http://winkyi.googlecode.com/files/SANY0026.JPG
မကွေးမြို့မှ SHADE စာပေ၀ိုင်း(၄၁)
၂၈-၈-၂၀၁၁ ၊တနင်္ဂနွေနေ့၊ နေ့(၁၂)နာရီမှ ညနေ(၃း၃၀)အထိ မကွေးမြို့၊ ဗိုလ်ချုပ်လမ်း က (လက်ရွေးစင် အအေးဆိုင်) မှာ ပေါင်းဆုံ ၀ိုင်းဖွဲ့ဖြစ်ကြပါတယ်။ ဒီတစ်ပတ် SHADE စာပေ၀ိုင်း(၄၁)ကြိမ်မြောက်ဖြစ်ပါတယ်။ ဒီတစ်ပတ် တက်ရောက်လာသူ ၀ိုင်းတော်သားများကတော့ ဆရာကြီး မကွေးဝင်းမြင့်၊ ပန်းချီဆရာမင်းသူ၊ ဆရာဇော်မင်းကြည်၊ ပန်းချီဆရာသူရိန်မြိုင်၊ ကာတွန်းဆရာ မောင်အေး(မင်းဘူး) (ခ) ဖရဲသီး၊ ပန်းချီဆရာမြင့်ဇော်ဦး၊ ဆရာနေခြည်(မကွေး)၊ ဆရာတင်လင်းဇော် နဲ့ စာရေးသူတို့ဖြစ်ကြပါတယ်။ စာပေ၀ိုင်းရဲ့ထုံးစံအတိုင်း လက်ျာရစ် တစ်ဦးချင်းပြောဆိုပါတယ်။ တစ်ဦးပြောဆိုပြီးတိုင်း သိလိုတာ၊ မေးလိုတာများ နဲ့ ကွဲလွဲတဲ့ သဘောထားအမြင်များကို မေးမြန်း ပြောဆိုဆွေးနွေးကြပါတယ်။ ဒီတစ်ပတ်တော့ ပြောဆိုဆွေးနွေး သူတိုင်းရဲ့ ပြောဆို ဝေဖန်မှုများကို နည်းနည်းနဲ့ ကျဲကျဲဝိုင်းပြီး တင်ပြပါရစေ..။
ဆရာကြီး မကွေးဝင်းမြင့် က စတင်ပြောဆိုပါတယ်။ ``လေးစားအပ်ပါသော စာပေမိတ်ဆွေများခင်ဗျာ..၊ အရင်တစ်ပတ်က အလွန်သည်းခံနိုင်စွမ်းရှိသော ဂျပန်ဘုန်းတော်ကြီးတစ်ပါး အကြောင်းကို တင်ပြဆွေးနွေးခဲ့ပါတယ်။ ထိုပုဂ္ဂိုလ်ကြီးများကို အတုယူပြီး သည်းခံခွင့်လွတ်တတ်တဲ့ အလေ့အကျင့်ပြုစုပျိုးထောင်မယ်ဆိုရင် အောင်မြင်မှုအကျိုးထူးကိုခံစားရမှာ မလွဲပါဘူး။ တစ်နေ့က စာပေမိတ်ဆွေတစ်ဦးနဲ့ သည်းခံခွင့်လွတ်ခြင်း အကြောင်းကို စကားစပ်မိကြတော့.. ထို မိတ်ဆွေက ပြောပါတယ်။ ဆတ်ဆတ်ထိမခံ ဒေါသကြီးသူဟာ ကလျာဏ မိတ်ကောင်း ဆွေကောင်းများဆုံးရှုံးတတ်ပါတယ်။ ဒါကြောင့် လင်္ကာလေးနဲ့ ဆိုပါတယ်။´´
`` ( မဟုတ်မခံ ခွန်းတုံ့ပြန်၊ မှန်သော်လည်းရှုံး၊ လူကြီးမုန်း၏။) လို့ သူကဆိုလာပါတယ်။ ကျွန်တော်ကတော့ ဒီလိုလေးပြောင်းပြီး ဆိုချင်ပါတယ်။ (ဆတ်ဆတ်ထိမခံ ခွန်းတုံ့ပြန်၊ ခင်မင်မှုလည်းဆုံး၊ လူများလည်းမုန်း၏..။) ထိုမိတ်ဆွေထံက ဒီလိုအဖိုးတန်တဲ့စကားလေးကို ကြားလိုက်ရတော့ ၀မ်းသာအားရ သူ့လက်ကိုဆွဲပြီး ကျေးဇူးတင်စကားပြောလိုက်မိပါတယ်။ ယခုကြွရောက်လာကြတဲ့ မိတ်ဆွေများလည်း အရာရာမှာ သည်းခံခွင့်လွတ်နိုင်ကြပါစေ ခင်ဗျား..။´´ လို့ ဆရာမကွေးဝင်းမြင့်က ပြောဆိုသွားပါတယ်..။ (ဆရာမကွေးဝင်းမြင့် ပြောကြားချက်ကို အများလက်ခံပြီး ပြန်လည်မဆွေးနွေးကြပါ။)
