးပါလို့ ပြောထားရဲ့သားနဲ့၊ ခုတော့--ခုတော့ ၀င်းမင်း တခြားမြို့ကို တကယ်ထွက်သွားပြီ။ သမီးကိုလည်း တကယ်စိတ်နာသွားပြီ၊ ခွဲရက်လိုက်တာ ဦးရယ်၊ ခွဲရက်လိုက်တာ--”
အိပ်၍ မပျော်သော သူသည် ညတာရှည်၏။ မျှော်လွန်းရသောသူသည်လည်း အချိန်တွေက အကုန်မြန်သည်ဟု ထင်ရပါသည်။ ချစ်စုမက ကျွန်တော့်အလုပ်နှင့် ကျွန်တော်၏ ရင်ခွင်မှ ပြေးထွက်သွားသည်မှာ (၃)လသာသာ ရှိသွားပေပြီ--။
ကျွန်တော်ဇရာအို အချစ်ရူးကြီးမှာဖြင့် သူတစ်နေ့သော် ပေါ်လာနိုး၊ ပေါ်လာနိုးဖြင့် ဆံတို ဂုတ်ဝဲလေးတွေ စက်ဘီးစီးလာတိုင်း ချစ်စုမများ ဖြစ်လေမလား၊ ဖြစ်လေမလားရယ်နဲ့ ကြည့်ရတာ၊ လွမ်းရတာ၊ တမ်းတရတာ အမောပါ။
ချစ်စုမနဲ့ သစ္စွာ ကတိတွေပြုခဲ့ကြတဲ့ ရာဇမုနိ ဘုရားကိုလည်း အင်္ဂလိပ်လဆန်း (၁)ရက်နေ့(၁၆)ရက်နေ့ ညနေတွေမှာ သွားသွားပြီး မျှော်ရတာလဲ အမောတကောပါပဲ။ မျှော်လေတိုင်း ဝေးရပါပြီ ချစ်စုမရယ်..။
ဇူလိုင် ၁၆ ရက်က ကျွန်တော်၏ အချစ်မျှော်မှန်းချက် ပန်းတိုင်ကြီးအား ယိမ်းယိုင်တွန်းလှဲ နင်းခြေခံလိုက်ပါပြီ…။
ထုံးစံအတိုင်း ၁၆ ရက်နေ့ ညနေတိုင်း ရာဇမုနိ ဘုရားသို့ ကျွန်တော် ရောက်မြဲ၊ တစ်နေ့သော် သူလာလေမလား စိတ်ဖြင့် မျှော်ကိုးပြီး သွားစောင့်ခဲ့မိပါသည်။
ချစ်စုမကတော့ ပေါ်မလာခဲပါ။ မမျှော်ဘဲ ပေါ်လာသူက ၀င်းမင်းဆိုတဲ့ ကောင်လေး တစ်ယောက်တည်းသာ --ကျွန်တော့်ဘေးမှာ အသာအယာထိုင်ပြီး စကားဆိုပါတော့သည်။
“ ခင်ဗျားကြီး ချစ်စုမကို စောင့်မျှော်နေတာ မဟုတ်လား၊ ခု ခင်ဗျားကြီး ပြောတော့ ခင်ဗျားတို့ ချစ်နေကြပြီဆို၊ ဟုတ်စ--ယခုတော့။ ခင်ဗျားကြီး ဘာတတ်နိုင်သေးလဲ--ချစ်စုမက ကျုပ်လက်ထဲ ရောက်နေပါပြီ--တော်တော်ဆိုးတဲ့ လူကြမ်းကြီးပဲ--ချစ်စုမကို ရအောင် ခင်ဗျားကြီး ဇွတ်အတင်း အဓမ္မ မတော်တရား ကြံစည်လို့ သူခင်ဗျားတို့ စက်ရုံက အလုပ်ထွက်လိုက်ရသတဲ့။ ဟုတ်လား၊ တော်တော်မိုက်ရိုင်းလိုက်တဲ့ ဓနရှင် လူဂုဏ်တန်ကြီးပါလားဗျာ။”
ဝင်းမင်းရဲ့ စကားသံတွေသည် ကျွန်တော်၏ နားထဲသို့ သံရည်ပူတွေနဲ့ လောင်းချလိုက်သလို ခံစားသွားရပေသည်။ ခေတ္တခဏ တစ်ကိုယ်လုံး ကျောက်ဆစ်ရုပ်များ ဖြစ်သွားလေမလားဟု ခံစားရလိုက်မိ၏။ အချစ်ကြီးရင် အမျက်ကြီးဆိုသည်မှာ မှန်ပါပေသည်။ သတိထားပြီး ပြန်ပြောရတဲ့စကား…
“ မင်းကို--ချစ်စုမက ဒီလိုပဲ ပြောသလားကွာ--ပြောခဲ့ရင် သူပြောသလိုပဲ ထားလိုက်ပါတော့ မောင်ဝင်းမင်းရယ်---။ ဟုတ်ပါတယ်--ဟုတ်ပါတယ်--ဦးက မင်းတို့ နှစ်ဦး အတွက် လူကြမ်းကြီးပါ။ လူကြမ်းကြီးပါကွာ--ဦးကို ခွင့်လွှတ်ကြပါနော်--။-”
ကျွန်တော်သည် ပြောပြောဆိုဆိုဖြင့် ရာဇမုနိ ဘုရား ရင်ပြင်ပေါ်မှ ပြေးဆင်းလာခဲ့၏။ ဇရာအို အချစ်ရူးကြီး၏ မျက်ရည်သည် ရာဇမုနိလု ဆုတောင်းပြည့် ရင်ပြင်တွင် မကျစကောင်းပါ၏။
“ရက်စက်ပါပေ့ ချစ်စုမရယ်--မင်းရဲ့အချစ်တွေအပေါ် ဘ၀နဲ့ သိက္ခာကို မျက်ကွယ်ပြု၊ ပတ်ဝန်းကျင်ကို စိန်ခေါ်၊ မိသားစုကို လက်တွဲဖြုတ်ပြီး ငါအချစ်ပြေးသမား ဇရာအိုကြီးကို မင်းတို့တစ်တွေ အရူးလုပ်၊ အနိုင်ယူသွားကြပြီပေါ့ကွယ်……..။

