Shade31
မကွေးမြို့မှ SHADE စာပေ၀ိုင်း(၃၁)
၁၉-၆-၂၀၁၁၊ တနင်္ဂနွေနေ့၊ နေ့(၁၂)နာရီ မှ ညနေ(၃း၃၀)အထိ မကွေးမြို့၊ ရန်ကျော်ရပ်၊ သုခီတာလမ်းနှင့် ပိတောက်လမ်းကြား FOREVER လက်ဖက်ရည်ဆိုင် ဥယျာဉ် မှာ ၀ိုင်းဖွဲ့ ပေါင်းဆုံကြပါတယ်။ SHADE စာပေ၀ိုင်း (၃၁)ကြိမ် ပါ။ ဒီတစ်ပတ် အထူးဧည့်သည်ကတော့ Prefect မဂ္ဂဇင်း နဲ့ အချစ်ဂျာနယ် မန္တလေးတာဝန်ခံ ဆရာဝိုင်း ရောက်လာပါတယ်။ မကွေးမြို့ မြို့ပြ မြင်ကွင်းကျယ် စာမူအတွက် ကုန်ကြမ်းလာယူတာလို့ သိရပါတယ်။ ဒီတစ်ပတ် SHADE စာပေ၀ိုင်းတော်သားများကတော့ ဆရာမကွေးဝင်းမြင့်၊ဆရာလွမ်းထား(မကွေး)၊ ဆရာဇော်မြင့်ဇော်(ဗန္ဓရ)၊ ဆရာညီဇေယျ (ခ) တက္ကသိုလ်ရည်ရွယ်၊ ပန်းချီဆရာမြင့်ဇော်ဦး၊ ဆရာနေခြည်(မကွေး) နဲ့ စာရေးသူတို့ဖြစ်ကြပါတယ်။
Shade ဂျာနယ်၊ အတွဲ(၅)၊ အမှတ်(၂၈) မှာ ဆရာမင်းချမ်းမွန် က မကွေးမြို့မှ SHADE စာပေ၀ိုင်းကို ဖတ်ပြီး ရွှေအမြုတေစာပေဆုပေးပွဲကြီး ပြီးတဲ့နောက် ရန်ကုန်မြို့မှ ရေးသူ ဖတ်သူ စာပေဆွေးနွေးပွဲ တစ်ခုအကြောင်းကို Shade ဂျာနယ်မှာ ရေးသားဖော်ပြပေးတာ ကျွန်တော်တို့ အထူး လေးစားကျေးဇူးတင်ပါတယ်။ ဆရာမင်းချမ်းမွန် တို့ ဆွေးနွေးပြောကြားသလို ရေးသားတင်ပြနိုင်အောင် ကျွန်တော်တို့ မကွေးမြို့မှ SHADE စာပေ၀ိုင်းတော်သားများ က ကြိုးစားဆောင်ရွက်နေကြပါတယ်ခင်ဗျာ..။
ဒီတစ်ပတ် SHADE စာပေ၀ိုင်းမှာ ပထမ အဖွင့်ပြောကြားပေသူကတော့ ဆရာကြီး မကွေးဝင်းမြင့် ဖြစ်ပါတယ်။ ဆရာမှ `` လေးစားရပါတဲ့ စာပေမိတ်ဆွေများခင်ဗျာ..၊ ဒီနေ့ ရှိတ်စာပေ စကားဝိုင်းမှာ အထူးဧည့်သည်တော် Perfect မဂ္ဂဇင်း နဲ့ အချစ် ဂျာနယ် မန္တလေးတာဝန်ခံ ဆရာဝိုင်း တက်ရောက်အားပေးတဲ့ အတွက် ၀မ်းမြောက် ၀မ်းသာဂုဏ်ယူမိပါတယ်။
