မကွေးတိုင်းဒေသကြီး အမျိုးသားဒီမိုကရေစီအဖွဲ့ချုပ် ကော်မရှင်အဖွဲ့သည် မကွေးမြို့NLD ရုံးတွင် သြဂုတ်(၂၆/၂၇)ရက်နေ့ နှစ်ရက်၊ NLD ၏ တစ်နိုင်ငံလုံးညီလာခံကျင်းပနိုင်ရေးအတွက် ခရိုင်/မြို့နယ်ကော်မရှင်အဖွဲ့များနှင့် တွေ့ဆုံဆွေးနွေးကြောင်း သတင်းရရှိပါသည်။ ယင်း တွေ့ဆုံဆွေးနွေးပွဲတွင် ညီလာခံကိုယ်စားလှယ်ရွေးချယ်ရေး ကော်မရှင် အဖွဲ့၏ သဘာပတိ အဖြစ်ဦးလှိုင်အေး မှဆောင်ရွက်သည်။ ထိုပွဲမှ NLD မကွေးတိုင်းဒေသကြီးကော်မရှင် ဥက္ကဋ္ဌ ဦးလှိုင်အေး(ပခုက္ကူ) ၏ အဖွင့်အမှာစကားများကို ကောက်နှုတ်ဖော်ပြပါသည်။
``တစ်ခါတစ်လေမှ တွေ့ကြရတဲ့ ရောင်းရင်းများခင်ဗျာ..၊ကျွန်တော်ပြောစရာတွေကတော့ အများကြီးရှိပါတယ်။ ဒါပေမယ့် လိုရင်းကို အတိုချုပ်ပြီးပြောပါ့မယ်။ ယနေ့တွေ့ဆုံဆွေးနွေးပွဲကတော့ အဓိက တစ်နိုင်ငံလုံးရှိ အမျိုးသားဒီမိုကရေစီအဖွဲ့ချုပ် ၏ ညီလာခံကြီးကျင်းပနိုင်ရေးကို အဓိကထားပြီး ညှိနှိုင်းဆွေးနွေးကြရပါ့မယ်။ ညီလာခံကျင်းပရေးကို ဘယ်လိုအောင်မြင် အောင် လုပ်ကြမည်လဲ။ ဘယ်လိုမှန်မှန်ကန်ကန်ဖြစ်အောင်လုပ်ကြမည်လဲ။ ဘယ်လိုအလေးနက်ထားပြီး တိတိကျကျ မှန်မှန်ကန်ကန်နဲ့ ကျွန်တော်တို့လိုချင်တဲ့ ကျွန်တော်တို့ခေါင်းဆောင်ကြီး ဒေါ်အောင်ဆန်းစုကြည်လိုချင်တဲ့ ကျွန်တော်တို့ ဗဟိုစည်းဝင်များလိုချင်တဲ့အတိုင်းကို လူထုရဲ့ဆန္ဒနဲ့အညီအောင်မြင်အောင် ဆောင်ရွက်သွားကြရမှာဖြစ်ပါတယ်။ ဒီညီလာခံကို ပေါ့ပေါ့လေးစဉ်းစားလို့မရပါဘူး။ ဒီညီလာခံက ကျွန်တော်တို့တိုင်းပြည်ရဲ့ ပြောင်းပြန်လှန်လိုက်တဲ့အနေ အထားပါ။ ပြည်သူ့အာဏာအစစ်ကို ဖော်ထုတ်နိုင်အောင်လို့ လုပ်တဲ့ညီလာခံပါ။ ပြည်သူ့ဆန္ဒတွေကို ဗဟိုသုိ့ တိုက်ရိုက်တင်ပြနိုင်ပါတယ်။ ဗဟိုကလည်း ပြည်သူ့ဆန္ဒအစစ်အမှန်တွေကိုစတင်ဖော်ထုတ်နိုင်ဖို့အတွက် လက်ခံမယ်။ ဒီညီလာခံကြီးဟာ အမျိုးသားဒီမိုကရေစီပါတီအတွက်၊ အများပြည်သူဆန္ဒများအတိုင်း ဒီမိုကရေစီနည်းလမ်းကျစွာနဲ့ တိုင်းပြည်ကိုဦးဆောင်သွားမှာဖြစ်ပါတယ်။ တစ်ကယ့်ပြည်သူ့အာဏာကို ပြည်သူတွေထိုက်ထိုက်တန်တန်ရရှိခံစားနိုင်အောင် ကျင်းပတဲ့ အရေးကြီးတဲ့ ညီလာခံကြီးဖြစ်ပါတယ်။ ယခုဒီရွေးချယ်ပွဲမှာ အခြေခံအကျဆုံးဖြစ်တဲ့ ဒီမိုကရေစီအပီပြင်ဆုံး ဖြစ်အောင်ရည်ရွယ်တဲ့ ခိုင်မာတဲ့သံဓိဌာန်နဲ့ အောင်မြင်အောင် မဆုတ်မနစ် ဆောင်ရွက်သွားမှာဖြစ်ပါတယ်။ ကျွန်တော်တို့ ကော်မရှင်အနေနဲ့ ဗဟိုကို ညီလာခံကျင်းပနိုင်ရေးအတွက် အောက်ခြေကနေ ကော်မရှင်ဖွဲ့ပါဆိုလို့ ကြားခံအနေနဲ့ ဖွဲ့ပြီး ဗဟိုကိုတင်ပြပေးနေတာပါ။ ကျွန်တော်တို့အားလုံး