ရွှေလမ်းငွေလမ်း ၀င်းကြည်
တောင်ကွယ်မှာ နေညိုလေတိုင်း ကျမျက်ရည် ၀ိုင်းစို့စို့နဲ့ မှိုင်းမို့မို့ လွမ်းလို့ကျန်။
လူ့ဘ၀ဆိုသည်မှာ တနေ၀င်၊ တမိုးချုပ်ပြီး ဟိုနေ့၊ ဒီနေ့၊ မနက်ဖန်ဟုတ်နိုးနိုးဖြင့် မိုးချုပ်ညပေါင်း များခဲ့ပေပြီ။ ဤသို့ မည်သူမျှ မတွေးမိကြပါ။ လူ့ဘ၀ရဲ့ အတိတ်က အရိပ်တွေကို ဟို-ရခိုင်ရိုးမ တောင်ကြီးမှာ နေကွယ်လေတိုင်း၊ ကျမျက်ရည် ၀ိုင်းစို့စို့နဲ့ မှိုင်းမို့မို့ လွမ်းလို့ကျန်ပြီး မုန်းချောင်းရေစပ်မှာ နေ့စဉ်လွမ်းနေရသူက ကိုဖုန်းမောင်ပါ။
ကိုဖုန်းမောင်သည် မုန်းဆည် စီမံကိန်းမှ ကားဒရိုင်ဘာတစ်ယောက်ဖြစ်သည်။ မနှစ်က မိုးတွင်းရာသီမှာ တာဝန်နှင့် ရောက်ရှိလာသည်။ တစ်သက်နှင့် တစ်ကိုယ် တောတောင်စိမ့်စမ်း မုန်းချောင်းရေတွေ ဒလကြမ်းစီးဆင်းနေသည့် စေတုတ္ထရာမြို့နယ်ကဲ့သို့သော နေရာမျိုးကို အိပ်မက်ပင် မမက်ဖူးခဲ့ပေ။ ယခုတော့ ပျော်ရာမှာ မနေရ၊ တော်ရာမှာ နေရမှာမို့ ကိုဖုန်းမောင် ဘာမှ မတတ်နိုင်ခဲ့ပါ။ တော်ရာမှာ ပျော်အောင်နေဖို့ ကိုဖုန်းမောင် အတန်တန်ကြိုးစားခဲ့သည်။ ပျော်ရွှင်ခြင်းဟူသည် အသည်းနှလုံးမှ လာ၏။ အသည်းနှလုံးမှာ ဒဏ်ရာ ၊ ဒဏ်ချက်များစွာနဲ့ ပြည့်နှက်နေသော ကိုဖုန်းမောင် နေ့စဉ် အရက်သောက် ဖြေဖြောက်နေရာမှ တပါး အခြားမရှိပေ။ အရက်များများမူးလေ အတိတ်က အရိပ်တစ္ဆေတွေပို၍ပို၍ လိုက်လာလေသလား။
ငယ်နာမည် ငဘုန်းဟု တစ်ရွာလုံး သိကြ၏။ ငယ်ငယ်ကတည်းက မိဘများ မရှိခဲ့ပါ။ မိဘများမှာ တစ်ဦးတည်းသော သား ငဘုန်းကို မွေးဖွားခဲ့ပြီး ဆုံးပါးခဲ့၍ လောကအလယ် တစ်ကောင်ကြွက် ဖြစ်ခဲ့ရရှာသည်။ ဘဒွေးး၊ ဒွေးကြီး၊ ဒေါ်ကြီး၊ ဒေါ်လေးများ အိမ်မှာ တလှည့်စီ ကြီးပြင်းခဲ့ရ၏။ ပညာမှာ အလယ်တန်းအောင်ပြီး ခါးပြတ်ခဲ့ရသည်။ ဇာတိရွာမှာ မိုးခေါင်ရေရှား ကန်ရေသောက် မြက်ခြောက်နွားစား မင်းကန်ဘို့ ရွာသားစစ်စစ်ဖြစ်၏။
