လယ်တီဆရာတော်ဘုရားကြီး၏
ဟံသာဝတီခရိုင်၊ ကွမ်းခြံကုန်းမြို့၊ မြို့ကွင်းကျောင်းဘုန်းကြီး တပည့်ဦးသူရိန္ဒကို သတိပေး ဆုံးမအပ်သော
သြ၀ါဒတေးထပ်
- မျက်မြင်မှာ ဉာဏ်တွဲလို့၊ အနဲနဲရှုပါ၊
- ငရဲနှင့် လူ့ရွာမှာ၊ ခုအခါ မခြား၊
- မီးသုံးရပ် ဗလောင်ဆူ၊ အကောင်ပူ သင်းတို့ ဖြစ်လား၊
- စိတ်ရတက် အညစ်ထူ၊ အပြစ်မူထွေပြား၊
- တတွေတွေ သေလို့သွားရင်လ၊ တဖွားဖွားအောက်မှာ၊
- ယမနယ် ဘုံအနှုန်း၊ အကုန်လုံး စုကြမည်သာ၊
- သို့ကလောက် လူ့ငြမ်းဟာကို၊ ရှုစမ်းပါညီလှရဲ့၊
- မှီသမျှ ဉာဏ်ကုန်မျှော်နော်၊ ရောလို့ မတော်၊
- အလိုလိုက်လို့ အငိုက်ချော်လျှင်၊
- တဟိုက်ဟော်ဟော် ညီမောရှာလိမ့်လေး။
သံဝေဂ၀တ္ထု (၈) ပါး...
- နုနယ်ရုပ်ဆင်း၊ ပျိုမြစ်ခြင်းကား၊ အိုမင်းနောက်ဆုံး ရှိချေ၏။
- ဥစ္စာဆင်မြင်း၊ ပေါများခြင်းကား၊ ယိုယွင်းနောက်ဆုံး ရှိချေ၏။
- ၀ိညာဏ်ထင်လင်း၊ သက်ရှင်ခြင်းကား၊ သေခြင်းနောက်ဆုံး ရှိချေ၏။
- ချစ်ခင်ပေါင်းသင်း၊ ဆက်ဆံခြင်းကား၊ ကွေကွင်းနောက်ဆုံး ရှိချေ၏။
- ထက်ကြွားကြွကြွ၊ မြင့်လွန်းကလည်း၊ လျောကျနောက်ဆုံး ရှိချေ၏။
- ခုံမင်ခယ၊ ချစ်သမျှကား၊ သောကနောက်ဆုံး ရှိချေ၏။
- ပွဲလယ်ပြင်ပ၊ ချီးမွမ်းကြလည်း၊ ရှုတ်ချနောက်ဆုံး ရှိချေ၏။
- ကြည်သာရွှင်ပြ၊ ချမ်းသာလှလည်း၊ ဒုက္ခနောက်ဆုံး ရှိချေ၏။
(လယ်တီဆရာတော်ဘုရားကြီး)
မနာလိုကင်း ၀န်တိုရှင်း လက်ငင်းချမ်းသာ ကြရမည်။
(မဟာစည်ဆရာတော်ဘုရားကြီး)
ရွှေရှိတယ် ပြောပြော၊ ငွေရှိတယ် ပြောပြော…
ပစ္စုပ္ပန်မှာ အေးချမ်းတည်ငြိမ် ရင့်ကျက်စွာနဲ့ မနေတတ်ဘူးဆိုရင်
လူ့ဘ၀ဟာ ဘာကိုမှ အဓိပ္ပာယ် မရှိပါ။
(ယောဆရာတော်)
“ကိုယ့်အကျိုး မထိခိုက်တဲ့ သူတစ်ပါး အကျိုး သယ်ပိုးရမယ်” ဆိုတာက “အကုသိုလ်အလုပ် မလုပ်ဖို့” ပြောတာပါ။
“သူတစ်ပါးအကျိုး မထိခိုက်တဲ့ ကိုယ့်အကျိုး သယ်ပိုးရမယ်” ဆိုတာက “ကုသိုလ်အလုပ် လုပ်ဖို့” ပြောတာပါ။
(အရှင်ဆန္ဒာဓိက)
“ဒါနကလည်း မပြောင်၊ သီလကလည်း အကြောင်၊ ဘာဝနာကလည်း အယောင်ဆောင်”
အဲဒီလို မဖြစ်စေနဲ့...
