မကွေးမြို့က SHADE စာပေ၀ိုင်း(၂၅)
၈-၅-၂၀၁၁၊ တနင်္ဂနွေနေ့၊ နေ့(၁၂)နာရီမှ ညနေ(၄)နာရီအထိ၊ မကွေးမြို့၊ ရန်ကင်းရပ်ကွက်၊ သုခိတာလမ်းနှင့် ပိတောက်လမ်းကြားမှ Forever လက်ဖက်ရည်ဆိုင် ဥယျာဉ်မှာ ၀ိုင်းဖွဲ့စကားပြောကြပါတယ်။ Shade စာပေ၀ိုင်း (၂၅)ကြိမ် ငွေရတုမြောက်ခဲ့ပါပြီ..။ စာပေ၀ိုင်းတော်သားများကတော့ ဆရာကြီး မကွေးဝင်းမြင့်၊ ဆရာနေခြည်(မကွေး)၊ ပန်းချီဆရာမင်းသူ၊ ဆရာတင်လင်းဇော်၊ ဆရာဇော်မြင့်ဇော်(ဗန္ဓရ)၊ ဆရာသားဦး၊ ဆရာဧဇံ၊ ဆရာဘိုမြင့်ရှိန်(အောင်လံ)၊ ဆရာလွမ်းထား(မကွေး)၊ ပန်းချီဆရာမြင့်ဇော်ဦး၊ ပန်းချီဆရာသူရိန်မြိုင်၊ ဆရာဦးဆွေ(ဒဿနိက) နဲ့ စာရေးသူတို့ ဖြစ်ကြပါတယ်။
စာပေစကားဝိုင်း အဖွင့်မှာ မကွေးမြို့နယ်စာနယ်ဇင်း ဥက္ကဋ္ဌ မကွေးဝင်းမြင့် က SHADE ဂျာနယ်အယ်ဒီတာချုပ် ဦးသာဇော်ရဲ့ ကိုယ်စား Shade စာပေ၀ိုင်းတော်သား ဆရာဇော်မြင့်ဇော်(ဗန္ဓရ) ကို နာမကျန်းထောက်ပံ့ငွေ (၃၀၀၀၀ိ)ကျပ်သုံးသောင်း ချီးမြှင့် ပေးပါတယ်။ ဆက်လက်ပြီး အများအတွက် သင်ခန်းစာ တရုပ်စကားပုံ( စက္ကန့်နှစ်ဆယ် သည်းမခံလျှင် လပေါင်းနှစ်ဆယ် ဒုက္ခရောက် တတ်သည်) ဆိုတဲ့ အကြောင်းလေးကို ပြောပြပါတယ်။ ဒီစကားပုံရဲ့ ရာဇ၀င်အကြောင်းကို ကျွန်တော်က မကွေးမြို့မဈေးကြီး အနောက်ဘက်က အသက်တစ်ရာထိနေသွားရတဲ့ တရုပ်ကြီးဦးလောရီ ထံသို့ သေသေချာချာ သိရအောင် သွားရောက် မေးမြန်းခဲ့ပါတယ်။ တရုပ်ကျမ်းစာအုပ်ထူထူကြီးကို ဖတ်ပြီး ဘာသာပြန်ပေးခဲ့ပါတယ်။ ဇာတ်လမ်း အကျဉ်းကတော့ တစ်ယောက် နဲ့ တစ်ယောက် မကြေနပ်ချက်တစ်ခုကို စိတ်မရှည်ကြတော့ပဲ တစ်ယောက်သောသူက ဒါးနဲ့ထထိုးလိုက်တယ်။ ဒါးနဲ့ထိုးလိုက်တဲ့ တရားခံမှာ လပေါင်းနှစ်ဆယ် ပြစ်ဒါဏ်ကျသွားရတဲ့ အကြောင်းလေးပါ။ ကျွန်တော်တို့ ဗုဒ္ဓရှင်တော်ဘုရား ကလည်း သည်းခံမှုတရားတွေကို ဟောကြားထားခဲ့ပါတယ်။ ဒါကြောင့် အားလုံးသော ဘယ်အရာ ဘယ်ကိစ္စမဆို စိတ်ဆိုးလာရင် စက္ကန့်နှစ်ဆယ်အတွင်း စိတ်ရှည်သည်းခံပေးကြပါလို့ ဆရာကြီးမကွေးဝင်းမြင့်က ဆုံးမပြောကြားသွားပါတယ်။