ကျွန်တော်က ဆေးဆရာ စာရေးဆရာမို့ ကျန်းမာရေးအကြောင်းကို ကြားညှပ်ပြီး ပြောပါရစေ..။ လူမှာ ခန္တာကိုယ် ကျမ်းမာဖို့ လိုအပ်သလို စိတ်ကျန်းမာဖို့လည်း အထူးလိုအပ်ပါတယ်။ လူကို စိတ်က ဦးဆောင်နေတာပါ။ စိတ်ပျိုလျှင်ကိုယ်နု စိတ်ထောင်းတော့ ကိုယ်ကြေ၊ စိတ်ဆိုးလျှင် အရုပ်ဆိုးသလို စိတ်ကြည်လျှင် အသားအရေ ကြည်လင်ပါတယ်။ နောက်တစ်ခုက စိတ်တိုလျှင် အသက်တို၍ စိတ်ရှည်လျှင် အသက်ရှည်ပါတယ်။ ဒါကြောင့် စိတ်ကလေး ကြည်လင်လန်းဆန်း နေအောင် ပန်းခြံထဲသွားပြီး လေကောင်း လေသန့်ရှုရိုက်ကြတယ်။ အားလပ်တဲ့ ယခုလို တနင်္ဂနွေနေ့မှာ စိတ်တူ ကိုယ်တူ ၀ါသနာတူ စာပေ အနုပညာမိတ်ဆွေများ SHADE စာပေ၀ိုင်းဖွဲ့ပြီး စကားလက်ဆုံပြောကြတယ်။ အများပြည်သူတွေ အတွက် စိတ်ဓာတ်ခွန်အားတွေပေးပြီး ရေးသားနေကြတဲ့ စာပေအနုပညာရှင်များ အချင်းချင်း တွေ့ဆုံ နှီးနှောကြ၊ တိုင်ပင်ကြ၊ မိမိတို့ ဖတ်ဖြစ်ကြတဲ့ စာအုပ်စာပေသတင်းအချက် အလက် လေးတွေကို ကြားသိရတော့ စိတ်ခွန်အား တက်ကြွကြပါတယ်။ စိတ်ကြည်လင် လန်းဆန်းကြပါတယ်။ စိတ်ကြည်လင် လန်းဆန်းနေသူဟာ အဘယ် အရာမဆို ရယူနိုင်ပါတယ်။ ဒါကြောင့် ကိုယ်ရော စိတ်ပါ ကျန်းမာ၍ ချမ်းသာကြပါစေ လို့ ဆုမွန်ကောင်း တောင်းလိုက်ပါတယ်ခင်ဗျား..။
ဆရာလွမ်းထား(မကွေး) ကတော့ ဒီတစ်ပတ်မှာ အတွေးသစ်ဂျာနယ်ထဲက ဆရာရဲမြလွင် ရေးသားတဲ့ ဂျပန်နိုင်ငံအကြောင်းကို ကောက်နုတ်ပြော ကြားပါတယ်။ ဂျပန်နိုင်ငံဟာ ယခင်က အနုမြူပြာပုံထဲကနေ ယနေ့ကမ္ဘာမှာ ဒုတိယ ထိပ်တန်းဝင်ဖြစ်လာတယ်။ စက်မှုနိုင်ငံဖြစ်တဲ့အတွက် နည်းပညာတွေတိုးတက်လာကြောင်း၊ သူတို့နိုင်ငံက ထုတ်လုပ်တဲ့ စက်ပစ္စည်းတွေကို သတ်မှတ်ကာလ၊ သတ်မှတ်တဲ့ စံချိန်စံညွှန်းအမီ အာမခံပြီး တာဝန်ယူ ပေးပို့ရောင်းချ နေကြောင်းတို့ကို ပြောဆိုသွားခဲ့ပါတယ်။