ကံကောင်းထောက်မ၍ ရွာနှင့်မြို့ လာပြီး လိုင်းဆွဲသော ကားဆရာက ငဘုန်းကို စပယ်ယာအလုပ် အသုံးချသည်။ ငဘုန်းမှာ အမြဲပြုံးစစ မျက်နှာနှင့် အလုပ်တွင် မခိုမကပ်၊ မဟုတ်မခံ၊ ဆတ်ဆတ်ကြဲလူစား၊ အသားညိုညို၊ အရပ်ပုကွကွဖြင့် လူတကာ ချစ်ခင်ကြသည်။ စပယ်ယာအလုပ် မအားလပ်သည့် ကြားမှ ဆွေမျိုးတကာ ဘုံကျွန်အဖြစ် အချိန်လွန်သည်အထိ ရေခပ်နွားစာစဉ်း မပျင်းမရိ နေ့စဉ် အချိန်ပို ဆင်းပေးရရှာသေးသည်။
မိဘမဲ့ ငဘုန်းရှင်ပြုတော့ ဟိုဆွေမျိုးက ထုတ်နိုးနိုး၊ သည်ဆွေမျိုးက ထုတ်နိုးနိုး ၊ နောက်ဆုံး ကျောင်းထိုင်ဆရာတော်ထံ ငွေဝတ္ထုကပ်ပြီး သင်္ကန်းပရိက္ခရာ တစ်စုံတည်းဖြင့် ကိုရင်ဖြစ်ခဲ့ရသည်။ မိမပါ၊ ဘမပါနှင့် ငဘုန်းခမျာ မျက်ရည်ဝိုင်းစုိ့ပြီး သင်္ကန်းတောင်းတောင် ပီသအောင် မဆိုရှာနိုင်ခဲ့ပေ။
(ရှင်လိန်ပြန်တော့ --ငယ်သူငယ်ချင်း -ခင်ဝင်းမက ပြေးလို့ကြိုခဲ့တာ--) ငဘုန်းသတိရနေလျှက်ပါ။ ခင်ဝင်းမက ဈေးသည် မြို့တက်ဈေးဝယ်၏။ ငဘုန်းက ကျောင်းနေဘက်၊ သူငယ်ချင်းကားစပယ်ယာ လူငယ်သဘာချစ်ခဲ့ကြရတာ ဘာတစ်ခုမှ မဆန်းပါ။ သို့သော် လောကမှာ ချစ်တာ တစ်ခုတည်းနှင့် အရင်း ပြုလို့ မရနိုင်ဘူး မဟုတ်ပါလား၊ သုံးနှစ် သုံးမိုး ချစ်ခဲ့ကြသော်လည်း ငဘုန်းမှာ ပစ္စည်းမဲ့ဘ၀ အခြေတကျ မရပ်တည်နိုင်သေးပေ။
ခင်ဝင်းမရဲ့ မိဘများက ရွာမှ ကုန်သည်ကြီးများဖြစ်၏၊ အခြေအနေမဲ့ ငဘုန်းအား လုံးလုံးသဘောမတူကြပါ။ အမျိုးမျုိုးခွဲကြကာ နောက်ဆုံး မိဘသဘောတူသော သူဌေးသား တစ်ဦးနှင့် ခင်ဝင်းမအား နေရာချထား၏။ ခင်ဝင်းမခင်ဗျာ ငဘုန်းအား မချစ်ခဲ့ရရှာ၍ လွတ်ရာ လွတ်ကျောင်း ရိပ်သာကျောင်းများသို့ ပြေးခဲ့၏။ နောက်တော့ တရား အရသာကို အပိုင်သိသွားပြီး ရှုပ်ထွေးပွေလီ လှသည့် လူ့ဘ၀ကြီးအား ငြီးငွေ့လျှက် အပြီးတိုင် သီလရှင်ဝတ်သွားလေတော့သည်။ ငဘုန်းကတော့ လောကအလယ်မှာ ခပ်ပြုံးပြုံးနဲ့ တောမှ မြို့သို့ ထွက်ခွာခဲ့ရပေတော့သည်။
ဘ၀မှာ ငွေမရှိလို့ ငယ်ချစ်ဦးကို အရူးအမူးစွဲခဲ့ရသော ကိုဘုန်းမောင် မြို့ကြီးကို ကားဒရိုင်ဘာဘ၀နှင့် ရောက်လာခဲ့ပေသည်။ လိမ္မာယဉ်ကျေးစွာဖြင့် ရသမျှငွေကို ဘ၀နာ၍ စုလာခဲ့၏။ ငဘုန်းဘ၀မှ ကိုဘုန်းမောင်ဘ၀သို့ တစ်ဆင့် တက်လာခဲ့ပေသည်။ ဌာနတစ်ခုမှာ အရာရှိ တစ်ယောက်၏ ဒရိုင်ဘာ ဖြစ်ခဲ့၏။(သူကြီးထက် သူကြီးနောက်က ချစ်တင်ကို ကြောက်ရတယ်)လို့ ရွာတုန်းက ကြားခဲ့ရသော စကားမှန်ပေသည်။ ယခုတော့ သူကြီးနောက်က ကိုဘုန်းမောင်ဖြစ်၍ တွေ့သမျှ ဆက်ဆံသမျှ သူများမှာ ပြုံးရောင်သမ်းနေကြပေတော့သည်။ လိုတာရှိရင် ပြောပါနော် အစ်ကိုတဲ့ -မှတ်ရော--။