ဆရာနေခြည်(မကွေး) ကတော့ သူကိုယ်တိုင်ရေးသားထားတဲ့ ရွက်နုဝေမဂ္ဂဇင်း မှ (သားနားလည်အောင် ဘယ်လိုရှင်းရပါ့) ဆိုတဲ့ တစ်မျက်နှာဝထ္ထုတိုလေးကို ဖတ်ပြပါတယ်။ အဖေနဲ့ ဒုတိယတန်းကျောင်းသားလေး သားအဖနှစ်ယောက်ရဲ့ဇာတ်လမ်းလေးပါ။ သားကို လိမ်ညာမပြောဖို့ ဆိုဆုံးမနေစဉ် အိမ်ရှေ့က အိမ်ပိုင်ရှင်မိန်းမကြီး တစ်ယောက် အိမ်လခလာတောင်းပါတယ်။အိမ်လခ မပေးနိုင်တာကလည်း(၃)လခတောင်ရှိနေပါပြီ။ ဒါကြောင့် အဖေက သားလေးကို ဆုံမတာ ခဏရပ်ပြီး ( သားလေး သားလေး အိမ်ရှင် ဒေါ်ကြီးကို အဖေမရှိဘူး၊ အပြင်သွားတယ်လို့ ထွက်ပြီးပြောလိုက်ကွာ) လို့ ဇွတ်ထိုးလွှတ်လိုက်ရပါတယ်။ အဖေခိုင်းတဲ့အတိုင်း အသက်မပါဘဲ သားလေးက အိမ်ရှင်အဒေါ်ကြီးကို ပြောကြားနေတာကို အိမ်ထဲမှ ကျွှန်တော်ကြည့်နေရင်းဖြင့်..။ လို့ ခံစားပြောဆိုသွားပါတယ်။
ပန်းချီဆရာမင်းသူကလည်း ဒေါက်တာမောင်မောင် ပြောကြားခဲ့တဲ့ စာတစ်ကြောင်းကို ဖောက်သည်ချပါတယ်။ (အမှားတစ်ခုကို နောက်အမှားတစ်ခုနဲ့ ပေါင်းလိုက်ရင်လည်း အမှန်ဖြစ်မလာနိုင်ပါဘူး) တဲ့။ နောက်ဆက်ပြီးဝထ္ထုရေးနည်းများ ကိုပြောပါတယ်။ ဥပမာကို မောင်ပေါက်ကြိုင်းဇာတ်လမ်းနဲ့ ခွဲခြမ်းစိတ်ဖြာလို့ အကျယ်တ၀င့် ပြောဆိုသွားပါတယ်။
ဆရာတင်လင်းဇော်ကတော့ (၂၀၀၄)လောက်မှ ဆရာကြီးနတ်မောက်ဘုန်းကျော် ရဲ့ဆောင်းပါးပေါင်းချုပ်ထဲက အမှာစကား ကိုပြော ပါတယ်။ အမှာစာဆိုတော့ သရက်က ငညှက်ကနေ ဆရာနတ်မောက်ဘုန်းကျော်ထံရေးလိုက်တဲ့စာပါ။ စာပေဟောပြောပွဲ ရာသီကိုရောက်ရင် စာရေးဆရာတွေ အနယ်နယ်အရပ်ရပ်ကို ဟောပြောဖို့သွားကြတယ်တဲ့ ။ စာရေးဆရာတွေကလည်း လာပြီးနားထောင်မယ့် ပရိတ်သတ်ကို ပညာတွေကို မျှဝေပြောကြားလိုက်မယ်ဆိုတဲ့ စိတ်နဲ့ ပြောကြပါတယ်။ အဲဒါမင်းတို့မှားနေကြပါတယ်သူငယ်ချင်း။ မင်းတို့ကပညာတွေပေးပြီး ပြောကြားလိုက်မယ် ဆိုသော်လည်း နားထောင်တဲ့ ပရိတ်သတ်ထဲမှာ မင်းတို့ထက် တတ်တဲ့နားလည်တဲ့ သူတွေလည်းပါနေမှာပါ။ စာဖတ်နာထားတဲ့သူတွေ အများကြီးပါမယ်။ စာမရေးသော်လည်း စာရေးဆရာတွေထက် တတ်တဲ့ တော်တဲ့သူတွေလည်း ရှိနေကြမှာ။ `စာရေးဆရာတွေကို