ဆရာဇော်မြင့်ဇော်ကလည်း ဒီနေ့ တနင်္ဂနွေနေ့၊ နံနက်(၇)နာရီ မှာ သူ့ ဆိုင်ကယ်ဓာတ်ဆီထုတ်သွားခဲ့ပါတယ်။မန္တလေး က ဆရာဝိုင်းနဲ့တွေ့ဆုံရပြီး သွားလိုရာကို မကွေးမြို့ မြင်ကွင်းစုံအနှံ လိုက်လံပို့ခဲ့ကြောင်း၊ ယခု အထိ အိမ်ကို မပြန်ရသေး ပါကြောင်း။ ယခုလို ကိုယ့်ဆီလာတဲ့ဧည့်သည်ကို တာဝန်ကျေအောင် စာပေတာဝန်ထမ်းဆောင်ပေးခဲ့ရလို့ အလွန်ဝမ်းသာ မိပါကြောင်း တို့ကို ပြောဆိုသွားပါတယ်။
ဆရာတက္ကသိုလ်ရည်ရွယ် ကတော့ လူသာငယ်တာ စာပေ၀ိုင်းမှာ ပြောတဲ့စာ စကားတွေကတော့ မှတ်သားပြီ တရားရ အောင် ဖတ်ပြနေပါတယ်။၂၀၁၀၊ဇူလိုင်လထုတ် ကလျာမဂ္ဂဇင်းမှ စိတ်ရောဂါအထူးကု ဆရာဝန်ကြီး စာရေးသူ ဒေါက်တာအုန်းမောင်ရဲ့ (ဘ၀ဆိုတာ ဒီလိုလား ) အမှတ်(၃) ဆောင်းပါးကို အကျယ်တ၀န့်ဖတ်ကြားပြသွားပါတယ်။ အဲဒီဆောင်းပါးထဲမှာ ကျွန်တော်ကြိုက်တဲ့ အဓိက မှတ်သားစရာတွေကတော့ (ယခုဘ၀ ကောင်းစားကြောင်း(၄)ချက်၊ နောက်ဘ၀ကောင်းစားရေး(၄)ချက်)ပါ။ ယခုဘ၀ကောင်းစားကြောင်း(၄)ချက်ကတော့ (၁)အလုပ်ကိုကြိုးစားပြီးလုပ်ရမယ်။ မိမိလုပ်တဲ့အလုပ်ကို ကျွမ်းကျင်ရမယ်။ဇွဲနဲ့ လုပ်ကိုင်ရမယ်။ နည်းစနစ်လည်းမှန်ကန်ရမယ်။ (၂) မိမိလုပ်လို့ရရှိတဲ့ငွေကို ကောင်းစွာ ထိမ်းသိမ်းစောင့်ရှောက်တတ်ရမယ်။ အလေ အလွင့်မရှိစေရပါ။ (၃) မိမိကို အကြံကောင်း ဥာဏ်ကောင်း ပေးနိုင်တဲ့ မိတ်ကောင်း ဆွေကောင်းတွေရှိရမယ်။ (၄)၀င်ငွေနဲ့ ထွက်ငွေများမျှတအောင် သုံးစွဲနိုင်ရမယ်။ နောင်ဘ၀ ကောင်းစားရေး(၄)ချက်ကတော့ (၁) သဒ္ဒါ။ သဒ္ဒါတရားနဲ့ပြည့်စုံစွာ ဘုရား၊ တရား၊ သံဃာကို ယုံကြည်ကိုးကွယ်ပြီး ကောင်းတာလုပ်ရင် ကောင်းကျိုးပေးမယ်၊ မကောင်းတာလုပ်ရင် မကောင်းကျိုးပေးမယ် လို့ ယုံကြည်ထားရမယ်။ (၂) သီလ နဲ့ပြည့်စုံအောင် ထိမ်းသိမ်းဆောက်တည်ရမယ်။ (၃) ဇာဂ ။ ဇာဂ ဆိုတာ ပေးကမ်းစွန့်ကျဲလှူဒါန်းခြင်းပါ။ (၄) ပညာ။ ပညာ ဆိုတာ အမှားအမှန် အကောင်းအဆိုးတို့ကို အကြောင်း အကျိုးနဲ့ ခွဲခြားဆုံးဖြတ်တတ်ရပါမည်။ စတဲ့ စတဲ့အကြောင်းများမှာ လူတိုင်း လူတိုင်း ဒီစာကို တတ်သိသလိုလိုနဲ့ လွယ်လွယ်လေးပါလို့ထင်နေကြပြီး မလိုက်နာကြပဲ မေ့လျော့နေတာတွေကို ယခုဖတ်ကြားပြလိုက်တော့ အားလုံးအတွက် အကျိူးများစွာ မှတ်သားလိုက်ရပါတော့တယ်။ နောက်ပြီး ဒီ ကလျာမဂ္ဂဇင်းထဲမှ ကဗျာဆရာ မောင်လှမျိုး(ချင်းချောင်းခြံ) ရဲ့( ငါ..