ခင်ပပမြိုင်သည် အထက်တန်း စာရေးမ တစ်ယောက်ဖြစ်၏။(လိုတာရှိရင် ပြောပါနော် အစ်ကို)လုိ့ ဒရိုင်ဘာ ကိုဘုန်းမောင်အား အမြဲပြုံးရောင်သမ်းနေရှာသည်။ ကိုဘုန်းမောင်ကလည်း လူပျိုသိုးဆိုတော့ ရင်ထဲမှာ ကလိကလိ ခံစားလာရပေသည်။ မကြာလှပေ။ ခင်ပပမြိုင်မှ ကိုဘုန်းမောင်ထံ ဖီလင်ရေမွှေး လက်ဆောင်ပေး ပါလေတော့သည်။ တောသားကြီး ကိုဘုန်းမောင် အရင်က ငယ်ချစ်ဦး၏ အချစ်တွေ ခါဝါချပြီး ခင်ပပမြိုင်အား မတွေ့ရမနေနိုင် မထိုင်နိုင် ဖြစ်ရရှာတော့၏။ ချစ်ကြရှာပေတော့၏။
ကိုဘုန်းမောင်ဘ၀မှာ ငုဝါပန်းတွေနဲ့ မြိုင်ခဲ့ရပေပြီ။ ခင်ပပမြိုင်နှင့် လက်ထပ်ခဲ့ကြသည်မှာ နှစ်နှစ်ပြည့်၍ သမီးငယ်လေး၏ တစ်နှစ်မွေးနေ့ ကျင်းပနေကြပေပြီ။ ခင်ပပမြိုင်က ရုံးသွား၊ ကိုဘုန်းမောင်က သူ၏ ဆရာ နိုင်ငံခြားသို့ ထွက်သွား၍ နယ်စီမံကိန်းတစ်ခုသုိ့ ကားမောင်းနေရတော့၏။ အချိန်တွေအား နေ့ရက်တွေနဲ့ အသက်များမှ တစ်ရက်မှ မနားဘဲ ၀ါးမြို၍ ကုန်ခဲ့လေပြီ။ သမီးငယ် ခင်ဘုန်းမြိုင်၏ တတိယနှစ်မွေးနေ့ပင် ဖြစ်ပြန်ပါပြီလား။
သမီးရဲ့ တတိယနှစ် မွေးနေ့မှာ ချစ်ဇနီး ခင်ပပမြိုင်နှင့် မမျှော်လင့်ဘဲ စာရင်းရှင်း လမ်းခွဲခဲ့ရပေပြီ။ ဖြစ်ရပုံမှာ (မောင်-- မြိုင်တစ်ခု ပြောခဲ့ပါရစေ၊ ခွင့်ပြုရမယ်နော်၊ သမီးလေးအတွက် မြိုင်နိုင်ငံခြားသွားပြီး အလုပ် လုပ်ဖို့ စီစဉ်ပြီးပြီ)
ကိုဘုန်းမောင် ဒေါသထွက်၍ တဆတ်ဆတ်တုန်နေပြီ။ တစ်သက်လုံး မမျှော်လင့်သော စကားကို ကြားလိုက်ရ၍ အသားတွေ တဆတ်ဆတ်တုန်အောင် ခံစားနေရ၏။ ဘာမဆို မြိုင်သဘောထားခဲ့သော ကိုဘုန်းမောင် ကယောင်ကတမ်း ဖြစ်ရရှာ၏။
“ဘာပြောတယ် မြိုင် နိုင်ငံခြားသွားမယ် ဟုတ်လား၊ မြိုင်တို့ ကိုယ်တို့ ဘ၀မှာ အစစ ဘာပူစရာရှိလဲ၊ သမီးလေး မျက်နှာလည်း ကြည့်ပါဦးကွာ၊ မိသားစု ဥမကွဲ ၊ သိုက်မပျက် နေရတာ၊ အိမ်ထောင်သည်တိုင်းရဲ့ အရသာ တစ်ခုဆိုတာ မင်းနားလည်စမ်းပါ”
