ဓာတ်ပုံများကို google Images မှရှာ၍ အခြားဆိုဒ်များမှ ကူးယူဖော်ပြပါသည်။
``အမေအရင်းပါ သားရယ်..´´
(ရသစာတမ်း)
ပုထုဇဉ်လူသားတိုင်းဟာ အိုမင်းရင့်ရော်လာရင် အလိုအပ်ဆုံးက(သမုဒယ သံယောဇဉ်) မေတ္တာတရားပါ။ သမုဒယ သံယောဇဉ် မေတ္တာတရားဆိုတာ အိုးမင်းရင့်ရော်လာလို့ မမာမကျန်းဖြစ်လာခဲ့ရင် ခင်ပွန်း၊ဇနီးမယား၊ သားသမီး မြေးမြစ်များရဲ့ အယုအယ၊ ပြုစုခြင်းတွေကို ခံယူတောင့်တ မျှော်လင့်နေကြပါတယ်။ ကျွန်တော်ဆိုရင် ရောဂါတစ်ခုကြောင့် ခွဲစိပ်ခမ်းက ခွဲစိပ်ပြီး မေ့ဆေးပေးထားတာကို စတင်သတိရတာနဲ့ `သမီးရေ.. သမီးလေးရေ ..´လို့ ဆေးရုံတစ်ရုံလုံးကြားအောင် ယောင်ရမ်းတမ်းတ အော်ဟစ်ခဲ့မိပါတယ်…။ အမှတ်တမဲ့နဲ့ ခလုပ်တိုက်မိတိုင်း၊ မမာမကျန်းဖြစ်ပြီး အဖျားတက်လေတိုင်း နာကြင်မှုတစ်ခုခုကိုခံစားမိလေတိုင်း`အမေ.. အမေရေ..လို့´ `အို အမေ့ လို့´ ယောင်ရမ်းတမ်းတမိ တတ်ကြပါတယ်။ ပါးစပ်က တတွတ်တွတ်နဲ့ `အမေ..အမေ..အမေ…အို အမေရေ..´လို့တမ်းတညည်းညူနေ တတ်ကြပါတယ်။ ဒါကြောင့် ရှေးလူကြီးများက `ခလုပ်ထိမှ အမိတ´ ကြတယ်လို့ ဆိုဆုံးမခဲ့ကြပါတယ်။ တစ်လောကလုံးမှာ မိခင်ဆိုတဲ့ အမေ့ရင်ခွင်လောက် ထာဝရအေးမြတာ မရှိပါ။ ရှေးခေတ်က မိခင်တိုင်းဟာ သားကိုသခင်၊ လင်ကိုဘုရား ဆိုပြီး အားကိုးအားထားပြုတတ်ကြပါတယ်။ လင်ဝတ္တရားငါးပါး၊ ဇနီးဝတ္တရားငါးပါး၊ သားသမီးဝတ္တရားငါးပါးတို့နဲ့ ပြည့်စုံကြပါတယ်။ ရှေးခေတ်က တစ်လင် တစ်မယားစနစ်သာ များကြပါတယ်။ ယခုခေတ်ကတော့ (ကိုးရီးယားဇာတ်ကားတွေ) ကြောင့်လား မသိပါ၊ ဖောက်လွှဲဖောက်ပြန်ဖြစ်တဲ့ သူတွေက များနေကြတယ်ထင်မိပါတယ်။
မနေ့က မိုးရွာရွာထီးဆောင်းပြီး ငယ်ငယ်က ငယ်သူငယ်ချင်းတွေအိမ်ကို အလည်သွားခဲ့မိပါတယ်။ မိမိုး ဆိုတဲ့သူငယ်ချင်းမ အိမ်ကိုရောက်ခဲ့ပါတယ်။ မတွေ့ရတာ နှစ်ပေါင်း(၃၀)ကျော်ခဲ့ပါပြီ..။ နာမည်က မိမိုးဆိုတဲ့ အတိုင်း စိတ်ဓာတ်ကလည်း အထက်တန်းကျပါတယ်။ ဘယ်အရာ ဘယ်ကိစ္စမဆို သူမှန်လို့ကတော့ ဆတ်ဆတ်ထိမခံ ဒိတ်ဒိတ်ကျဲ ဟောဟောဒိုင်းဒိုင်းနဲ့ ပြောဆိုဖြေရှင်းတတ်သူပါ။ ဒါကြောင့် သူ့ကို ငယ်ငယ်က ကျွန်တော်ခဏ ခဏ ဆုံးမခဲ့ပါတယ်။ (ဆတ်ဆတ်ထိမခံ ခွန်းတုန့်ပြန် ခင်မင်မှုလည်းရှုံး လူလည်းမုန်း၏။) လို့ ပြောဆိုခဲ့ဘူးပါတယ်။ အင်း.. ပညပ်သွားရာ ဓာတ်သက်ပါတယ် လို့ဘဲ ဆိုရမလား။ သူငယ်ချင်းမိမိုးရဲ့ မိသားစု အိမ်တွင်းရေးတွေကို ကျွန်တော့်အား ငယ်သူငယ်ချင်း မိမိုးက ငိုပြီးပြောဆိုနေပါတယ်…။
