မကွေးမြို့မှ SHADE စာပေ၀ိုင်း (၃၃)

Shade33
မကွေးမြို့မှ SHADE စာပေ၀ိုင်း (၃၃)
၃-၇-၂၀၁၁၊ တနင်္ဂနွေနေ့ နေ့(၁၂) နာရီမှ ညနေ(၃း၃၀) နာရီအထိ မကွေးမြို့၊ ရန်ကျော်ရပ်၊ သုခိတာလမ်းနှင့် ပိတောက်လမ်းကြား က FOREVER လက်ဖက်ရည်ဆိုင် ဥယျာဉ်အတွင်းမှာ ပေါင်းဆုံဝိုင်းဖွဲ့ ဖြစ်ကြပါတယ်။ SHADE စာပေ၀ိုင်း(၃၃)ကြိမ်မြောက်ပါ။ မနေ့က ၂-၇-၂၀၁၁ နေ့မှာ မကွေးမြို့နယ်စာပေနှင့်စာနယ်ဇင်းအဖွဲ့က ကြီးမှူးကျင်းပပေးတဲ့ (တစ်မျက်နှာရသ၀ထ္ထုတိုပြိုင်ပွဲ ဆုပေးပွဲ) ကျင်းပပြီးစီးခဲ့ပါတယ်။ ကောင်းမွန်စူပါမားကတ်၊ ရှမ်းစတား စားတော်ဆက် မှာ ခမ်းနားကြီးကျယ်စွာနဲ့ ကျင်းပခဲ့ကြပါတယ်။ မကွေးစာနယ်ဇင်း သက်တန်းတစ်လျှောက်မှာ ဒီပွဲဟာ ကြီးကျယ်ခမ်းနားကြောင်း SHADE စာပေ၀ိုင်းမှ အထူးမှတ်တမ်းတင် ဂုဏ်ပြုလိုက်ပါတယ်။ (အမှားပြင်ဆင်ချက်။ ။Shade-ဂျာနယ်၊ အတွဲ(၅) အမှတ်(၃၁)မှာ (နိုင်ငံကျော်ရုပ်ရှင်မင်းသမီး ယောကျာ်းရဲ့မိန်းမ) ၀ထ္ထုရေးသားသူ စာရေးဆရာလူငယ်လေး၏ အမည်မှန် သားဦး ဖြစ်ပါသည်။ လေးဦး ဟု မှားယွင်း၍ဖော်ပြမိပါကြောင်း။) မနေ့က ပင်ပန်းထားကြသော်လည်း ယနေ့စာပေ၀ိုင်း တော်သားများ မနည်းကြပါ။ ရောက်လာကြတဲ့စာပေ၀ိုင်းတော်သားများကတော့ ပန်းချီဆရာမင်းသူ၊ ဆရာနေခြည်(မကွေး)၊ ပန်းချီဆရာသူရိန်မြိုင်၊ ဆရာဇော်မြင့်ဇော်(ဗန္ဓရ)၊ ဆရာလွမ်းရ(မကွေး)၊ ဆရာတင်လင်းဇော်၊ ပန်းချီဆရာမြင့်ဇော်ဦး နဲ့ စာရေးသူတို့ ဖြစ်ကြပါတယ်။
ပန်းချီဆရာကိုမင်းသူ မှ စတင်စကားဆိုလာပါတယ်။ ကျွန်တော် SHADE ဂျာနယ်ကို အမြဲဖတ်ပါတယ်။ ကောင်းနီုးရာရာလေးတွေကို တော်တော်ဖတ်ရပါတယ်။ SHADE စာပေ၀ိုင်းတော်သားတစ်ယောက်အနေနဲ့ ဒီဂျာနယ်ထဲမှာ ပါတဲ့အကြောင်းအရာတွေကောင်းကြောင်းကို ပြောချင်သော်လည်း သူများတွေရဲ့လက်ညှီးကိုကြောက်လို့ မပြောဘဲနေခဲ့မိပါ တယ်။ ကိုယ့်Shade ဂျာနယ်ကို အမွန်းတင်တာလုံးဝ မဟုတ်ပါ။ ဒါကြောင့် ဒီနေ့တော့ Shade ဂျာနယ် အတွဲ(၅) အမှတ်(၃၀) ထဲက ဆရာသာဇော် ရေးသားတဲ့ (ဒေါက်တာဂျော်ဒန်ဆီးဂရေ့ဗ် ရဲ့ မွန်မြတ်သောစိတ်) ကို အကျယ်တ၀င့် ဖတ်ကြားဆွေးနွေးလိုပါတယ်။ အဲဒီဆောင်းပါးထဲက ကျွန်တော်အနှစ်သက်ဆုံးစာသားကတော့ (`ငါ့အနေနဲ့ ကိုယ့်ဒေသကို ပြန်ပြီး