အခြေခံအထက်တန်း စာမေးပွဲဖြေဆိုရက်တွင်
မကွေးမြို့နယ်၊ ရှားပင်လှကျေးရွာ အိမ်ခြေ(၂၆) လုံး မီးလောင်
မကွေး မတ်လ(၁၃)ရက်။
` မီးစလောင်တာက နံနက်စောစော ငါးနာရီခွဲ လောက်မှာပါ..။ ကိုသန်းထွန်းအိမ်က စတင်လောင်တာပါ။ အိမ်မှာက ကိုသန်းထွန်းနဲ့ သူ့သမီးတစ်ယောက်ပဲရှိတာ၊ ကိုသန်းထွန်းရဲ့ သားက (၁၀)တန်းစာမေးပွဲဖြေဖို့ မကွေးမြို့ကိုသွားနေပါတယ်။ ကိုသန့်ထွန်း မိန်းမကလည်း သူ့သား(၁၀)တန်းကျောင်းသားနဲ့ အတူ မကွေးမှာ ရောက်နေကြတယ်။ အဲဒါ နံနက်စောစော အာလူးထားတဲ့ တဲထဲကို ဖယောင်းတိုင် ထွန်းပြီးဝင်တယ်။ အဲဒီတဲက ထန်းလက်တွေကိုမိုးထားတာလေ ၊ အဲဒီအမိုးထန်းလက် ကို မီးစွဲသွားတယ်လို့ သိရပါတယ်။ သူတို့ သားအဖနှစ်ယောက် က မကွေးကိုသွားမဲ့ နံနက်စောစော ရွာကနေထွက်တဲ့ ကားကိုမှီအောင် အားလူးတွေကို ပီနံအိပ်ထဲ အရေးတကြီးသွပ်လိုက်တယ်ထင်ပါတယ်။ ဒီအာလူးကို ရောင်းပြီးမှ မကွေးက (၁၀)တန်းဖြေနေတဲ့ သားဆီကို ငွေပေးရမှာပါ. ဗျာ။ ယခုတော့ သူ့အိမ်ကစလောင်လိုက်တာ ကျွန်တော့်အိမ်လဲ ပါသွားပါတယ်´´ဟု မီးထဲပါသွားခံရသူ ရွာသားတစ်ဦး အသက်(၆၀)ခန့်ရှိသူက ပြောဆိုပါသည်။ `` အဒေါ်က…..၊ အသက်(၆၀)ကျော်ပါ။ သားရဲ့အိမ်မှာ အတူနေရတာပါ။ သားက အိမ်ဆောက်ပြီးတာ (၂/၃) ရက်ပဲရှိပါသေး တယ်။ ယခုလာမယ့် တပေါင်းလပြည့်ကျော်(၈)ရက်နေ့ မှာ အိမ်တက် ပရိတ်တရားနာဖို့ စီစဉ်ထားပြီးသားပါကွယ်..။ ယခုတော့ အိမ်တစ်ဆောင်လုံး မီးထဲပါသွားတယ်။ ရှိတဲ့ ပစ္စည်းတွေလဲ ဘာတစ်ခုမှ မရလိုက်ပါဘူး..။ ဒေါ်ကြီးတို့ ဘ၀ပျက်ပါပြီကွယ်…၊ ဟီး ဟီး´´ ဟု ငိုကြီးချက်မ၊ ရှိုက်ကြီးတစ်ငင် ပြောဆိုနေ၍ စိတ်ဆင်းရဲစွာဖြင့် သတင်းရယူခဲ့ပါသည်။
၁၃-၃-၂၀၁၂ နေ့ နံနက်(၅း၃၀) မိနစ်ခန့်တွင် မကွေးခရိုင်၊ မကွေးမြို့နယ်၊ ရှားပင်လှကျေးရွာမှာ ဦးသန်းထွန်း အိမ်မှ စတင် မီးလောင်သည်။ (၆း၂၀) မီးညွှန့်ကိုထိမ်းနိုင်ပြီး (၆း၄၅)နာရီ တွင် မီးငြှိမ်းနိုင်သည်။ မီးသတ် ရေသည်ယာဉ်ကား(၆)စီး၊ အရံမီးသတ်ကား(၃)စီး၊ သံတေမီးသတ်တပ်သား(၁၅)ယောက်၊ အရံမီးသတ်တပ်သားများ(၅၀)ကျော် တို့ဖြင့် မီးငြှိမ်းသတ်ကြ သည်။ အိမ်ခြေ(၂၆)အိမ်၊ အိမ်ထောင်စု(၂၈)စု၊ ဒုက္ခသည် ၁၁၆ ယောက်၊ ဆုံးရှုံးမှုတန်ဘိုး (၃၄သိန်း ငါးသောင်း)ကျပ်ခန့်ဟု မကွေးမြို့နယ် မီးသတ်ဦးစီးဌာနမှ သိရှိရသည်။ (ပ) ၅၈/၂၀၁၂ ပုဒ်မ ၂၈၅ ဖြင့် အမှတ်(၂)ရဲစခမ်းတွင် တရားစွဲဆိုထား ကြောင်း သတင်းရရှိပါသည်။
ဝိုင်းကြည်အောင်
မြန်မာပို့စ် သတင်းဂျာနယ်မှာ ပေးပို့ထားပါသည်။
0 comments:
Post a Comment