မာန်လျှော့ခိုင်းတာပေါ့။´ ပုံပြင်လေးတစ်ပုဒ်ကို ဆက်ပြီးပြန်ပြောပြပါတယ်။ ပုံပြင်အနှစ်ချုပ်ကတော့ သင်္ဘောကြီးတစ်စင်းက ခရီးသည်တွေတင်ပြီး ပင်လယ်ခရီးထွက်လာပါတယ်။ အဲဒီသင်္ဘောပေါ်မှာ ခရစ်ယာန် ဘုန်းတော်ကြီးတစ်ပါး လည်းပါလာတယ်။ ကျွန်းတစ်ကျွန်းရောက်တော့ ခရီးသည်တွေကပြောပါတယ်။ ဒီကျွန်းပေါ်မှာ ထူးဆန်းတဲ့ ဘုန်းကြီးသုံးပါးရှိပါတယ်လို့ တစ်ယောက်စကား တစ်ယောက်ပြောကြပါတယ်။ဒါကြောင့် ခရီးသည် တွေမှာ အဲဒီကျွန်းပေါ်ကိုသင်္ဘောကပ်ခိုင်း၍ တက်လာကြပါတယ်။ ဒီဘုန်းကြီးသုံးပါးက တစ်ယောက်ကို တစ်ယောက် စကားမပြောကြဘူး။ အမူအရာ အရိပ်အကဲနဲ့သာ ဆက်ဆံကြပြီး တရားဘာဝနာ ပွားများအားထုတ်နေကြပါတယ်။ အဲဒါကို သင်္ဘောပေါ်မှာ ပါလာတဲ့ ခရစ်ယာန်ဘုန်းကြီးတစ်ပါးကမြင်တော့ သူတို့သုံးယောက် အကျင့်မှားနေပြီ လို့ ဆိုပါတယ်။အင်း ငါ့ကို ဘုရားသခင်က သာသနာပြုခိုင်းလိုက်တာဆိုတော့ ဒီပုဂ္ဂိုလ်သုံးဦးကို ငါပြောမှဖြစ်တော့မယ်ဆိုပြီး ပြောပါတယ်။ မင်းတို့သုံးယောက် အကျင့်မှားနေပြီ။ ဒီလိုမကျင့်ရဘူးကွ။ ငါ အသေအချာ ပြခဲ့ ပြောခဲ့မယ်။ ဒီလိုသာ ပြောင်းကျင့်ကြစမ်းပါ လို့ သင်ကြားပေးခဲ့ပါတယ်။ ကျင့်စင်ပေးပြီး သင်္ဘောက ပြန်ထွက်လာခဲ့ပါတယ်။ ကျွန်းနဲ့တော်တော်ကြီးဝေးတဲ့အခါမှာ အဲဒီကျန်ခဲ့တဲ့ ကျွန်းကိုပြန်ကြည်လိုက်တော့ မီးလုံးကြီးသုံးခုကို ပြန်မြင်နေရပါတယ်။ မကြာမီ အဲဒီမီးလုံး သုံးလုံးက ပင်လယ်ပြင်ပေါ်ကနေပြီး သင်္ဘောနောက်ကို လိုက်လာနေပါတယ်။ တဖြေးဖြေးနဲ့ သင်္ဘောကို မီလာခဲ့ပါတယ်။ ခရီးသည်တွေ နဲ့ စောစောက ခရစ်ယာန်ဘုန်းကြီးက အံ့သြစွာနဲ့မြင်လိုက်တော့ ကျွန်းပေါ်က ကိုယ်တော်ကြီး သုံးပါးဖြစ်နေတာကို တွေ့ရပါတယ်။ အဲဒီ ဘုန်းကြီးသုံးပါးက သူတို့ကို ကျင့်စင်ပညာပေးသွားတဲ့ ဆရာကို တွေ့လိုက်ရပါတယ်။ ပညာကျင့်စင်ပေးသွားတဲ့ ခရစ်ယာန်ဘုန်းကြီးကို မေးမြန်းကြပါတယ်။ ကျွန်တော်တို့ ဆရာပေးထားခဲ့တဲ့ ကျင့်စင်တွေ မေ့သွားလို့ လိုက်လာပြီး မေးရတာပါဘုရား။ ပြန်ပြောပြ ပါအုံးလို့ ဆိုကြပါတယ်။ အဲဒီတော့မှ သင်္ဘောပေါ်က ဆရာဘုန်းကြီးက လက်အုပ်ကလေးချီပြီး (အရှင်ဘုရားတို့ကျင့်စင်အတိုင်းသာ ဆက်လက်ကျင့်တော်မူပါဘုရား..