ငွေကြေးချမ်းသာအောင်လုပ်ဖို့လည်း လွယ်တယ်။ အဲဒီငွေကြေးနဲ့ စည်းစိမ်ခံနေဖို့ကောင်းတာ။ အခုဒီမှာလာပြီး ဝေးလံတဲ့ဒေသတွေမှာ ခွဲစိတ်ကုသရေး လုပ်ငန်းတွေလုပ်မယ့်အစား လူချမ်းသာတစ်ယောက်ဖြစ်အောင် ငါစွမ်းဆောင်နိုင်တာပဲ။ ဒါပေမယ့် ငါလုပ်ခဲ့သမျှဟာ ဘယ်အရာမှ အချည်းအနှီးမဖြစ်ခဲ့ဘူး။ ဘ၀မှာ ရုန်းကန်လှုပ်ရှားရင်းနဲ့ တစ်ခြားသူဖျက်ဆီးခဲ့တဲ့ အရာတွေကို အသစ်ပြန်လည်တည်ဆောက်ရတာဟာ ငါ့ဘ၀ရဲ့စိတ်ချမ်းသာမှု အနှစ်သာရ အစစ်ပဲ´။) ဆိုတဲ့ ဒေါက်တာဂျော်ဒန် ဆီးဂရေ့ဗ်ရဲ့ ခံယူချက်ကို ကျွန်တော်တို့တစ်တွေ စံနမူနာယူသင့်ပါကြောင်း၊ ဒီဟာလေးကို ကျွန်တော့်ရင်ထဲမှာ တော်တော်ကို ညှိနေလို့ ပြောကြားလိုက်ရပါတယ်..။ ဟု ပန်းချီဆရာကိုမင်းသူက ပြောဆိုသွားခဲ့ပါတယ်။
ဆရာနေခြည်(မကွေး)ကတော့ ထုံစံအတိုင်းပါပဲ။ ကိုယ်ထုတ်လုပ်ထားတဲ့ စာလေးတွေကို ခံစားသွားပါတယ်။ မဟေသီ မဂ္ဂဇင်းမှာ ဖော်ပြခံရတဲ့ (ပုတ်သင်ညိုနဲ့ မြွေဇာတ်လမ်း၊` အစာ´ ဆိုတဲ့) တစ်မျက်နှာဝထ္ထုတိုလေး ကိုခံစားပြောဆိုသွား ပါတယ်။
ပန်းချီဆရာသူရိန်မြိုင်ကလည်း ဇနီးမယား ဆေးရုံကို တက်ပြီး ဒုက္ခတွေ ပင်လယ်ဝေနေသော်လည်း SHADE စာပေ၀ိုင်းသို့ အပြေးရောက်လာပြန်ပါတယ်။ သူ့က.. ကျွန်တော်ဦးနှောက်အခန်းပျက်နေသော်လည်း စာပေ၀ိုင်းကို မပျက်အောင် ကြိုးစားလာပါတယ်။ ဒီနေ့ကျွန်တော်ပြောလိုတာကတော့ အာဖရိကတိုက်ထဲမှ ခြေရာခံကောင်းတဲ့ လူတွေလက်က လွတ်အောင် ပြေးနည်းများအကြောင်းများကို အကျယ်တ၀င့်ခံစားပြီး ပန်းချီဆရာသူရိန်မြိုင်မှ ပြောကြားသွားပါတယ်။
ဆရာဇော်မြင့်ဇော်(ဗန္ဓရ)ကတော့ ဆရာဖေမြင့်ရေးသားတဲ့ (တန်ဘိုးထားအပ်သော အရာများ) များကို ကောက်နုတ် ဖတ်ကြား ဆွေးနွေးပါတယ်။ အဓိက မှတ်စရာကတော့ လူတွေမှာ အိနြေ္ဒသိက္ခာရှိစွာ နေထိုင်တတ်ဖို့ ဖြစ်ပါကြောင်း ပြောဆိုသွားပါတယ်။ ဆရာလွမ်းရ(မကွေး) ကလည်း ကဗျာဆရာဆိုတော့ သူငယ်ငယ်ကခံစားမှု ကဗျာများကို သံနေသံထားနဲ့ ဖတ်သွားပါတယ်။
