မကွေးမြို့က SHADE စာပေ၀ိုင်း(၂၃)
၂၄-၄-၂၀၁၁၊ တနင်္ဂနွေနေ့ ၊ နေ့လယ်(၁၂)နာရီ မှ ညနေ(၃း၃၀) နာရီအထိ မကွေးမြို့၊ရန်ကင်းရပ်ကွက်၊ သုခိတာလမ်း နဲ့ ပိတောက်လမ်းကြားက (Forever) စားသောက်ဆိုင် မှာ ပေါင်းဆုံ ၀ိုင်းဖွဲ့ဖြစ်ကြပါတယ်။ (၁၃၇၃) ခုနှစ် နှစ်သစ်မင်္ဂလာမှာ ဒီရှိတ် စာပေ၀ိုင်းက ပထမအကြိမ် စတင်တဲ့ပွဲပါ။ ရှိတ်စာပေ၀ိုင်းကျင်းပလာခဲ့တာ (၂၃) ကြိမ်မြောက်ပါပြီ..။ နှစ်သစ်မင်္ဂလာ ရှိတ်စာပေ၀ိုင်းမှာ တက်ရောက်လာကြတဲ့ စာပေ၀ိုင်းတော်သားများကတော့ မကွေးစာနယ်ဇင်းအဖွဲ့ ဥက္ကဋ္ဌ မကွေးဝင်းမြင့်၊ နေခြည်(မကွေး)၊ ပန်းချီဆရာသူရိန်မြိုင်၊ ပန်းချီဆရာမင်းသူ၊ ပန်းချီဆရာမြင့်ဇော်ဦး၊ စာရေးဆရာဇော်မြင့်ဇော်(ဗန္ဓရ)၊ သတင်းတာဝန်ခံ ကောင်းသုတ(မင်းဘူး)၊ ဆရာဘိုမြင့်ရှိန်(အောင်လံ)၊ ဆရာတင်လင်းဇော်၊ နဲ့ စာရေးသူတို့ဖြစ်ကြပါတယ်။
ဆရာမကွေးဝင်းမြင့်က နှစ်သစ်မင်္ဂလာမှာ (၃၈)ဖြာမင်္ဂလာတရားတော် အကြောင်းကို အကျယ်တ၀င့် ပြောကြားသွား ပါတယ်။ ကျွန်တော်တို့တတွေဟာ ဗုဒ္ဓရှင်တော်မြတ် ဟောကြားထားခဲ့တဲ့ ဒီ(၃၈)ဖြာ မင်္ဂလာတရားတော်နဲ့သာ မပျက်မကွက် ထာဝရ ကျင့်သုံးနေထိုင်သွားကြမယ်ဆိုရင် ဘ၀အတွက် လောကီ လောကုတ္တရာနှစ်ဖြာနဲ့ ကောင်းကျိုးမင်္ဂလာတွေကို ပြည့်ဝစွာ ခံစား စံစားသွားနိုင်ကြပါလိမ့်မယ်..လို့ ပြောဆိုပါတယ်။ စကားနဲ့ဆို မေ့လျော့သွားမှာ စိုး၍ (၃၈)ဖြာ မင်္ဂလာတရားတော်အား အနက်ဖွင့်ပေးထားတဲ့ စာဆောင်များကို ဓမ္မဒါန လက်ဆောင်ပေးလိုက်ပါသေးတယ်။
ဆရာနေခြည်(မကွေး) ကတော့ ၂၀၁၁၊ဧပြီလထုတ်တဲ့ သရာပါမဂ္ဂဇင်းမှ အကောင်းဆုံး အကြိုက်ဆုံးဝထ္ထုတိုတစ်ပုဒ်နဲ့ အညံ့ဆုံး ၀ထ္ထုတိုတစ်ပုဒ် ကိုအကျယ်တ၀င့် ပြောဆိုဆွေးနွေးသွားပါတယ်။
ပန်းချီဆရာသူရိန်မြိုင်ကလည်း ဖတ်လို့မကုန် ပြောလို့မဆုံးနိုင်တဲ့ ကျော်စွာ(၁၀၀) ထဲက ၀ီလျရန် ရှိတ်စပီးယား ရဲ့ ပြဇာတ် အကြောင်းတွေကို ပြည့်ပြည့်စုံစုံ ပြောဆိုဆွေးနွေးသွားပါတယ်။
ပန်းချီဆရာမင်းသူကတော့ စာရေးဆရာနဲ့ နိုင်ငံရေးသမားကွာခြားပုံကို စတင်ပြောဆိုပါတယ်။ တချိန်တုံးကကျောင်းသား သပိတ်တွက် အလှူခံပွဲမှာ ဦးကျော်ငြိမ်ရဲ့ ဇနီးဖြစ်လာမယ့် မနွယ်ဆိုတဲ့ ကျောင်းသူလေးနဲ့ စာရေးဆရာဖြစ်လာမယ့် ကျောင်းသားငယ်လေး ကိုလှမြိုင်(ခ) ဒဂုံတာရာတို့ အဖွဲ့ အလှူခံထွက်ကြပါတယ်။ လမ်းမှာ ကိုလှမြိုင်ဆိုသူက ဘိနပ်ပြတ်သွားပါတယ်။ အဲဒါကို မနွယ်က အလှူခံငွေထဲမှ ငွေနဲ့ ဘိနပ်တစ်ရံဝယ်ခိုင်း ပါတယ်။ ဒဂုံတာရာဖြစ်လာမယ့် ကျောင်းသားလေးက ဘာပြောလိုက်သလဲဆိုတော့ ( အဲလို လုပ်လို့သုံးလို့ မရဘူးလေ..