http://shwelannwelan.googlecode.com/files/SANY0055.JPG
http://shwelannwelan.googlecode.com/files/SEQT0402.JPG
``ဆိပ်ဖြူမြို့နယ် ယောချောင်း ချောင်းကျရေကြီး၍ ကျေးရွာပေါင်း(၂၅)ရွာ ရေဘေးဒုက္ခ´´
၁၉-၁၀-၂၀၁၁၊ နေ့၊ ည(၁၂) နာရီခန့်အချိန်တွင် ရခိုင်ပြည်နယ်မှ မုန်တိုင်းကြောင့် မိုးကြီး၍ ဆိပ်ဖြူမြို့နယ် ယောချောင်း ချောင်းရေကျ ရေကြီးမှုဖြစ်ပေါ်ကြောင်းသိရ ပါသည်။ ယောချောင်းအစ ချောင်းဖျားအထက် လဲသာဝရွာ မှ ယောချောင်းအောက်ဆုံး ဧရာဝတီမြစ်ဝတွင်ရှိသော တူရွင်းမျှောရွာ အထိ ကျေးရွာပေါင်း(၂၅)ရွာရှိကြောင်း၊ ယောချောင်းအရှည်မှာ(၃၃)မိုင် ခန့်ရှည်လျှားကြောင်း သတင်းရရှိပါသည်။ ၂၁-၁၀-၂၀၁၁ နေ့၊ နံနက်(၈)နာရီတွင် ဆိပ်ဖြူမြို့သို့ သွားရောက်သတင်းယူခဲ့ပါ သည်။ ကယ်ဆယ်ရေးသွားရောက်ကြမည့် တာဝန်သိ မြို့ခံပုဂ္ဂိုလ် (မကွေးတိုင်းဒေသကြီး လွှတ်တော်ကိုယ်စားလှယ်) ဦးမြင့်စိုးထံမှ ယောချောင်းရေကြီးခြင်း သတင်းအစုံ အား တွေ့ဆုံ မေးမြန်းခဲ့ပါ၏။
``ဒီယောချောင်းရေဘေးက ၁၉၆၇ ခုနှစ်၊ အောက်တိုဘာ(၂၀)ရက်မှာ တစ်ကြိမ်ဖြစ်ပါတယ်။ နောက်မနှစ်က ၂၀၁၀ ခုနှစ်၊ အောက်တိုဘာ(၂၄)ရက်ကတစ်ခါကျပါတယ်။ ယခု ၂၀၁၁ ခုနှစ်၊ အောက်တိုဘာ(၂၀) မှာ ရေကြီးပြန်ပါတယ်။ ယောချောင်းရေက၁၉၆၇ ခုနှစ်အရင်က နှစ်ပေါင်း(၆၀) မှာ တစ်ကြိမ်ရေကြီးခဲ့တာကို ကြားဘူးပါတယ်။ ၁၉၆၇ ခုနှစ်က ယခုနှစ်ထိဆိုတော့ နှစ်ပေါင်း(၃၀)ခန့် မှာ ယခုရေကြီးတာပါ။ မနှစ်က ၂၀၁၀မှာ ဂီရိမုန်းတိုင်းဆိုတော့ ကြောက်ကျတာပေါ့။ ယခုနှစ်၂၀၁၁ က မုန်တိုင်းငယ်ဆိုတော့ လူတွေက ပေါ့သွားတာလည်းပါကြပါတယ်။ ဒါပေမယ့် ယောချောင်းအထက်မှာ ရှိတဲ့ရွာတွေက CDMA ဖုန်းတွေရှိတော့ အဆင့်ဆင့် ဖုန်းဆက်ပြီး သတင်းကြိုပို့ကြတော့ ကြိုတင်ပြင်ဆင်ချိန်များ ရကြပါတယ်။ အဲ(၁၉) (၂၀)ရက်နေ့တွေမှာ ဖုန်းတွေဆက်လို့ရပါတယ်။ ဖုန်းလိုင်းကလည်း ချောင်းကျနေတဲ့နေ့က