(လယ်တီဆရာတော်ဘုရားကြီး)
တဏှာခိုင်းတိုင်း လုပ်တာသည် အရှက်မရှိလို့။
အ၀ိဇ္ဇာတဏှာ ကိန်းလာရင် အရှက်အကြောက် မရှိတော့ဘူး။
ဒကာ၊ ဒကာမတွေ ကျွန်သဘောက် ပီပီ တဏှာခိုင်းတိုင်း လုပ်နေတာပဲ။
တဏှာခိုင်းတိုင်း လုပ်နေရင် သေရင် အပါယ်ရောက်ပြီ။
တဏှာအဖော် မလုပ်ပါနဲ့။ ဉာဏ်အဖော် လုပ်ပါ။
(မိုးကုတ်ဆရာတော်ဘုရားကြီး)
သူတော်ကောင်း ဆိုတာ
သူတော်အောင် ကိုယ်က ကောင်းပေးရတာပဲ။
သူတော်မှ ကိုယ်ကောင်းနိုင်မယ် ဆိုရင်
သူတော်ကောင်းအစစ် မဟုတ်နိုင်တော့ဘူး...
(ယောဆရာတော်)
ဟန်ကျအောင်...
ကိုယ့်ကိုယ်ကို ဟန်မကျတာ
ဟန်မကျမှန်းသိမှ
ဟန်ကျမယ်။
ဟန်မကျဘဲနဲ့ ဟန်ကျတယ်
ထင်နေရင်
နည်းနည်းလေးမှ
ဟန်မကျသေးဘူး။
(ဝေဘူဆရာတော်ဘုရားကြီး)
လယ်တီဆရာတော် သံဝေဂတေးထပ်...
ငါးအာရုံ ဘင်အစု၊ ခင်မှုနှင့် နေ့ကုန်၊
နင်ယခု မေ့ပုံလို၊ တွေ့မကြုံ စခန်း၊
ပါယ်လေးဝ သောကဘုံမှာ၊ မျောရရုံ ရှိတော့မခန်း။
အောက်ဝီစိ သောင်းအငူမှာ၊ ခေါင်းမပြူ စတမ်း၊
နှစ်အရှည် နစ်မည့်လမ်းကိုလ၊ နင်မျှော်စမ်း နင့်ကိုယ်၊
ဒေသနာ ထင်အလင်းရယ်နှင့်၊ နင်အဖျင်း ပိုထက်သာပို။
သည်လောဘ စရိုက်အိုကို၊ မလိုက်လို ရှောင်ပစ်လို့၊
နောက်အသစ် တကယ်ပြင်လျင်၊ ကောင်းဖို့ အစဉ်၊
ခွင့်သာခိုက်ကမှ မလိုက်ချင်လျှင်၊
အမိုက်နင့်ပြင် ရှိသေးလေလိမ့်လား။
ခွင့်သာဆဲကမှ မခဲချင်လျှင်၊
အလွဲနင့်ပြင် ရှိသေးလေလိမ့်လား။
ခွင့်သာတုန်းကမှ မရုန်းချင်လျှင်၊
အရှုံးနင့်ပြင် ရှိသေးလေလိမ့်လား....
(တပည့်မောင်သြဇာကို ဆုံးမသော ဆရာတော်ဘုရားကြီး၏ သံဝေဂတေးထပ်)
အသာခံလမ်းစဉ်နှင့် အနာခံလမ်းစဉ်...
အရှင်ဒေ၀ဒတ်သည် အရာရာ၌ အသာချည်း စံခဲ့သည်။ အသာစံခြင်း ၀ါဒကို တည်ထောင်ခဲ့သော အရှင်ဒေ၀ဒတ်သည် ယခုအခါ အ၀ီစိ ငရဲသို့ ကျရောက်နေရပြီ ဖြစ်၏။ ထို့အတူ အသာစံခြင်း ၀ါဒကို တည်ထောင်ခဲ့သူ မှန်သမျှသည် အရှင်ဒေ၀ဒတ် နောက်သို့ လိုက်ကြရမည် ဖြစ်၏။
ဗုဒ္ဒသည် အရာရာ၌ အနာခံခဲ့သည်။ အနာခံခြင်း ၀ါဒကို တည်ထောင်ခဲ့သော ဗုဒ္ဓသည် ယခုအခါ နိဗ္ဗာန်သို့ ရောက်နေပြီ ဖြစ်၏။ ထို့အတူ အနာခံခြင်း ၀ါဒကို ကျင့်သုံးသူ မှန်သမျှသည် ဗုဒ္ဓနောက်သို့ လိုက်ကြရမည် ဖြစ်၏။
သစ္စာစကားဖြင့် ပြောလျှင် အသာစံခြင်းသည် “သမုဒယသစ္စာ” ခေါ် တဏှာကို သိမ်းပိုက်ထားခြင်း ဖြစ်၏။ အနာခံခြင်းသည် သမုဒယသစ္စာ ခေါ် တဏှာကို စာတွေ့မဟုတ်ဘဲ ငါတွေ့အလုပ်ဖြင့် ပယ်သတ်ခြင်း ဖြစ်၏။
ထို့ကြောင့် နိဗ္ဗာန်ကို ရယူလိုသူ မှန်သမျှ အနာခံခြင်း ၀ါဒကို ကျင့်သုံးရမည် ဖြစ်သည်...