သွားတော့မယ်..။) ဆိုတဲ့ ကဗျာလေးကို သံနေသံထား အပြည့်နဲ့ ခံစားဖတ်ကြားသွားပါတယ်။
ပန်းချီဆရာ မြင့်ဇော်ဦးက တော့ ယခင် Shade စာပေ၀ိုင်း(၂) ၀ိုင်းမှာ ပထမပိုင်း၊ ဒုတိယပိုင်း ပြောခဲ့တဲ့ သူပြောကြားခဲ့တဲ့(ကျွန်တော်နားဆင်ဖြတ်သန်းခဲ့ရသော ဂီတရေစီးချောင်း) ခေါင်းစဉ်ကို ပြန်ပြောင်းပါရစေ။ ယခု တတိယပိုင်း (ဇာတ်သိမ်းပိုင်း) ကစပြီး (ကျွန်တော်နားဆင်ဖြတ်သန်းခဲ့ရသော ဂီတရေစီးချောင်း၏ တစ်စိတ်တပိုင်း) လို့သာ ပြောင်းပါရစေ..။ (မှတ်ချက်။ ။ ပန်းချီဆရာ မြင့်ဇော်ဦး၏ အဆို၊ အဟဲ(ဂီတရေစီးချောင်း)မှ သီးချင်းများကို အခါအခွင့် သင့်ရင်ဖြင့် သီးခြားဆောင်းပါးရေးသားပါမည်။)
ဆရာနေခြည်(မကွေး)ကလည်း မကွေးစာနယ်ဇင်းမှ ကြီးမှူးကျင်းပတဲ့ တစ်မျက်နှာရသ ၀ထ္ထုတိုပြိုင်ပွဲ ကျင်းပမယ့်အကြောင်း ကို ဧည့်သည်တော် ဆရာဝိုင်း ကိုရှင်းလင်းပြောကြားနေပါတယ်။ (၂၅-၆-၂၀၁၁)၊ စနေနေ့၊ နံနက်(၉)နာရီအချိန်၊ မကွေးမြို့ အထက(၁) မှာကျင်းပပြီး၊ (၂-၇-၂၀၁၁) နေ့၊ နံနက်(၈)နာရီအချိန် ကောင်းမွန်စူပါမားကတ် မှ ရှမ်းစတား စားတော်ဆက်မှာ ခန်းနားထည်ဝါစွာနဲ့ ဆုပေးပွဲကြီးကျင်းပဖို့ စီစဉ်ထားကြောင်း ပြောကြားသွားပါတယ်။
ဧည့်သည်တော် ဆရာဝိုင်းကတော့ SHADE စာပေ၀ိုင်းတော်သားများကို Perfect မဂ္ဂဇင်းမှာ သူရေးသားမယ့် (မကွေးမြို့ရဲ့ စီးပွားရေး၊ ပညာရေး၊ ကျန်းမာရေး၊ လူမှုရေး မြင်ကွင်းကျယ် ) ဆောင်းပါးအတွက် သိလိုတာများကို အင်တာဗျူး နေကြပါတယ်။
စိတ် အဟာရပြည့်ဝအောင် SHADE ဂျာနယ်ကိုဆောင်လို့ ဘ၀အတွက် သုတ၊ရသစုံတဲ့ SHADE စာပေ၀ိုင်းသို့ သွားကြပါစို့..။
ရွှေလမ်းငွေလမ်းဝင်းကြည်
0 comments:
Post a Comment