သြဂုတ်(၁၀)ရက်နေ့ တွင် ဂျာနယ်တိုက်တစ်ခုသို့ စာမူခလာထုတ်သော အောက်တိုဘာ အောင်ကြီးနှင့် ခဏတာ တွေ့ဆုံခဲ့သည်။သူ့ဘ၀ သူ့အမြင်တစ်စိတ် တစ်ပိုင်းအား သိလို၍ ဤသို့မေးမြန် ပြောဆိုဖြစ်ပါသည်။
မေး။ ။ ဆရာအောက်တိုဘာအောင်ကြီးခင်ဗျာ.. မနက်ဖြန်ဆိုရင် မြန်မာနိုင်ငံသတင်းစာဆရာများအသင်းဖွဲ့စည်းတော့မယ့် ကိစ္စနဲ့ ယနေ့(၁၀-၈-၂၀၁၂)နိုင်ငံပိုင်သတင်းစာမှာ ပါတဲ့ မြန်မာနိုင်ငံ အမြုတေ စာနယ်ဇင်းကောင်စီဖွဲ့လိုက်တဲ့ကိစ္စများကို ဆရာဘယ်လို သဘောထားရှိပါသလဲ…?။ နောက် အများပြည်သူလူထုတွေ လက်ထဲရောက်အောင် ဆရာစာအုပ်တွေ ကာတွန်းတွေကို ဘယ်လိုများဆောင်ရွက်ထားပါသလဲ..? ။
ဆရာအောင်ကြီး။ ။ ပထမ မေးထားတဲ့ မေးခွန်းကိုတော့ ကျွန်တော်မဖြေချင်ပါဘူး။ ဘာကြောင့်မဖြေချင်တာလဲဆိုရင်တော့ ဘာမှကို မပြောချင်လိုပါဗျာ..။ ယခုအချိန်က ညောင်သီးလည်းစား လေသံလည်းကြည့် ဆိုတဲ့ အချိန်မျိုးပါဗျာ…။ နောက် ကျွန်တော့်မိန်းမ မလှရီကလည်း `ဘာမှ မပြောရဘူးလို့´ မှာထားလို့ပါ။ ဒုတိယ မေးခွန်းကတော့ ကျွန်တော်စာအုပ်တွေကို လူထုထဲကိုရောက်စေချင်တယ်။ ဒါကြောင့်ခပ်ပါးပါးလေး(လေးဖေါင်)နဲ့ စာအုပ်တစ်အုပ်ကို (၂၀၀ိ)ကျပ်နဲ့ ရောင်းပါတယ်။ ယခုလောလောဆယ် ထွက်ပြီး သင်္ဘောပေါ်၊ ကားပေါ်တွေမှာ အော်ပြီးရောင်းနေတဲ့စာအုပ်တွေကတော့ သုံးအုပ်ရှိပါပြီ (၁)ဗိုလ်ချုပ်စကား မိုးကြိုးသွား။ (၂) ဒေါ်အောင်ဆန်းစုကြည်ရဲ့ နိုင်ငံရေးအမြုတေ။(၃) ၀ရန်းပြေးဖြစ်ခဲ့ဘူးသည့် သခင်အောင်ဆန်း ဆိုတဲ့ စာအုပ်တွေဖြစ်ပါတယ်။ အဲဒီစာအုပ်တွေမှာ ကျွန်တော့်ကလောင်နာမည်ကတော့ ကျွန့်တော့် အမေကို ဂုဏ်ပြုတဲ့ အနေနဲ့ ( ဒေါ်အုံးကြည်သား) ဆိုတဲ့နာမည်နဲ့ ရေးထားပါတယ်။ ကာတွန်းတွေကိုတော့ အောက်တိုဘာ အောင်ကြီး ဆိုတဲ့ကလောင်နာမည်ဘဲ သုံးထားပါတယ်။နောက်ဆက်ထွက်မယ့်စာအုပ်တွေကတော့ ဗိုလ်ချုပ်မိခင် ဒေါ်စုစာအုပ်။ နောက် ငြိမ်းချမ်းရေးကာတွန်းများစာအုပ်။ ဗိုလ်အောင်ကျော်စာအုပ်က စီစစ်ရေးမှာတင်ထားပါတယ်။ လက်ရှိရေးနေတာကတော့ သခင်ကိုယ်တော်မှိုင်းကို ဆရာလွမ်းလို့ ခေါင်းစဉ်ပေးထားပါတယ်။ ပန်းတနော် ဦးသန့် အဲဒီစာအုပ်တွေကို ရေးသားနေပါတယ်။ ကျွန်တော်ရေးသားပြီးစာမျက်နှာပေါ်မှာ ဖော်ပြထားတဲ့ (ပြောရအုံးမယ် မလှရီရေ )စာအုပ်တွေကိုလည်း စာအုပ်လေးတွေအဖြစ် ပြန်ထုတ်ဖို့စီစဉ်နေပါတယ်။ အားလုံးကျွန်တော့်စာအုပ်တွေကို စာပေစီစစ်ရေးဌာနကို တင်ရပါတယ်။ စာအုပ်တစ်အုပ်ထွက်လာဖို့ စာပေစီစစ်ရေးမှာ အနည်းဆုံး(၆)လလောက်စောင့်ရ ပါတယ်ဗျာ.။
မေး။ ။ ဆရာအနေနဲ့ ယနေ့လူငယ်စာရေးဆရာများနဲ့ ဂျာနယ်လစ်တွေကို ဘယ်လိုများ အကြံပြုပြောဆိုချင်ပါသလဲ..?။
အောင်ကြီး။ ။ ကျွန်တော်တို့လည်း ဒီလိုဘဲဘ၀က စတင်ဖြတ်သန်းလာရတာပါဘဲ။ ကျွန်တော်တို့ခေတ်ကဆို သတင်းစာဘဲ အားကိုးနေရတာ မဂ္ဂဇင်းတွေကျတော့ ဆရာကြီးတွေရှိနေတော့တိုးလို့မရခဲ့ပါဘူးဗျာ။ ကျွန်တော်ဆိုရင် တစ်လမပြောပါနဲ့ တစ်နှစ်နေလို့ တစ်ပုံတောင် မပါတဲ့ ဘ၀က စတင်လာတာပါ။ ဒါကြောင့် ယနေ့လူငယ်တွေခေတ်က ကံကောင်းပါတယ်။ ဂျာနယ် မဂ္ဂဇင်းတွေ အများကြီးရှိနေပါပြီ။ ဒါကြောင့် ကြိုးစားကြပါ။ များများရေးပါ။ များများတွေးပါ။ အဲသူများတွေ ဘာတွေရေးနေကြသလဲဆိုတာကိုလည်း သိအောင် များများဖတ်ကြပါ။ ကိုယ်ထင်ရာကို တစ်ယောက်တည်း စာမဖတ်ဘဲ ရေးနေလို့ကတော့ မဖြစ်ပါဘူး။ ဒီအလုပ်ကို တန်ဘိုးထားပြီး အလုပ်သဘောမျိုးနဲ့ ဇယားသတ်မှတ်ပြီး လုပ်ကြပါ။ ကျွန်တော်ဆိုရင် တစ်နေ့ကို (၃)နာရီစာဖတ်တယ်။ (၃)နာရီစာရေးပါတယ်။ ဒီနေ့စိတ်မပါလို့ မရေးဘူးဆိုပြီး ပြစ်ထားလို့မရပါဘူး။ ကျွန်တော့်မှာ ဒီအလုပ်နဲ့ ထမင်းစားရတာဆိုတော့ မနက်(၉)နာရီကနေ (၁၁)နာရီအထိ ထိုင်ရေးတယ်။ ည(၈)နာရီကနေ (၁)နာရီ၊ (၂)နာရီအထိ တစ်ခါတစ်လေ မိုးလင်းသွားအောင်ထိ စာဖတ်ရပါတယ်။ စာရေးရပါတယ်။ အဲ တကုပ်ကုပ်နဲ့ စာဖတ် စာရေးနေလို့ မနက်ကျပြန်တော့် ကျမ်းမာရေးအတွက် လမ်းလျှောက်ရပါတယ်။ ကျမ်းမာရေးထိခိုက်ရင်လည်း သိကြတဲ့အတိုင်း အားလုံးက ဘရိတ်ဒါးတွေ သဇင်တွေနဲ့ တိုးကြရပါ့မယ်လေ။
မေး။ ။ ဆရာအောင်ကြီးခင်ဗျာ ဆရာဘယ်အချိန်က စတင်စာရေးတာပါလဲ၊ ဆရာမိသားစု ဘ၀အကျဉ်းလေးကို သိပါရစေ။
ဆရာအောင်ကြီး။ ။ ကျွန်တော်(၁၆)နှစ်သားက စတင်ပြီး စာရေးတယ်။ ကာတွန်းဆွဲခဲ့ပါတယ်။ ယခု အသက်(၅၁)နှစ်ရှိနေပါပြီ။ စာပေလောကသက်တန်း(၃၅)နှစ်ရှိပါပြီ။ သားသမီးတစ်ယောက်ရှိပါတယ်။ သမီးလေးအသက် (၁၃)နှစ်ပါ။ ကျွန်တော်က အသက်(၃၉)နှစ်ရှိမှ မိန်းမယူခဲ့တာပါ။ ကျွန်တော်ယူမယ့် မိန်းမကိုလည်း မယူခင်ကကြိုပြောတယ်။ `ငါ့ကိုယူရင် နင်ဆင်းရဲမယ်။ တစ်ခြားအလုပ်ကိုမလုပ်ဘူး။ ကာတွန်းရေးမယ်။ စာရေးမယ်။ သဘောကျမှ ယူနော့်လို့´ပြောပြီး ယူလာခဲ့တာပါ။ သူကလည်း ငတ်ချင်လည်းငတ် ယူမယ်၊ လက်ထပ်မယ်တဲ့။ မိန်းမမယူတော့ဘူးလို့နေခဲ့တာပါ။ ဖူးစာပေါ့ဗျာ..။
မေး။ ။ ဆရာအောင်ကြီးပြောတဲ့အထဲမှာ လက်ရှိမိန်းမလို့ကြားလိုက်ရပါတယ်။ ဒါကြောင့် အရင်ကမိန်းမ ရခဲ့ဘူးပါသလား.?။
ဆရာအောင်ကြီး။ ။ ကျွန်တော့်မိန်းမ မလှရီနဲ့ ပြဿနာတက်အောင် ပြဿနာ မရှာပါနဲ့ဗျာ…။ အရင်က မိန်းမမရှိခဲ့ပါဘူး။ လူပျိုသိုး စစ်စစ်ကြီးပါဗျာ..။ ကျွန်တော့်မိန်းမက သ၀န်တိုတယ်ဗျ။ ကျွန်တော် ယခု မိုးဟေကိုနဲ့ ဖြစ်နေတာတောင် သိပ်သဘာကျဘူးဗျ.. ဟဲဟဲ..။ အင်း… ဒါပေမယ့် နောက်ထပ်မိန်းမယူဖို့ စိတ်မကူးရဲပါဘူးဗျာ..။ ယခု ဒီဘ၀ ဒီလောက်နဲ့ကို စိတ်ကုန်နေပါပြီဗျာ…။ ဟု အောက်တိုဘာအောင်ကြီးမှ ရင်ဖွင့်ပြောဆို၍ သတင်းရယူခဲ့ပါသည်။
ရွှေလမ်းငွေလမ်းဝင်းကြည်
0 comments:
Post a Comment