မိမိုးဟာ မကွေးကောလိပ်ကဆင်းပြီး တစ်မြို့တည်းသား ငယ်ချစ်ဦး အရာရှိတစ်ယောက်နဲ့ အိမ်ထောင်ကျ သွားခဲ့ပါတယ်။ အဲဒီလူက မျိုးရိုးမကောင်းလို့ဆိုပြီး မိမိုးရဲ့မိဘတွေက လုံးဝသဘောမတူခဲ့ပါဘူး။ အဲဒီခေတ်က အရာရှိတစ်ဦးဆိုတော့ စီးပွားရေးမှာ အလွန်ချမ်းသာကြွယ်ဝခဲ့ပါတယ်။ မိမိုးတို့လင်မယား မှာ သားနှစ်ဦး မွေးဖွားခဲ့ပါတယ်။ အဲ.. ကျွန်တော်တို့ လူမျိုးကလည်း ရာထူးလေးများရလာရင် မြောက်ကြွကြွဖြစ်လာတတ်ပါ တယ်။ သားအကြီးကောင်လေး အလယ်တန်းအောင် လို့ သားအငယ်လေး မူလတန်းကျောင်း စထားတဲ့အချိန်ကာလမှာ မိမိုးရဲ့ လင်တော်မောင် အရာရှိက နောက်အိမ်ထောင်ပြုသွားခဲ့ပါတယ်။ မိမိုးက ဆတ်ဆတ်ထိမခံ စိတ်ထက်ပေမယ့် သားကိုသခင် လင်ကိုဘုရား လိုထားခဲ့သူပါ။ မယားဝတ္တရား၊ မိခင်ဝတ္တရားများကို ကျေပွန်ခဲ့သူပါ။ သားလေးတွေရဲ့ ရှေးရေးကိုကြည့်ပြီး သူ့လင်တော်မောင် ယူထားတဲ့ မယားငယ်ဆီကို သွားပြီး အကြိမ်ကြိမ်အခါခါ အောက်ကျခံ တောင်းပန် ခဲ့ပါတယ်။ ဒါပေမယ့် မရခဲ့ရှာပါဘူး။ ဒီပြဿနာကို အထက်လူကြီးတွေဆီကိုလည်း မတိုင်ကြားခဲ့ပါဘူး။ ဒီလိုနဲ့ လင်တော်မောင်အရာရှိက မိမိုးတို့ သားအမိသုံးယောက်ကို ပစ်ထားခဲ့ပြီး ဝေးရာသို့ ပြောင်းရွေ့သွားပါတယ်။ မိမိုးလည်း ဌာနတစ်ခုမှာ အလုပ်ဝင်လုပ်ပြီး သားနှစ်ယောက်ကို ကျောင်းထားပေးခဲ့ပါတယ်။မိမိုးဟာ လောကဓံကိုကြံကြံခံပြီး ရုန်းကန်ကြိုးစားခဲ့ပါတယ်။ သားအကြီး ကောင်လေးကို ပညာတတ်ကြီးဖြစ်အောင် သူ့ဖခင်ထက် သာတဲ့ အရာရှိကြီးဖြစ်စေရအောင် မြေတောင်မြှောက်ပေးခဲ့ပါတယ်။ မိမိုးမျှော်မှန်းခဲ့တဲ့အတိုင်း သားအကြီးက သူ့ဖခင်ထက်မြင့်တဲ့ အရာရှိကြီးဘ၀ကို ရောက်သွားခဲ့ပါတယ်။ ဖတစ်ဆိုး သားနှစ်ယောက်ကို ပညာတတ်တွေ ဖြစ်အောင် ကြိုးစားခဲ့သော်လည်း သားအငယ်လေးက အထက်တန်းမအောင် ပါ။ ဖတစ်ဆိုးလေးဆိုပြီး အလိုလိုက်ခဲ့မိလို့ ဆိုးသွမ်းလူငယ်လေးတစ်ဦး ဖြစ်နေရှာပါတယ်။ အကိုကြီး အဖအရာ ဆိုပြီး မျှော်လင့်ခဲ့တဲ့ သားကြီးကလည်း အိမ်ထောင်ပြုသွားပါတယ်။ သားအကြီးကောင်က မိခင်နဲ့ ညီလေးကို လုံးဝပြန်မကြည့်ခဲ့ပါဘူး။ (ဖမျိုး ဘိ်ုးတူ) ဆိုတဲ့ ရှေးစကားပုံက မှန်တာလား။ (မျိုးစေ့မမှန် ပင်မသန်၊ ဖူးတန်လည်းကင်း၊ အသီးဖျင်း၏) ဆိုတဲ့ ရှေးစာဆို စကားများကဘဲ မှန်သလား မသိပါ။ အိမ်ထောင်ကျသွားတဲ့ သားကြီးမှာ ကလေးနှစ်ယောက်ရပါတယ်။ သားလေးတစ်ဦး သမီးကလေးတစ်ဦး မွေးပါတယ်။ သားသမီးအချစ်၊ မြေးအနှစ် ဆိုတဲ့စကားပုံအတိုင်း မိမိုးမှာ သူ့သားက ကျေးဇူးမသိတတ်သော်လည်း ချွေးမကို မျက်နှာချိုသွေးပြီး မြေးလေးတွေကို ပြေးကြည့်ပါတယ်။ အဝေးခရီးကို တစ်နှစ် တစ်ခါ တစ်ခေါက်လောက်တော့ ရောက်အောင်သွားပြီး မြေးတွေကို ချစ်နေရပါတယ်။ အဲ.. မိမိုးရဲ့မြေးကောင်လေး မူလတန်းကျောင်း စထားတဲ့ နှစ်မှာ မိမိုးရဲ့ သားကြီး အရာရှိကြီးလုပ်သူက မယားငယ် ယူသွားကြောင်း ကြားသိလိုက်ရပြန်ပါတယ်။ မိမိုးခမျာ…. မြေးလေးနှစ်ယောက်ကိုဖက်ပြီး ချုံးပွဲချ ငိုလိုက်ရ ပါတယ်။ မိမိုးဟာ အားကြီးမောတဲ့ သားသမီးဇောထက် မြေးဇောအတွက် ချွေးဇော်ပြန်နေရပြန်ပါပြီ..။ သူ့ သားကြီး လူမိုက်တို့ လင်မယားစုံတွဲရှိရာနေရာကို စုံစမ်းပြီး အပြေးအလွှား အရောက်လိုက်သွားခဲ့ပါတယ်။ သူ့ရဲ့ သားကြီးကို တွေ့လိုက်ရတော့ မိမိုး တော်တော်မျက်လုံးပြူးသွားပါတယ်။ တစ်သက်လုံးက ဆေးလိပ်တောင် မသောက်တတ်တဲ့ မိမိုးရဲ့ သားကြီးဟာ အရက်သောက်ပြီး မူးနေတာကိုမြင်လိုက်ရပါတယ်။ သူ့သားကြီးဘေးက မယားငယ်ဆိုသူမိန်းကလေးက အရက်ငဲ့ပေးနေပါတယ်။ မိမိုးလည်း တစ်သက်လုံးက မမြင်မတွေ့ရဘူးတဲ့ မြင်ကွင်းကြောင့် စိတ်ဆိုးသွားပါတယ်။ အရက်ဝိုင်းက ပုလင်းကိုဝင်ဆွဲပြီး သူ့သားကြီးရဲ့ဦးခေါင်းကို ရိုက်ချလိုက်ပါတယ်။ သူ့သားကြီးက ခေါင်းကိုစောင်းပြီးရှောင် လိုက်ပါတယ်။ မိမိုးရဲ့ လက်ထဲက တအားလွှဲရိုက်လိုက်တဲ့ ပုလင်းမှာ စားပွဲကိုထိပြီး ပုလင်းကွဲစတွေနဲ့ မိမိုးရဲ့ လက်ကို စိုက်ပြီးစူးသွားခဲ့ပါတယ်။ အရိုက်ခံရတဲ့သူ့သား လင်မယားက ထပြီး ဝေးရာကို ပြေးသွားပါတယ်။ မိမိုးလည်း အရှုးမကြီးတစ်ယောက်လို