[အရှင်ဇ၀န (မေတ္တာရှင်-ရွှေပြည်သာ)]
သူများအကျိုး ပျက်စီးရာကို ဘယ်အခါမှ မပြောနှင့်၊ မလုပ်နှင့်၊ မကြံနှင့်။
ကြမ်းထမ်းသော စကားကို မဆိုနှင့်။
မေတ္တာနှင့်ယှဉ်သော စိတ်ကို ဖြစ်စေရမည်။
အကောင်းကြံ၊ အမှန်လုပ်၊ အဟုတ်ပြော။
ယခုလက်ရှိအချိန်ထက် ကောင်းသောအချိန်မရှိ။
လက်ရှိအချိန်ကို နိဗ္ဗာန်အထိ အကျိုးရှိအောင် သုံးပါ။
(မင်းကွန်းဆရာတော်ဘုရားကြီး)
တရားစစ်နည်း...
အသိတစ်ခုကို သိရ၍ ကိလေသာများ လျော့ပါးမှု၊ ကုန်ခန်းမှု မရှိလျင်
ထိုအသိသည် သညာသိ၊ စာသိ၊ ဗဟုသုတသိ။
အသိတစ်ခုကို သိရ၍ ကိလေသာများ လျော့ပါးမှု၊ ကုန်ခန်းမှု ရှိလျင်
ထိုအသိသည် ပညာသိ၊ ခန္ဓာသိ၊ ပဋိဝေဓသိ။
ဤကား သောချာသော တရားစစ်နည်းတည်း...
[အရှင်ဇ၀န (မေတ္တာရှင်-ရွှေပြည်သာ)]
စေတီထိုက်သော ခန္ဓာအိမ်...
ယောဂီတို့ ကိုယ့်ရှိပြီးသား ထွက်လေ၊ ၀င်လေ လေးကိုပဲ တစ်ရူတစ်ရှိုက် နှာသီးဖျား သတိလေးကပ်ပြီး ဘုရားဂုဏ်တော်တွေ၊ တရားဂုဏ်တော်တွေ၊ သံဃာ့ဂုဏ်တော်တွေ ထုံမွှမ်းပြီး မှတ်နေကြတော့။
ယောဂီတို့ရဲ့ ခန္ဓာအိမ်ကြီးက စေတီအိမ်ကြီးလိုပဲ လူ၊ နတ်၊ ဗြဟ္မာ သတ္တ၀ါတွေရဲ့ ပူဇော်ခြင်းငှာ ထိုက်နေတော့တယ်။
ခန္ဓာကိုယ် တစ်ခုလုံး တရားတွေနဲ့ ပြည့်နေတော့ ယောဂီတို့ရဲ့ ခန္ဓာကိုယ်ကြီးက
နံ့သာတုန်းကြီး ဖြစ်မနေဘူးလား။
အကောင်းတုန်းကြီး ဖြစ်မနေဘူးလား။
အမွန်မြတ်တုန်းကြီး ဖြစ်မနေဘူးလား။
ဒီလို ဖြစ်ဖို့ မလွယ်ဘူး။
ကြိုးစားအားထုတ်ကြ.....
(မောင်းထောင် မြေဇင်းတောရ ဆရာတော်ဘုရားကြီး)
ကျင့်ကြံအားထုတ်ရန်...