။ အရှင်ဘုရားတို့ ကျင့်စင်က ပင်လယ်ရေပြင်ပေါ်ကိုတောင် လမ်းလျှောက်လာတော်မူနိုင်ပါတယ်။ တပည့်တော်က ယခုထိ သင်္ဘောစီးသွားနေရတုံးပါဘုရား..။) ဟု ပြောဆိုလျှောက်ထားလိုက်ပါသတဲ့။ ပုံပြင်လေးကတော့ မှတ်သားစရာလေးပါဘဲ။ ဆရာနတ်မောက်ဘုန်းကျော်စာအုပ်မှာတော့ ဒီပုံပြင်လေးဟာ ဆိုဗီယက်က စာရေးဆရာကြီးတစ်ဦးရေးတာကို ဘာသာပြန်ထားပါတယ် လို့ ကြားသိရပါကြောင်းကို ဆရာတင်လင်းဇော်က ပြောဆိုသွားပါတယ်။
ဆရာဇော်မြင့်ဇော်(ဗန္ဓရ) ကတော့ ကျွန်တော့်မှာ ဒီ လေးဘက်နာရောဂါစွဲကပ်နေတာ ကြာခဲ့ပါပြီ။ ကျွန်တော့်ရောဂါက မနက်ပိုင်းမှာ ဂျိုင်းထောက်ကြီးနဲ့သွားနေရတော့လည်း ညနေကျ ပြန်ကောင်းချင် ကောင်းနေပြန်ပါတယ်။တခါ တလေ သုံးလေးရက်လောက် လဲနေရပါတယ်။ မိုးရွာရင် မိုးအေးရင် ရောဂါကပိုဆိုးလာပါတယ်။ ဒီရောဂါကို အခမဲ့ ဆေးကုသပေးတဲ့ ဂရုနာရှင်များအသင်း ဆေးခန်းကို မကြာခဏ သွားရောက်ကုသနေရပါတယ်။ ယခုတော့ Shade စာပေ၀ိုင်းတော်သား အဖြစ်သတ်မှတ်ခံရပြီး Shade အယ်ဒီတာချုပ် ဦးသာဇော် မှ ကျန်းမာရေးထောက်ပံ့ငွေ ချီးမြှင့်ပေးလို့ များစွာ ကျေးဇူးတင်ပါတယ်။ ဒီတစ်ပတ်တော့ လယ်တီဆရာတော်ဘုရားကြီးရဲ့ကဗျာ လင်္ကာကို ရွတ်ဆိုပါရစေ..။
ပစ္စည်းရှာလိုနေ နေ့ပုပ်လို့ရက်ကုန် ၊ နစ်မျောလို့ အသက်ကုန်တယ်၊ တွက်ပုံရိပ်မကောင်း၊ ခုလိုဖြင့် သံသရာတွေမှာ ၊ ခန္ဓာတွေများဆုတောင်း၊ သက်မွေးမှု စခန်းပူအောင်၊ ၀မ်းကိုသာနင်ကြောင်း၊ လေးဆယ်ကျော် အရွယ်နှောင်ကာမှ ၊ သူကြွယ်လောင်းလုပ်ချင်၊ မိုးကုန်ပြီး ထွန်မချချင်နဲ့၊ ရွံစရာကောင်းဖို့ဖြစ်အင်၊ နွားအိုကြီးအမော့သင်သလို၊ မလျှော့လျှင် ဘ၀ဆုံးရှာတော့၊ အစတုံးလို့ နင့်အထင် လွဲဖို့သာပြင်၊ တရားကို မသက်ဝင်လျှင်၊ အခက်နင်ကြုံရတော့မလေး..။
စိတ် အဟာရပြည့်ဝအောင် Shade ဂျာနယ်ကိုဆောင်လို့ ဘ၀အတွက် သုတ၊ရသစုံတဲ့ Shade စာပေ၀ိုင်းသို့ သွားကြပါစို့..။
ရွှေလမ်းငွေလမ်းဝင်းကြည်
0 comments:
Post a Comment