။ သူ့စည်း၊ သူ့ကမ်းနဲ့ သွားလေ..။ ) ပြောလိုက်ပါတယ်။ နိုင်ငံရေးသမား ဖြစ်မယ့် မနွယ်ကလည်း ပြန်ပြောပါတယ်။ (ရှင်ကလည်း တော်တော်ကို ဇီဇာကြောင်တယ်..။) လို့ပြန်ပြောလိုက်ပါတယ်။ အဲဒါကို စာရေးဆရာဖြစ်မယ့် ဒဂုံတာရာက ပြန်လည်တွေးတောကြည့် ပါတယ်။ နိုင်ငံရေးသမားက လုပ်စရာရှိရင် တိုးလုပ်မယ်..။ စာရေးဆရာကတော့ အမှားမခံနိုင်ဘူး။ အဖြူပေါ် အမည်းတင်မှာဆိုတော့ ချင့်ချိန်ပြီးမှ လုပ်ရ၊ ရေးရတယ်။ လုပ်စရာရှိရင် စဉ်းစဉ်းစားစားနဲ့လုပ်ရတယ်။ စာရေးဆရာဆိုတာ အမှားကင်းအောင် လုပ်တတ်တယ်။ လို့ ဆရာဒဂုံတာရာက ပြောဘူးပါကြောင်း တို့ကို ပန်းချီဆရာမင်းသူက ပြောကြားသွားပါတယ်။ နောက်ပြီး သူက ကလျာမဂ္ဂဇင်းထဲမှ ကဗျာဆရာညီမင်းညိုရဲ့ (၀ိရောဓိ လမ်းများ ) ဆိုတဲ့ ကဗျာကို ဖတ်ကြားဆွေးနွေးသွားပါတယ်။
ဝိရောဓိ လမ်းများ
စည်းမယ့် ကမ်းမယ့်လည်းနေချင်တယ်
သက်တန်းတိုမှာလည်း ကြောက်တယ်..။
ဖောက်လွဲဖောက်ပြန်လည်း ဖြစ်ချင်တယ်
လူသူ လေးပါးတွေမြင်မှာလည်း ကြောက်တယ်။
ခုတမျိုး တော်ကြာတမျိုးပြောရင်းနဲ့
တည်ကြည်တဲ့သူလည်း ဖြစ်ချင်သေးတယ်..။
နည်းနည်းလောက်ပေးပြီး
များများကြီးလည်း မျှော်လင့်နေပြန်တယ်.။
သူများကို အလင်းရောင်ပေးသလိုနဲ့
ကိုယ်ပိုင်တောက်ပမှုကိုလည်း ခုံမင်နေတယ်..။
ကိုယ့်ရဲ့တောက်ပမှုအတွက်
သူတစ်ပါးကို စိတ်လိုလက်ရ တိုက်ချွတ်နေချင်တယ်..။
သစ္စာတရားကို တဖွဖွရွတ်ဆိုပြီး
မုသာ ၀ါဒကိုလည်း ပညာသားပါပါ အလုံးလိုက်မြိုချနေတယ်..။
သူရဲကောင်းလည်း ဖြစ်ချင်သေးတယ်
စွန့်လွှတ် စွန့်စားရမှာကို ကြောက်တယ်…။
သံသရာ ၀တ်ဆင်းရဲကလည်း လွတ်ချင်တယ်
အနှောင်အဖွဲ့တွေကလည်း များလွန်းတယ်..။
ခန္ဓာကိုယ်တစ်ခုလုံးမှ စိတ်ရဲ့မရိုးသားမှုတွေကို
မျက်လုံးတွေက ဖြောင့်ချက်ပေးနေတယ်..။
နောက်ဆုံးမှာတော့ ဒီလူဟာ လူသားထဲက လူတစ်ယောက်ဖြစ်ပြီး
လူသားရဲ့ ဒုက္ခနဲ့ သုခတွေကို အမှောင်တခြမ်း အမည်းတခြမ်းဖြတ်သန်းရင်းနဲ့
အလင်းကိုရှာဖွှေနေသူဖြစ်နေပြန်တယ်….။ ။
ယခုလို ဘ၀အတွက် ပြတ်သားရှင်းလင်းစွာနဲ့အတုယူစရာ ဆရာညီမင်းညိုရဲ့ ကဗျာလေးကို ပန်းချီဆရာမင်းသူမှ နှစ်သစ်ကူး လက်ဆောင်အဖြစ် ရွတ်ဆိုပေးသွားခဲ့ပါတယ်။
စိတ် အဟာရပြည့်ဝအောင် ရှိတ်ဂျာနယ်ကိုဆောင်လို့ ဘ၀အတွက် သုတ၊ရသစုံတဲ့ ရှိတ်စာပေ၀ိုင်းသို့ သွားကြပါစုို့….။
ရွှေလမ်းငွေလမ်းဝင်းကြည်
0 comments:
Post a Comment