- မိမိရဲ့ ရခဲ့တဲ့ လူ့ဘ၀ကို အလွဲသုံးစား အချိန်တွေနဲ့ မဖြုံးလိုက်ပါနဲ့။
- ခန္ဓာကိုယ်ဟာ မွေးကတည်းက အသေဘက်ကို ပြေးနေတယ်။
- ဘယ်ဗေဒင်မှ မယုံကြနဲ့၊ ခန္ဓာက သူ့လမ်းသူ ပြေးနေတော့
မနေ့ကထက် ယနေ့ သေဖို့ တစ်ရက် နီးသွားပြီဆိုတာသာ ယုံလိုက်ပါ။
- ခန္ဓာ၏ ၀တ္တရားက အသေရှာတာ၊ ဉာဏ်၏ ၀တ္တရားက အသေရှောင်တာ။
- ခန္ဓာက အပြေးသွားနေတော့ အသေကဦး၍ ဉာဏ်က နောက်ကျသွားလိမ့်မယ်။
- အပြေးမရပ်တဲ့ ခန္ဓာကိုယ် သုဿန်မရောက်ခင် မဂ္ဂင်အလုပ် မြန်မြန်လုပ်ပါ။
- အသက်တမ်း ခပ်တိုတိုလေးမှာ ခပ်ခိုခို လုပ်နေမယ် ဆိုရင် အသေစောသွားရင်
ကိုယ်ကျိုးနည်းလိမ့်မယ်။
- သာသနာနဲ့ ကြုံမှ သစ္စာလေးပါး ထွက်မြောက်ရေးတရား ပေါ်တယ်။
- ယခုအချိန်ဟာ အားလုံး အဖက်ဖက်မှ ကြုံပြီး ကျွတ်တမ်းဝင်ရမယ့် ဘ၀ပဲလို့
ဆုံးဖြတ်ချက်ချပြီး အလုပ်သာ လုပ်ပါ။
(မိုးကုတ်ဆရာတော်ဘုရားကြီး)
ကိုယ်ကျိုးမနည်းဘူးလား...
အားမှလုပ်မယ်၊ အားမှလုပ်မယ် ဆိုပြီး
အားရက်စောင့်မယ် ဆိုလို့ရှိရင်
“ခေါင်း” ထဲ ၀င်တဲ့ နေ့ပဲ။
ဒီလိုဖြစ်ရင် အားရက်ကို မစောင့်နဲ့တော့။
ဒီကနေ့သည် ကိုယ့်အတွက်။
မနက်ဖြန်သည် ကိုယ့်အတွက် မဟုတ်ဘူးလေ။
အနာဂါတ် ဆိုတာ မသေချာဘူးတဲ့။
ကွေးသောလက် မဆန့်ခင် ဆန့်သောလက် မကွေးခင် ဆိုသလို
ညသေသွားရင် ဘယ့်နှယ်လုပ်မလဲ။
ကိုယ်ကျိုးမနည်းဘူးလား....
(အောင်ဆန်းဆရာတော်)
လူကောင်း၊ လူမိုက် ဖြစ်ရခြင်း...
လူကြောင့် လူကောင်းဖြစ်သည် မဟုတ်သလို
လူကြောင့် လူမိုက်ဖြစ်သည်လည်း မဟုတ်ပေ။
ကိလေသာ တရားဆိုးတို့ကို နှိပ်ကွပ် ဆုံးမနိုင်ခြင်းကြောင့်
လူကောင်းအဖြစ် မြင်ရခြင်းသာဖြစ်ပြီး
ကိလေသာ တရားဆိုးတို့ကို မနှိပ်ကွပ် မဆုံးမနိုင်ခြင်းကြောင့်
လူမိုက်အဖြစ် မြင်ရခြင်းသာဖြစ်သည်.....
(ဖားအောက်ဆရာတော်)
ငါ...
“ငါ” မရှိမှ သိကြလိမ့်မယ်တဲ့။
အဲဒီ ငါကရော
ရေရေရာရာ
ဘတွေကို သိထားပြီးပြီလဲ...
(အရှင်ဆေကိန္ဒ)
ဆွဲအားနှစ်ခု စိတ်ကိုလု...
ခန္ဓာစုက မြေကျွေးရ၊ ဒုက္ခအပူ တိုးပွားစေ။
ဘောင်ကျော်လွန်က အပါယ်ကျ၊ ဒုက္ခပင်လယ်ဝေ။
သဒ္ဓါစွဲက စွမ်းအားရ၊ မုချ ချမ်းသာပေ။
တရားစုမှ ကိုယ်ပိုင်ရ၊ မုချ စိတ်အေးစေ။
ဆွဲအားနှစ်ခု စိတ်ကိုလု၊ ကောင်းမှု နိုင်ပါစေ...
(ယောဆရာတော်)
အိုဘယ့်ငါ...
ငါသည် ဘယ်လိုငါ ဖြစ်ထိုက်သနည်း။
ငါသည် ငါအကြည်ညိုခံရသောငါ ဖြစ်ထိုက်သည်။
သူတစ်ပါးကို ညာဝါးလို့ ရသည်။
ငါ့ကိုယ်ငါ ညာဝါးလို့ မရ။
မည်သူမဆို မိမိကိုယ်ကို မိမိ ကြည်ညိုခံရသောသူဖြစ်အောင် ကြိုးစားရမယ်...