“ အို မြိုင်ကလည်း မိသားစု ကောင်းစားရေးအတွက် လုပ်တာပဲ အစကတည်းက မြိုင်ရဲ့ အစ်ကိုတွေ၊ အစ်မတွေ နိုင်ငံခြားမှာ အလုပ်လုပ်နေတာ မောင်သိသားပဲ၊ မောင်ရဲ့ ကားဒရိုင်ဘာ အလုပ်နဲ့ လူစဉ်မမှီပါဘူး၊ နိုင်ငံခြားကအမေနဲ့ အစ်ကိုတွေ အစ်မတွေက မောင်ဘာလုပ်လဲမေးတော့ အခုထိ မောင့်ကို အရာရှိ တစ်ယောက်လုိ့ မြိုင် ညာပြောခဲ့တာ သိလား”
ကိုဘုန်းမောင် တစ်ကိုယ်လုံး ကျဉ်ကနဲ ခံစားရသည်။ ကားဒရိုင်ဘာ ဆိုတာ လွယ်လွယ်လေး ရတဲ့ငွေ မဟုတ်ပါ။ ကားဒရိုင်ဘာမှာ ငွေတွင်း မရှိပါ။ သေတွင်းထဲက လက်နှိုက်ပြီး လုယူရှာဖွေ နေရတာ မသိကြလို့သာ ယခုလို ပြောကြသာဖြစ်မည်။
“ အိုကွာ--ငါအိမ်ထောင်ဦးစီး ယောကျာ်း တစ်ယောက်အနေနဲ့ မသွားရဘူးကွာ ဒါပဲ”
“ ရှင် ဒီလို ပြောမယ် ဆိုတာ ပပမြိုင်က သိပြီးသား၊ ဒီတော့ ခွင့်မပြုရင် ကွာရှင်းလက်မှတ် ထိုးပေးပါ။ ရော့ ဒီမှာ စာချုပ်။ ရော့ ဒါရှင့်ဆရာ နိုင်ငံခြားက ရေးပေးတဲ့ စာ ဖတ်ကြည့်ပါ”
ကိုဘုန်းမောင် လက်များ တုန်ရီစွာနှင့် အသည်းနှလုံး တွေလည်း တစ်စစီ အရေကွာကျကုန်ပေပြီ။ အသည်းလွင်ပြင်မှ ဒေါသမီးမုန်တိုင်းတွေ လှိုင်းထ တုန်ခါ ဂယက်ရိုက်၍ ပလောင်ဆူ သည့်အထိ သူ ခံစားနေရပေတော့သည်။
သို့
မောင်ဘုန်းမောင်
ကျေးဇူးတင်စွာနဲ့ ဒီစာကို ရေးလိုက်ပါတယ်။ ခင်ပပမြိုင်ကို ကွာရှင်းလက်မှတ် ထိုးပေးလိုက်ပါ။ ပြောရမှာ အားနာလှပါတယ်။ သမီးလေး ခင်ဘုန်းမြိုင်ဟာ ဆရာရဲ့ ရင်သွေးလေးပါ။ အခုအထိ မောင်ဘုန်းမောင်တို့ မြိုင်နဲ့ သားသမီး မရဘူး မဟုတ်လား။
မောင်ဘုန်းမောင်ရဲ့ မြိုင်ကို သဘောထားကြီးကြီးနဲ့ ဆရာ ပြန်လက်ခံမှာပါ။ ဆရာရဲ့ ရန်ကုန်က ဇနီးကြီးလည်း ဆုံးပြီ၊ သားတွေ သမီးတွေကိုလည်း အမွေ ခွဲပေးပြီးပြီ။
သမီးလေးနဲ့ မြိုင်ကိုလည်း.. အချိန်တန်ပြီုဖစ်လို့ ဆရာ့ထံ ပြန်ပေးပါတော့ကွယ်။ မောင်ဘုန်းမောင် ကြိုက်သလောက် ကျေးဇူးတွေ ဆပ်ပါ့မယ်။
မျှော်နေလျက်
ဆရာ (အမေရိကန်)