* ချစ်စုမရေ---
အချစ်ဆိုတာ သူများတွေ ပျော်စရာလို့ဆို၊ ဒို့ရင်ထဲက အလိုလိုငိုနေမိ---
အဖြေမှန်သိရက်နဲ့လဲ--မကြည့်ရက်--မကြားလို၊ ချစ်သက်ထားရဲ့ ပါးပြင်မှာလဲ မျက်ရည်တွေ ချောင်းစီးလို့ နေပါရောလားကွယ်…။

* အချစ်မှာ မျက်စိမပါ၊ ဦးနှောက်မရှိ၊ ဦးနှောက်နဲ့ အချစ် အပြေးပြိုင်ကြည့်ပါလား--အချစ်ရဲ့ နောက်မှာ ဦးနှောက်ကျန်ခဲ့။

*အချစ်လိပ်ကလေးနဲ့ အချစ်ကိုရွှေယုံ--
င့ါလက်ခုပ်ထဲက အောင်ပွဲ---နထင်မရှိဘဲ
ကိုရွှေယုံ တရေးအိပ်
တိတ်တိတ်ကလေး အချစ်လိပ်မလေး… ပန်းဝင်သွား
ဒါ..ဂန္တ၀င် အချစ်ပြေးသမား..။

*သနားချစ် ချစ်လို့ ဖားကို မြွေမမြိုခဲ့မိတာ၊ ခုတော့ မြွေအ လို့ဆို၊ မော်ဒန်အချစ်နဲ့စုံကန်ပြေး..
ချစ်သက်ထားလေးနဲ့ ဝေးကြရတော့မှာလားကွယ်---
ကိုယ့်ရင်ထဲမှာ ငိုပွဲ ရွှေရင်တွေ ဆို့လို့နေဆဲ…
“အို” အချစ်ကလေးရယ်…
သဲသဲမဲမဲရွာနေတဲ့ မိုးရေတွေထဲမှာ….“ ဒို့ ” မျက်ရည်ဝဲ..၀ဲ..၀ဲ…..။ ။





(အငယ်လေးကို ချစ်ခဲ့မိလို့….အမှတ်(၂) ကိုဆက်လက်ဖေါ်ပြပေးပါဦးမည်။)

ရွှေလမ်းငွေလမ်းဝင်းကြည်

စာမူခွင့်ပြုချက်အမှတ်-5015710611
2007ခုနှစ်မေလတွင်ထုတ်ဝေပါသည်။

xxxxxxxxxxxxxxxxxxxx xxxxxxxxxxxxxxxxxxx xxxxxxxxxxxxxxxxxx

Penulis : shwelannwelanwinkyi ~ Sebuah blog yang menyediakan berbagai macam informasi

Artikel အငယ်လေးကို ချစ်ခဲ့မိလို့ (၁) ini dipublish oleh shwelannwelanwinkyi pada hari Friday, May 22, 2009. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan အငယ်လေးကို ချစ်ခဲ့မိလို့ (၁)