ဆရာတင်လင်းဇော်ကတော့ ဆရာမ ယဉ်ယဉ်နု(မန္တလေး) ရေးသားတဲ့ ၂၀၀၅ ခုနှစ်ထုတ် (အိပ်တန်းပြန် မုဒီတာငှက်များ) ထဲက အကြိုက်ဆုံးဝထ္ထုတိုတစ်ပုဒ် (သိက္ခာ)ကို ခံစားပြောဆိုသွားပါတယ်။ ၀ထ္ထုကြောင်းလေး ကတော့(ရေနီမြောင်းဘေးမှာ အေးအေးချမ်းချမ်း လုပ်ကိုင်စားသောက်နေထိုင်တဲ့ ပစ္စည်းမဲ့ ပညာမဲ့ လင်မယားနှစ်ယောက် ထံ ပတ်ဝန်းကျင်က၀င်လာသော ပြဿနာ လေးများမှ ပြဿနာကြီးများအထိ လူနှစ်ယောက်ရဲ့အသက်ကို ငွေတစ်ရာတန် မီးချစ်ကလေးနဲ့ စတေးခံသွားရတာကို ဇာတ်လမ်းဆင်ထားပါတယ်။) ဆရာတင်လင်းဇော် မှ ဒီဝထ္ထုတိုလေး က ပေးချင်တာလေးများကို ချပြပါတယ်။ ကျွန်တော်တို့ ပုထုဇဉ်တွေဟာ စိတ်ကို မထိမ်းသိမ်းနိုင်သူတွေက များကြပါတယ်။ ထင့်ခနဲဆို စိတ်တိုတတ်ကြပါတယ်။ စိတ်နောက်သို့ ကိုယ်ပါပြီး ဒေါသစိတ်များနဲ့ ပြောဆို လုပ်ကိုင်တတ်ကြတဲ့ အကျင့်ဆိုးတွေကို ပယ်ဖျောက်ပြစ်ကြရပါမယ်။ လူလိမ္မာက ကိုယ့်သိက္ခာကို အခြားသူတစ်ယောက်မှ ထိခိုက် ပုတ်ခတ်လာရင် တည်တည်ငြိမ်ငြိမ်နဲ့ ဖြေရှင်းဆောင်ရွက်နိုင်ကြပါတယ်။ လူမိုက်တွေကတော့ ကိုယ့်သိက္ခာကို ထိခိုက်လာရင် ဆတ်ဆတ်ထိ မခံမရနိုင်ဖြစ်ပြီး ဂဏာမငြိမ်နဲ့ ဒေါသဦးဆောင်ပြီး လုပ်မိ လုပ်ရာ တွေကို ဆက်တိုက်လုပ်လိုက်ကြတတ်ပါတယ်..။ ဆိုတာကို ဆရာမ ယဉ်ယဉ်နု(မန္တလေး) ရဲ့(သိက္ခာ)၀ထ္ထုတိုလေး က မီးမောင်းထိုးပြပေးသွားပါတယ်..ဟု ဆရာတင်လင်းဇော်က ဝေဖန်သုံးသပ်ပြောဆိုသွားခဲ့ပါတယ်။
ဒီတစ်ပတ် ထူးထူးခြားခြားပွဲဖန်တီးသူကတော့ ပန်းချီဆရာမြင့်ဇော်ဦး ဖြစ်ပါတယ်။ SHADE စာပေ၀ိုင်းကို ပန်းချီကားတစ်ချပ် ကို ထမ်းယူလာပါတယ်။ သူယူလာတဲ့ပန်းချီကား ကို ပိတ်စတစ်ခုနဲ့ ဖုံးထားပါတယ်။ သူ့အလှည့် ကျမှ ပန်းချီကားကို ပြောပြောဆိုဆို ဖွင့်လှစ်လိုက်ပါတယ်။ SHADE ၀ိုင်းတော်သားများကို ဘယ်လိုမြင်လည်း မေးပါတယ်။ ငါးမျက်စေ့တွေလို့ ဆရာတင်လင်းဇော်က ဆိုပါတယ်။ အဲဒီတော့မှ ပန်းချီဆရာမြင့်ဇော်ဦး က ဤသို့ ရှင်းလင်းပါတော့တယ်။
`` ဒီပန်းချီကားကို ကျွန်တော့်သားက ပထမဆုံးစတင်ဝေဖန်ပါတယ်။ ဟာ.. ဒီးပန်းချီကားကြီးက ကြက်ဥ ကြော်ကြီးနဲ့တူတယ်..လို့ ဆိုပါတယ်။ ကျွန်တော်က SHADE စာပေ၀ိုင်းမှာဖျက်မြင်းလိုဖြစ်နေပါတယ်။ သီးချင်းတွေကို အော်ဆိုလိုက်..