ပန်းချီဆရာမင်းသူကတော့ ဈေးကွက်ဂျာနယ်ထဲက စာရေးဆရာ သတင်းထောက် မကွေးဝင်းမောင် ရေးသားတဲ့ (ပဲဇင်းငုံ ပါတီ) ဆိုတဲ့ဈေးကွက် သတင်းဆောင်းပါးကို အကျယ်တ၀င့်ဖတ်ကြား ဆွေးနွေးပါတယ်။ အညာဒေသမှာ ပဲဇင်းငုံ ဈေးတွေ ကျနေကြောင်း၊ ပဲဇင်းငုံ တစ်တင်းကို ပိဿာ(၂၀) သတ်မှတ်ထားကြောင်း၊ ကုန်သည် ပွဲစားတွေက (ကောက်ပင်ရိတ်လှီး သီးနှံဝယ်ယူနည်း) နဲ့ တောင်သူလယ်သမားတွေဆီက ၀ယ်ယူနေကြတာကို အသေးစိတ် ရေးသားချက်များကို တင်ပြပြောဆို ဆွေနွေးသွားပါတယ်။ ပြည်ပပို့ကုန်ဈေးကျနေရင် အရှုံးခံပြီး မရောင်းကြဘဲ ပဲဇင်းငုံ ကိုပြည်တွင်းမှာသာ အရသာရှိရှိစားသောက်နိုင်တဲ့ နည်းပညာများရှာပြီး ၀၀လင်လင်စားသုံးနိုင်အောင် ဆောင်ရွက်လိုပါကြောင်း အသေးစိတ် အကျယ်တ၀င့်ရေးသားထားပါတယ်။ (ပန်းချီဆရာမင်းသူ ပြောကြားချက်များကို ဆရာမကွေးဝင်းမြင့်က ပဲဇင်းငုံစားရင် ဒူးနာပျောက်ကင်းကြောင်း၊ နှလုံးအားနဲ့ ကျောက်ကပ်တွေ အားကောင်းပါကြောင်း ဆွေးနွေးပါတယ်။ Shadeစာပေ ၀ိုင်းတော်သားများမှ သတင်းထောက် မကွေးဝင်းမောင် စာရေးကောင်းပြီး တော်ပါကြောင်း ထောက်ခံ ဂုဏ်ပြုကြပါတယ်။)
ဆရာဇော်မင်းကြည် ကလည်း စာရေးဆရာ ကိုကိုလတ်(ဆည်မြောင်း) ရဲ့ (ရွှေကြိုးနဲ့ ဒုံးမြင်း အပါဝင် ၀ထ္ထုတိုများ) စာအုပ်ကို အားနည်းချက်၊ အားသာချက်များကို အသေးစိတ် ထောက်ပြဆွေးနွေးသွားပါတယ်။ မူလက ရေးသားစဉ်က မဂ္ဂဇင်းတွေမှာ ၀ထ္ထုတစ်ပုဒ်ချင်းပါတော့ စာရေးသူရဲ့ အာဘော်တွေက မထပ်ဘူးထင်ရပါတယ်။ လုံးချင်းစာအုပ်အဖြစ် ၀ထ္ထုများတိုများကို ပေါင်းထုတ်လိုက်တော့ အာဘော်တွေက ထပ်တူတွေ များနေပါကြောင်း ထောက်ပြဆွေးနွေးသွားပါတယ်။ (ဆရာဇော်မင်းကြည် ပြောကြားချက်များကို ၀ိုင်းတော်သားများက ဆရာကိုကိုလတ်(ဆည်မြောင်း)ရဲ့ ရွှေကြိုးနဲ့ ဒုံးမြင်း ၀ထ္ထုတိုများဟာ အကြောင်းအရာများက(တိရိစ္ဆာန် အကောင်အသေးလေးတွေကို) ခံစားရေးသားတော့ သစ်လွင်ဆန်းသစ်ပြီး တော်တော်စိတ်ဝင်စားစရာကောင်းပါတယ်။ ဒါပေမယ့် ၀ထ္ထုထဲမှာ စာရေးသူမှ ၀င်ပြောတာတွေများနေပါကြောင်း ဆွေးနွေးကြပါ တယ်။)