လိုင်းကောင်းနေလို့တော်သေးတာပေါ့။ နောက်နေ့ ၂၁-၁၀-၂၀၁၁ နေ့ ကယ်ဆယ်ရေးတွေထွက်ဖို့ဆက်သွယ်ရန် မေးတော့ ဖုန်းလိုင်းတွေက တစ်မနက်လုံး ဖုန်းလိုင်းတွေပြတ်တောက်နေပါတယ်။ ဒီလို ဘေးဒုက္ခဖြစ်တဲ့အချိန်မှာ ဖုန်းလိုင်းတွေ ကောင်းနေဖို့ အရေးကြီးပါတယ်။ ယခုယောချောင်းရေကတော့ ၁၉၆၇ ခုနှစ်က ရေဘေးထက်ပိုပြီးကြီးပါတယ်။ အဲဒီအချိန်တုံးက မှတ်တမ်းအရ ရွာမမြောက်ရွာ အလိုတော်ပေါက်ဘုရားကုန်းက ခြင်္သေ့နှစ်ကောင် ပါးစပ်ထိရေရောက်တယ်လို့သိရပါတယ်။ မနှစ်က၂၀၁၀ ခု ချောင်းရေကြီးတာက အလိုတော်ပေါက်ဘုရားကုန်း ခြင်္သေ့ ဘိနပ်ခုံထိရောက်ပါတယ်။ ၂၀၁၁ ယခုနှစ်ရေကြီးတာကတော့ အလိုတော်ပေါက်ဘုရားကုန်းက ခြင်္သေနှစ်ကောင်လုံး ရေမြုပ်သွားခဲ့ပါတယ်။ ယောချောင်းအထက် ရေစပြီး တိုးလာတာကတော့ ၁၉-၁၀-၂၀၁၁ နေ့ ည(၁၂) (၁) နာရီခန့်မှာ ရေတွေစတိုးလာတယ်လို့ သိရပါတယ်။ ရေပြန်ကျသွားတာကတော့ ၂၀-၁၀-၂၀၁၁ နေ့ နေ့(၁၂) နာရီလောက်မှာ ချောင်းရေပြန်ကျသွားခဲ့ပါတယ်။ မနေ့ကတော့ ကျွန်တော်တို့အဖွဲ့ သွားရသလောက်တော့ ၀င်ရောက်ခဲ့ပါတယ်။ ယနေ့လည်း ချောက်မြို့က မနောဖြူ နာရေးကူညီမှုအသင်းက ကားနဲ့ ကယ်ဆယ်ရေးပစ္စည်းများ၊ ဆရာဝန်များနဲ့ ယခုထွက်ကြတော့မှာပါ။ ဟိုမှာလည်း ဆိပ်ဖြူမြို့နယ်အုပ်ချုပ်ရေးမှူးကြီးကြပ်ပြီး ကြက်ခြေနီ၊ မီးသတ်၊ ကျမ်းမာရေးဌာနစတဲ့ ကယ်ဆယ်ရေးစခမ်းတွေ ရောက်နေကြပါပြီ..။´´
ယောချောင်းရေကြီးမှုကြောင့် ရွာတွေပျက်စီးမှု၊ လူအသေအပျောက်၊တိရိစ္ဆာန် အသေအပျောက် ဆုံးရှုံးမှု တန်ဘိုးများကို မေးမြန်းရာတွင်..၊
`` ပျက်စီးမှုအခြေအနေကတော့ မနေ့က(၂၀-၁၀-၂၀၁၁) မှာ ကျွန်တော်တို့ရောက်ခဲ့တဲ့ရွာတွေဖြစ်တဲ့ ကဘိုင်ရွာ ဆိုရင် အိမ်ခြေ(၆၀) ခန့် ချောင်းရေထဲမျှောပါပြီး ပျက်စီးပါတယ်။ မုန်တိုင်းကြေင့် လေဆင်နှာမောင်းတိုက်ခံရလို့ သံချောင်းကုန်းကျေးရွာမှာ အိမ်ခြေ(၈၁)ပျက်ပါတယ်။ ရှားလှကျေးရွာက