ယခုလည်း ပန်းချီကားကြီးချပြနေမိပြန်ပါတယ်။ စာပေ၀ိုင်းနဲ့ မဆိုင်တဲ့အကြောင်းအရာများဖြစ်နေရင်တော့ ကျွန်တော့်ကိုခွင့်လွတ်ကြပါ။ ကျွန်တော့်မျက်လုံးတွေကလည်း တော်တော်မှုံလာပါတယ်။ ဒါကြောင့် ဒီနေ့စာပေ၀ိုင်းမှာ မျက်လုံးပန်းချီကားကို ယူလာပြီးပြသချင်စိတ်ပေါက်လာပါတယ်။ မျက်လုံးဆိုတာ လူတစ်ယောက်မှာ အဓိကအကျဆုံး အရာတစ်ခုပါ။ မျက်လုံးကနေ မြင်စိတ်ပေါ်ပါတယ်။ မြင်စိတ်ကို ဦးနှောက်(အသိစိတ်)နဲ့ သုံးသပ် ဆုံးဖြတ်ကြရပါတယ်။ ဒါ မျက်လုံး သုံးလုံးရဲ့ပုံကို ဆွဲထားတာပါ။ ပန်းချီကားအမည် ကတော့ ( စိတ်၏ ထွက်ပေါက်) လို့နာမည်ပေးထား ပါတယ်။လူတစ်ယောက်ကိုကြည့်လိုက်ရင် မျက်လုံးကိုကြည့်လိုက်တာနဲ့ ဒီလူဟာ ဘယ်လိုလူစားပဲလို့ ခွဲခြားသိရှိနိုင်တာကို ဖော်ပြပေးထားပါတယ်။ အောက်ဆုံးမျက်လုံး အရောင်မှေးမှေးလေးက အသိဥာဏ်ပညာနည်းပါးသူ လူပျင်းတစ်ယောက် ရဲ့ မျက်လုံးပါ။ သူ့ အထက်က မျက်လုံးကတော့ နည်းနည်းကြည်လင်နေတဲ့ အသိဥာဏ်ပညာ အလယ်အလတ်ရှိသူပါ။ အဲ အထက်ဆုံးက ကြည်လင်တောက်ပနေတဲ့ မျက်လုံးကြီးကတော့ သိလ၊သမာဓိနဲ့ပြည့်စုံသူ အရိယာ သူတော်စင် ပညာရှိ တို့ရဲ့ မျက်လုံးပါ။ လူသုံးဦး ရဲ့ မျက်လုံးများကို ကိုယ်စားပြုပြီး ပုံဖော်ရေးဆွဲထားပါတယ်။ ဒီပန်းချီကားကို ရေးဆွဲနိုင်ဖို့ အချိန်တွေ၊ အတွေ့အကြုံတွေ တော်တော်ကြာအောင် ပညာကိုဆည်းပူးခဲ့ရပါတယ်။ ဒီပန်းချီကားကို ကျွန်တော့်ဘ၀နဲ့ ရင်နှီးပြီး ရေးသားခဲ့ရပါတယ်။ ယခု ကျွန်တော့် ပန်းချီကားကိုကြည့်ပြီး SHADE စာပေ၀ိုင်းတော်သားများလည်း သူတော်စင် ပညာရှိမျက်လုံးပိုင်ရှင်များ ဖြစ်နိုင်ကြပါစေလို့ ဆဒ္ဒပြုလိုက်ပါတယ်ခင်ဗျား..။´´ လို့ ပန်းချီဆရာမြင့်ဇော်ဦးက ပြောဆိုသွားပါတယ်..။ စာရေးသူ၏ မှတ်ချက်။ ။ (မျက်လုံးသုံးဦးပိုင်ရှင်- စိတ်၏ ထွက်ပေါက်)ပန်းချီကားကြောင့် ကြည့်သောသူများ ပညာမျက်စေ့ဖြင့် မြင်နိုင်ကြပါစေ..။)
စိတ် အဟာရပြည့်ဝအောင် SHADE ဂျာနယ်ကိုဆောင်လို့ ဘ၀အတွက် သုတ၊ရသ ပြည့်စုံတဲ့ SHADE စာပေ၀ိုင်းသို့ သွားကြပါစို့…..။

ရွှေလမ်းငွေလမ်းဝင်းကြည်

Penulis : shwelannwelanwinkyi ~ Sebuah blog yang menyediakan berbagai macam informasi

Artikel မကွေးမြို့မှ SHADE စာပေ၀ိုင်း (၃၃) ini dipublish oleh shwelannwelanwinkyi pada hari Thursday, September 15, 2011. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan မကွေးမြို့မှ SHADE စာပေ၀ိုင်း (၃၃)