ကွင်းဆင်းပြီးတော့ ကိုယ့်မြို့နယ်အလိုက်ဖွဲ့ပေးလိုက်ကြတာပါ။ ကျွန်တော်တို့ဖွဲ့ပေးလို့တင်ပေးတာကို ဗဟိုကပြန်ချလို့လည်း ပြန်ကျလာကြပါပြီ။ ဒီမကွေးမြို့နယ်မှာတော့ အစည်းအဝေး မခေါ်ဘဲ ဖွဲ့တယ်လို့ကြားသိရပါတယ်။ အဲဒီပြောတဲ့သူကလည်း စေတနာနဲ့ပြောတာပါ။ သူ့ကို ဒီအထဲမှာဝင်လုပ်ဖို့ခေါ်ပါ တယ်။ဒါပေမယ့် သူလည်း ဒီအထဲကိုဝင်ပြီးမလုပ်နိုင်ပါဘူး။ အဓိက ကျွန်တော်ပြောခဲ့သလို အခြေခံဒီမိုကရေစီကျကျနဲ့ လုပ်လာခဲ့ရင် ဒီလိုမျိုးတွေဖြစ်လာစရာအကြောင်းမရှိပါဘူး။ ဘယ်လိုဘဲဖြစ်ဖြစ် ကျွန်တော်မေတ္တာရပ်ခံချင်တာကတော့ ညီလာခံအောင်မြင်ဖို့က အဓိကထား လုပ်ပေးကြပါ။ ညီလာခံကျင်းပတော့မယ့် ဒီ(၄)လကိုတော့ ဘယ်လိုဘဲဖြစ်ဖြစ် သည်းခံပေးကြပါ။ မကြေနပ်ကြလို့ မြို့နယ်၊ ခရိုင်တွေက NLDဗဟိုကို ဘယ်လိုဘဲစာတွေတင်တင် ပြောင်းလှဲပေးနိုင်စရာ လုံးဝရှိမှာ မဟုတ်ပါဘူး။ ယခုလို မကြေနပ်တာတွေကိုသာ ဖြေရှင်းပေးနေရမယ်ဆိုရင် ညီလာခံကြီးကို သတ်မှတ်တဲ့ လမှာ ကျင်းပနိုင်မှာ မဟုတ်ပါဘူး။ ဒီလိုဘဲ အင်မတန်အရေးကြီးတဲ့ ပြည်သူ့လွတ်တော်ကိုယ်စားလှယ်တွေရွေးချယ်ပြီးတုန်းကလဲ ဗဟိုက ချမှတ်ရွေးချယ်ပေးတဲ့အတိုင်း အတည်ပါဘဲ။ မကြေနပ်ကြလို့ စာနဲ့၊ လူကိုယ်တိုင် တစ်ယောက်၊ နှစ်ယောက်၊သုံးယောက်လောက် သွားပြီး ဗဟိုကို (အခေါက်ခေါက်အခါခါ)တိုင်ကြပါတယ်။ ဒါပေမယ့် ဗဟိုက လုံးဝပြင်မပေးခဲ့ပါဘူး။ ယခု ညီလာခံကျင်းပရေးအတွက်ကိုလည်း ဒီတစ်ခုပြန်ရှင်းပြီး ရွေးချယ်နေကြရင် ညီလာခံကဖြစ်မှာကို မဟုတ်ပါဘူး။ လက်ရှိ အားလုံးကို ဗဟိုကချမှတ်ပြီး ရွေးချယ်ပေးတဲ့အတိုင်း လက်ခံဆောင်ရွက်ပေးလိုက်ကြပါ။ တစ်ခြား ဧရာဝတီတိုင်းဒေသကြီးဘက်က မြောင်းမြမြို့မှာလို ဆန္ဒပြတာမျိုးတွေမဖြစ်စေဖို့ သက်ဆိုင်ရာအဖွဲ့တွေက အဆင့်ဆင့် ထိမ်းသိမ်းပေးကြဖို့ အထူးမေတ္တာရပ်ခံလိုပါတယ်။ ကိုယ့်တိုင်းဒေသကြီးရဲ့ ဂုဏ်သိက္ခာကို စောင့်ထိမ်းပေးကြပါခင်ဗျာ..။´ ဟု မကွေးတိုင်းဒေသကြီး NLDကော်မရှင်အဖွဲ့ နာယက ဦလှိုင်အေး (ပခုက္ကူ) မှ ပြောဆိုသွားပါသည်။
သို့သော် မကွေးမြို့နယ်အဖွဲ့အား ရွေးချယ်ရာတွင် NLD ညီလာခံကျင်းပရေးအတွက် အစည်းအဝေးမခေါ်ဘဲ ညီလာခံကိုယ်စားလှယ်များအား ရွေးချယ်ထား၍ မကွေးမြို့နယ်NLD အဖွဲ့ဝင်များမှ လုံးဝ မကြေနပ်ကြကြောင်း၊ ထို့ကြောင့် ယခုလာမည့် (၂-၉-၂၀၁၂) တနင်္ဂနွေနေ့တွင် ၎င်း ကော်မရှင်အဖွဲ့မှ ပြန်လည်ရွေးချယ်ပေးမည်ဟု NLD အဖွဲ့ဝင် ဦးရဲတင့်နှင့် ၈၈ မျိုးဆက်ကျောင်းသား(မြေလတ်)အဖွဲ့ ဦးသန်းထွန်းအောင်တို့မှ ပြောကြားပါသည်။
0 comments:
Post a Comment