ပန်းချီဆရာ သူရိန်မြိုင်ကတော့ ၂၀၁၁၊စက်တင်ဘာလထုတ်၊ အတွေးအမြင် မဂ္ဂဇင်းထဲမှ မုံရွာနေဇာ ရေးသားတဲ့ (လက်ဖက်ရည်ကြမ်းဝိုင်း ယဉ်ကျေးမှု) ဆောင်းပါးကို ဖတ်ကြားပြပါ တယ်။ စကားဝိုင်းတွေအကြောင်းပါ။ တစ်ချို့ဝိုင်းတွေက ပြောချင်သူတွေများတော့ စကားကိုလုပြောကြရပါတယ်။ တစ်ချို့ကြပြန်တော့ စကားပြောဆိုသူကနည်းပြီး ၀ိုင်းပြီးနားထောင်သူ တွေ က များနေကြပါတယ်။ နားထောင်မှ ပညာရပါ့မယ်။ ဝေဖန်တာကိုခံနိုင်မှ ကိုယ့်အမှားကိုသိနိုင်ပါတယ်။ ဒါမှ တိုးတက်အောင်မြင်ပါ့မယ်..။ စတဲ့ ကောင်းမွန်သော ဆောင်းပါးကို ဆွေးနွေးဖတ်ကြားပြသွားပါတယ်။ ( Shade စာပေ ၀ိုင်းတော်သားများမှ သူတို့က တစ်နေလုံးပင်ပမ်းသမျှကို ညနေပိုင်းရောက်ရင် စကားဝိုင်းဖွဲ့ကြပါတယ်။ ကျွန်တော်တို့ကတော့ တစ်ပတ်လုံးပင်ပမ်းနွမ်းနယ်သမျှကို ယခုလိုတစ်ရက် တနင်္ဂနွေနေ့တိုင်း စာပေ၀ိုင်းဖွဲ့ကြကြောင်း၊ ဒီ လက်ဖက်ရည်ကြမ်းဝိုင်း ယဉ်ကျေးမှု ဆောင်းပါးက Shade စာပေ၀ိုင်းကို အထောက်အကူပြုပါကြောင်း ပြောဆိုလက်ခံသွားကြပါတယ်။)
ကာတွန်းဆရာ ဖရဲသီးကလည်း `ကျွန်တော်က စာပေ၀ိုင်းကို စကားပြောတတ်လို့လာတာမဟုတ်ပါကြောင်း၊ ခေါင်းညိတ်ကောင်းလို့ တက်လာတာပါ..။´ လို့ သူရေးသားတဲ့ ကာတွန်းကွက်အတိုင်း သရုပ်ဆောင်ပြနေပြန်ပါတယ်။ (Shade စာပေ၀ိုင်းတော်သားများကလည်း သူတို့ပြောတာကို ခေါင်းညိတ်ပြီး နားထောင်ပေးတဲ့ ဖရဲသီးကို သူများထက်ပိုပြီး ခေါက်ဆွဲကျွေး လိုက်ပါတယ်။)
ပန်းချီဆရာ မြင့်ဇော်ဦးကတော့ `ခံစားမှုရသ ပန်းချီ´ခေါင်းစဉ်ပေးပြီးပြောသွားပါတယ်။ ကလေးဘ၀ကအတိုင်း ပန်းချီကိုဝါသနာပါခဲ့ကြောင်း ဒါကြောင့်လည်း ယခုပန်းချီဆရာဖြစ်လာရပါကြောင်း၊ အောက်ဒိုးထွက်ခြင်း အတွေ့အကြုံကို အနုစိတ်ပြောကြားပြပါတယ်။ အမြင် အတွေ့ ခံစားမှုများ ပေါင်းစပ်ပြီး ပန်းချီကားတစ်ချပ်ဖြစ်ပေါ်လာကြောင်း ရင်ဖွင့်ပါတယ်။ စာရေးဆရာ ကိုကိုလတ်(ဆည်မြောင်း)ရဲ့ (ရွှေကြိုးနဲ့ ဒုံးမြင်း ) ၀ထ္ထုတိုများစာအုပ် မျက်နှာဖုံးကို တော်တော်သဘောကျကြောင်း၊ အဲဒီအထဲက (ရှဥ့်တစ်ကောင်၏ မှာတမ်း) ၀ထ္ထုလေးကိုဖတ်ရတာဟာ `ခံစားမှုရသ ပန်းချီကားလေး´ တစ်ချပ်ကို ကြည့်နေရသလို မြင်နေရသလို ခံစားနေရတာ ဖြစ်ပါတယ်။ လို့ အသေးစိတ် ပြောဆိုသွားပါတယ်။
ဆရာနေခြည်(မကွေး) ကတော့ ကဗျာတစ်ပုဒ်နဲ့ ဆောင်းပါးတစ်ပုဒ်ကို ဖတ်ပြပါတယ်။ ဆောင်းပါးကတော့ရှင်ဆန္ဒာတိက ရွှေပါရမီတောရ ရေးသားတဲ့ (ငြိမ်းအေးသော ဘ၀ပိုင်ရှင်)စာအုပ်ထဲက (သူများနဲ့တိုင်းတာတော့ ရိုင်းမှာပေါ့..)ဆောင်းပါးကို ဖတ်ပြ သွားပါတယ်။ အထက်တန်းမာန်၊ အောက်တန်းမာန်၊ တန်းတူမာန်၊ မာန် သုံးမျီုးကို ခွဲချမ်းစိတ်ဖြာပြသွားပါတယ်။ မာန်ထွက်ဖို့မနိုင်းယှဉ်ပါနဲ့ ဥာဏ်တက်ဖို့သာ နိုင်းယှဉ်ကြပါ..လို့ နိဂုံးချုပ်ပါတယ်။ (ဘာကိစ္စ၊ ဘယ်နေရာမှာ ဘာပဲလုပ်လုပ် မာန်ချမှ ဟန်ကျပါမည်ဆိုတဲ့ မိုးကုတ်ဆရာတော်ဘုရားကြီး၏ ဆိုဆုံးမ စကားကို ကိုးကာ၍ Shade စာပေ၀ိုင်းတော်သားများက မှတ်သား မိလိုက်ပါကြောင်း ထောက်ခံကြပါတယ်။)
ဆရာတင်လင်းဇော် ကလည်း ကိုကိုလတ်(ဆည်မြောင်း) ရဲ့ (ရွှေကြိုးနဲ့ ဒုံးမြင်း) ၀ထ္ထုတိုစာအုပ်ထဲက (ရှက်သွေး)၀ထ္ထုတို ကို အသေးစိတ်ဆွေးနွေးပါတယ်။ ရွှေအမြုတေမဂ္ဂဇင်း မှာ ကလောင်သစ်တစ်ဦးအနေနဲ့ နှစ်လဆက်တိုက် ဖော်ပြခံခဲ့ရတဲ့ (ရှက်သွေး)၀ထ္ထုတို ဖြစ်ပါကြောင်း၊ ခွေးအုပ်စုများထဲက ဒုက္ခိတခွေးကျားလေးနေရာမှ ခံစားရေးသားထားပါတယ် လို့လည်း အထူးဖော်ပြထားပါကြောင်း ၊ ဆရာကိုတင်လင်းဇော်က ပြောဆိုသွားပါတယ်။ ( Shade စာပေ၀ိုင်းတော်သားများမှ ကိုကိုလတ်(ဆည်မြောင်း) ရေးသားတဲ့ (ရွှေကြိုးနဲ့ဒုံးမြင်း) အပါအ၀င် ၀ထ္ထုတိုများ စာအုပ်က မကွေးစာနယ်ဇင်းသမိုင်းမှာ မကွေးစာပေသမားများရဲ့ စာပေဂုဏ်ရောင်ကို ပိုမိုတောက်ပြောင် သွားစေပါတယ်လို့ ဂုဏ်ပြုပြောဆိုနေကြပါတယ်။)
စိတ် အဟာရပြည့်ဝအောင် SHADE ဂျာနယ်ကိုဆောင်လို့ ဘ၀အတွက် သုတ၊ရသစုံတဲ့ SHADE စာပေ၀ိုင်းသို့ သွားကြပါစို့..။
ရွှေလမ်းငွေလမ်းဝင်းကြည်
0 comments:
Post a Comment