(မဟာဂန္ဓာရုံဆရာတော် အရှင်ဇနကာဘိဝံသ)
အားမှသေမှာလား၊ သေမှအားမှာလား...
ကမ္ဘာပေါ်မှာ နေ့စဉ်နဲ့အမျှ လူတွေ မရေမတွက်နိုင်လောက်အောင် သေနေကြတာ အားလို့ သေတဲ့မသာ တစ်ယောက်မှ မရှိပါဘူး။
မအားတဲ့ ကြားက သေသွားကြတဲ့ မသာတွေချည်းပါပဲ။
သေမင်းက သူခေါ်ချိန်တန်ရင် အားတဲ့သူကိုလည်း ခေါ်မှာပါ။ မအားတဲ့သူ ကိုလည်း ခေါ်မှာပါ။
သေမင်းမှာ တပည့်မွေးပြီး လူရွေးတဲ့မူ မရှိပါဘူး။
ဒီတော့ မအားတဲ့ကြားထဲက သေမင်းလာခေါ်ရင် အချိန်မရွေး လိုက်သွားရမှာပဲ ဆိုတာကို ကြိုတင်ပြီးတာ့ နှလုံးသွင်း ဆင်ခြင်ထားမယ် ဆိုရင် မအားလို့ပါ ဆိုတဲ့ အကြောင်းပြချက်နဲ့ တရားဓမ္မကို မျက်နှာလွှဲတဲ့ အဖြစ်ကို ရောက်မှာ မဟုတ်တော့ဘူး...
(အရှင်ဆန္ဒာဓိက - ရွှေပါရမီတောရ)
အချောကိုင်နည်း...
တရားအားထုတ်တယ်ဆိုတာ အဓိက ကတော့ ပြဿနာကို ဖြေရှင်းတာပါပဲ။ ဘယ်သူ့ပြဿနာလဲ ဆိုတော့ မိမိ ပြဿနာပါပဲ။ မိမိပြဿနာကို မိမိဖြေရှင်းမှ အေးတာကိုး။
တန်ချိန်ဖွဲ့လို့ မရနိုင်တဲ့ ဒုက္ခပြဿနာတွေ ၀ိုင်းအုံပြည့်နက်နေတဲ့ ဘ၀မှာ လေကဓံ လှိုင်းလုံးကြီးတွေ ဆူးငြောင့်ခလုပ်တွေ ဘုတွေထစ်တွေ အတိုက်အခိုက်တွေ အထိုးနှက်တွေ ဘယ်လောက်များများ နောက်ဆုံး တရားသဘောနဲ့ အချောကိုင်လိုက်နိုင်ရင် ပြီးပြေချောမော သွားကြတော့တာချည်းပါပဲ...
(ဘဒ္ဒန္တဇာဂရာဘိဝံသ - နာဂလှိုင်ဂူ)
သာသနာပြုပုဂ္ဂိုလ်ဆိုတာ...
သာသနာပြုပုဂ္ဂိုလ်ဆိုတာ
လူတွေရဲ့ ရင်ထဲကို
သီလ၊ သမာဓိ၊ ပညာ
သိက္ခာသုံးပါး တည်အောင်
လုပ်ပေးတဲ့ ပုဂ္ဂိုလ်ကို ခေါ်တယ်။
[အရှင်ဇ၀န-မေတ္တာရှင် (ရွှေပြည်သာ)]
ချမ်းသာချင်ရင်...
မနာလိုကင်း၊ ၀န်တိုရှင်း၊ လက်ငင်းချမ်းသာမည်...
(မဟာစည်ဆရာတော်ဘုရားကြီး)
http://ashinnyanadipa.blogspot.com/ အရှင်ဉာဏဒီပ (ဓမ္မရတနာ) ဘလော့မှ ကူးယူဖော်ပြ ဓမ္မဒါန မျှဝေအပ်ပါတယ် ခင်ဗျာ...
လေးစားရိုသေစွာဖြင့်
ဖိုးသား
ကိုဖိုးသား ပေးပို့ထားသော မေးလ်အား ပြန်လည်ဖော်ပြလိုက်ပါသည်။
ရွှေလမ်းငွေလမ်းဝင်းကြည်
၂၀၀၉ ခု၊အောက်တိုဘာလ(၃၀)ရက်၊နံနက်(၈း၃၀)နာရီ ကူးယူတင်၏။
0 comments:
Post a Comment