ချစ်ချောင်းရေကျလို့(ယောချောင်းလက်တက်) အိမ်ခြေ(၁၅) အိမ်ပျက်စီးပါတယ်။ အခြားရွာတွေကလည်း အိမ်ခြေ တစ်ဝက်ခန့် မျှောပါ ပျက်စီးကြပါတယ်။ ဒီယောချောင်းထဲမှာ ကြက်သွန်ခင်းတွေစိုက်ပျိုးကြပါတယ်။ ကြက်သွန်ဈေးကလည်းမကောင်း။ ယခု ယောချောင်းရေကလည်း ထပ်ကြီးလိုက်တော့ နူရာဝဲစွဲ ဖြစ်ကြရပါတယ်။ လူအသေ အပျောက်ရှိပါတယ်။ ကျွန်တော်သိသလောက်ပြောရရင် ပင်လဲရွာမှာ လူ(၂)ဦး၊ စလောက်ရွာက အဘိုးကြီး၊ အဖွားကြီး (၂)ဦး၊ ကဘိုင်ရွာ (၁)ဦး၊ စုစုပေါင်း(၅)ဦး သေဆုံးကြောင်း သိရပါတယ်။ ကျွဲ၊ နွား၊ ဆိတ်၊ ၀က်၊ တိရိစ္ဆာန်တွေလည်း အသေအပျောက်ရှိကြပါတယ်။ မနေ့ကဆိုရင် ယောချောင်းဝအထွက် ဧရာဝတီမြစ်ထဲမှာ အိမ်တွေ၊ နွားတွေ၊ ကျွဲတွေ၊ ၀က်တွေ၊ ၀ါးတွေ၊ သစ်တွေ၊ ပေပါတွေ မျှောပါနေကြတာကို မြင်ကြရပါတယ်။ ဧရာဝတီမြစ်ထဲမှာ လှေတွေနဲ့ ဆယ်ယူနေသူတွေကိုလည်း တွေ့မြင်ရပါတယ်။ တစ်ချို့ကလည်း ဆယ်ယူပြီး ပြန်ပေးကြပါတယ်။( ဆိပ်ဖြူမြို့၏ မြောက်ဘက်မှ ယောချောင်းသည် အနောက်မှအရှေ့သို့ စီးဆင်း၍ ဧရာဝတီမြစ်တွင်းသို့ စီးဝင်ပေါင်းဆုံသောဓာတ်ပုံဖြစ်ပါသည်။) အသေ အပျောက် စာရင်းကတော့(၂၁-၁၀-၂၀၁၁)နေ့အထိ အတိအကျ မသိရသေးပါဘူး။ ယခု ကယ်ဆယ်ရေးလုပ်ငန်းကတော့ ထမင်းထုပ်များသာ ဝေငှနိုင်ပါတယ်။ ယောချောင်း ချောင်းကျ ရေကြီးမှုကတော့ ချောင်းဘေးကရွာပေါင်း(၂၅)ရွာ ရေဘေးဒုက္ခခံလိုက်ကြရပါတယ်။ ဒါကြောင့် ကျွန်တော်တို့ ဆိပ်ဖြူမြို့နယ်၊ ချောက်မြို့နယ်များအနေနဲ့ ကယ်ဆယ်ရေးကိစ္စများ ကူညီဆောင်ရွက်ပေးဖို့ မလုံလောက်ပါဘူး။ ဒါကြောင့် သက်ဆိုင်ရာ အနယ်နယ် အရပ်ရပ်မှ မိဘပြည်သူများ၊ အစိုးရအဖွဲ့ဌာနဆိုင်ရာများ၊ ပြည်တွင်း၊ ပြည်ပမှ NGO အဖွဲ့များ အနေနဲ့ အမြန်လာရောက် ကူညီပံ့ပိုးဆောင်ရွက်ပေးကြပါရန် တိုက်တွန်းနိုးဆော်လိုက်ပါရစေ..။´´ဟု ဦးမြင့်စိုးက ပြောဆိုပါသည်။
ရွှေလမ်းငွေလမ်းဝင်းကြည်
မော်နီတာ ဂျာနယ်တွင် ဖော်ပြပြီး။
0 comments:
Post a Comment