ကိုဘုန်းမောင် တစ်ယောက်မှာ ပဋာစာရီကဲ့သို့ သားငယ်ကို စွန်ချီ၊ သားကြီးက ရေမျော၊ လင်တော်မောင် မြွေခဲ၍ သေပွဲင်လို့ ပဋာစာရီ မြေမှာလူး အရူးကြီးဖြစ်သလို ကိုဘုန်းမောင် မဖြစ်ရလေအောင် ယောက်ျားမာနနဲ့ မာန်ကို တင်းခဲ့ရပါသည်။ ပပမြိုင် လိုချင်တဲ့ စာချုပ်တွေကို အသည်းနှလုံး ဗလာမဲ့စွာနဲ့ လက်မှတ် ရေးထိုးပေးခဲ့လေပြီ။
ရက်စက်စွာဖြင့် ပပမြိုင်မှာ လိုချင်တာ ရ၍ ကြိုတင် စီစဉ်ထားသည့်အတိုင်း သမီးလက်ကိုဆွဲကာ ဒုန်းစိုင်း၍ ပြေးပေတော့သည်။ သမီးငယ် ခင်ဘုန်းမြိုင်လေး၏ ဆူညံစွာ ငိုသွားသော အသံမှ တစ်ပါး ကိုဘုန်းမောင်ဘာမှ မကြားရတော့ပေ။ ရက်စက်ကြပါပေ့။ ခင်ပပမြိုင်နဲ့ ဆရာတို့ရယ်….။ ရိုးသားလှသော ဘုန်းမောင် တစ်ကောင်ကြွက် ပစ်တိုင်းထောင် အရုပ်ကို ကြိုးရှုပ်အောင် လုပ်သွားရက်ကြပေသည်။
အို--အချစ်ဆုံးတို့ရေ အလွမ်းတွေကိုစမ်းရေထဲမျောာလိုက်မယ်--အလွမ်းတွေကို ပန်းလှေဖွဲ့ မျောလိုက်မယ်-အလွမ်းတွေကို မိုးတိမ်ထဲ မျောလိုက်မယ်--သူများတွေ ရေးကြ၊ ဆိုကြ၊ ငိုကြ၊ လွယ်လွယ်လေး ထင်ခဲ့တယ်။
ကိုယ်တွေ့ဆိုရင် ပိုလုိ့ ယုံမှာလားဟင်…တကယ်လွမ်းရပြီဟေ့ ဆိုရင် တားမရ ဖြေမဆည် အသည်းနှလုံးတွေ တစ်စစီ ကြွေပြီပဲဆိုရမလား--အဖြစ်သဲပြီး ချစ်သည်းစားမလဲနိုင်သူတွေဟာ--- ကိုယ်ချစ်ခဲ့ရတဲ့သူတွေကိုသာ တမ်းတမ်းတတ မှန်းဆလို့ တမြေ့မြေ့ကျွမ်း၊ တငွေ့ငွေ့လွမ်းပြီး တောင်ကွယ်မှာ နေညိုလေတိုင်း ကျမျက်ရည် ၀ိုင်းစုိ့စို့နဲ့ မိုင်းမို့မို့ လွမ်းလို့ကျန်………..။
လွမ်းလို့ကျန်… တစ်ကောင်ကြွက် အထီးကျန်ဆန်လှတဲ့ ကိုဘုန်းမောင်အသည်းကို အရက်ထဲမှလည်း ဆွဲထုတ်တော့မည်။ အများနဲ့မတူ အလွမ်းနုနာကျနေတဲ့ အသည်းပန်း တစ်စီစ တစ်စီစီတွေကို ပြန်လုိ့ ပန်းသီဖွဲ့ပြီး ဤမုန်းချောင်း ရေကြည်အေးလေးတွေနဲ့ ဆေးကြောပေးလိုက်ရစေလား၊ ဘုန်းမောင်ရဲ့ အချစ်တွေကိုလည်း ဒီ…မုန်းချောင်းရေနဲ့ ဆေးလိုက်ပါရစေတော့။
ရွှေလမ်းငွေလမ်း ၀င်းကြည်
(၁၉၉၇)ခုနှစ်၊ ရုပ်ရှင်စတားရသစုံမဂ္ဂဇင်းတွင်ဖေါ်ပြပြီး။
ဝန်ခံချက်။ ။ဤ၀ထ္ထုတိုအားစတင်ရေးသားပါသည်။ပထမအကြိမ် အရွေးခံခဲ့ရပါ၏။
1 comments:
hello
I am ko Hpone Maw Swe
How can I connect to writer.
please help how to get connection.
thanks
Post a Comment