အော်ဟစ်ပြောဆိုပြီး ငိုယိုနေပါတော့တယ်။ မိမိုးမှာ စိတ်ဒေါသကြီးပြီး သူ့သားကြီးရဲ့ ဌာနက လူကြီးတွေကို တိုင်ကြားခဲ့ပါတယ်။ သူ့သားကြီး အရာရှိမှာ အလုပ်ပြုတ်ပြီး ထောင်ကျသွားပါတယ်။ မိမိုးရဲ့ ညာဘက် လက်တစ်ဖက်လည်း ပြတ်နေပါတယ်။ ညာဘက်လက်က တစ်ထောင်ဆစ်အထိပြတ်နေတာကို မေးကြည့်တော့ မိမိုးမှာ ဆီးချိုးရောဂါကြောင့် ပုလင်းကွဲစူးခဲ့တဲ့ လက်ကအနာမပျောက်ဘဲ တစ်ထောင်ဆစ်ထိ ဖြတ်ပြီးကုသ လိုက်ရကြောင်း သိရပါတယ်။ ယခုတော့ မိမိုးမှာ သူ့မြေးလေးနှစ်ယောက်ကို သူက ခေါ်ယူမွေးထားခဲ့ပါတယ်။ မိမိုးရဲ့ သားအငယ်ကောင် ဆိုးသွမ်းလူငယ်လေးမှာ အကိုလူဆိုးကြီးဘ၀ကို နောင်တရပြီး လူကောင်းလေး ဖြစ်သွားပါတယ်။ သူဦးဆောင်ပြီး အမေနဲ့ တူ၊တူမလေးနှစ်ဦးတို့ကို (ကားစပယ်ယာဘ၀) နဲ့ လုပ်ကိုင်ကျွေးမွေး စောင့်ရှောက် နေကြပါတယ်။
သူငယ်ချင်း မိမိုးရဲ့ဘ၀ဇာတ်ကြောင်းအစုံကို နားထောင်ခဲ့ရပြီး ကျွန်တော်အပြန်လမ်းတွင် မိမိုးက သူ့သားကြီးထံပြေး၍ လိုက်နေတုံးမှာ အော်ပြီးပြောနေသောစကားများကို ပြန်လည်ကြားယောင်နေမိပါတယ်။
`` ဟဲ့ သားကြီးလူမိုက်၊ မပြေးပါနဲ့ မပြေးပါနဲ့ ငါက အမေအရင်းပါ..၊ ငါ့သွေးသားကိုမတူဘဲ အဖေသွေးကို သွားတူနေတယ်။ မင်းကိုမွေးခဲ့ရတာ ငါအမေ၀မ်းရေစပ်လှပါတယ်။ မင်းကို ဒီလိုဘ၀မျိုးရောက်အောင် လူမိုက်ကြီးဖြစ်အောင်လို့ အမေပြုစုပျိုးထောင်ပေးခဲ့တာမဟုတ်ပါဘူး။ အေး မင်းက မလိမ်မာတော့ ငါအမေအရင်းဖြစ်သော်လည်း မင်းလိုသားမျိုးတွေကို ခြေမ မကောင်းရင် ခြေမကိုဖြတ်မယ်။ လက်မ မကောင်းရင် လက်မကိုဖြတ်မယ်။ ပြန်လာခဲ့စမ်း ပြန်လာခဲ့စမ်းပါ..။ ငါက အမေအရင်းပါ..သားရယ်၊ ငါ့သွေးလေးနဲ့ တစ်စက်လောက်တော့ တူပေးလိုက်စမ်းပါ။ ယခုတော့ မင်းနဲ့ ငါ့မြေးလေးတွေဘ၀အတွက် ငါ့ရင်တွေ ငါ့အသဲနှလုံးတွေ တစ်စဆီ တစ်စဆီ ကျေကွဲနေရပါပြီ.. ´´။
မိခင်ကံဆိုးမ မိမိုးက ပြန်လည်ပြောပြသော ဖြစ်ရပ်မှန် ဇာတ်လမ်းလေးကို မိခင်မေတ္တာဖွဲ့ ရသစာတမ်း တစ်စောင် အဖြစ်ရေးသား လိုက်ရပါသည်။ (မြန်မာ့ယဉ်ကျေးမှုအတိုင်း တစ်လင် တစ်မယားစနစ် ထူထောင်နိုင်ကြပါစေ..။)
ရွှေလမ်းငွေလမ်းဝင်းကြည်
0 comments:
Post a Comment