ခရီးသွား လုပ်ငန်း ဥက္ကဋ္ဌ မှ ပြည်တွင်းမီဒီယာများကို ပြင်းထန်စွာ ဝေဖန်
ရန်ကုန်၊ နိုဝင်ဘာ ၁၅
ဟိုတယ်နှင့် ခရီးသွားလာရေး လုပ်ငန်းဆိုင်ရာ အစိုးရ မဟုတ်သော အဖွဲ့အစည်းများတွင် အမြင့်ဆုံး အဖွဲ့အစည်းဖြစ်သည့် မြန်မာနိုင်ငံခရီးသွား လုပ်ငန်းအဖွဲ့ (MPT)၏ ဥက္ကဋ္ဌဖြစ်သူ စီးပွားရေးလုပ်ငန်းရှင် ဇေကမ္ဘာ ဦးခင်ရွှေက ၎င်း စီစဉ်ကျင်းပသော ASEAN- Japan Business Meeting သတင်းအပါအ၀င် ၀န်ကြီးများရုံးအား ထိန်းသိမ်း သင့်သည်ဟူသော သတင်းများနှင့် ပတ်သက်ပြီး ပြည်တွင်း မီဒီယာများတွင် ဖော်ပြထားချက်များကို ပြင်းထန်စွာ ဝေဖန်ပြောကြားလိုက်သည်။
ရန်ကုန်မြို့တော် ယုဇနဂါးဒင်း ဟိုတယ်တွင် ၂၀၁၁ ခုနှစ် နိုဝင်ဘာလ ၁၅ ရက်နေ့က ကျင်းပခဲ့သော (၂၈) ကြိမ်မြောက် မဟာမဲခေါင် ဒေသခွဲ ခရီးသွားလုပ်ငန်း အစည်းအဝေး၊ ခရီးသွားလုပ်ငန်းပြပွဲ၊ ဓာတ်ပုံပြပွဲများ၊ ပုဂံတွင် ကျင်းပမည့်အကြောင်း သတင်းထုတ်ပြန်ခြင်း အခမ်းအနားတွင် ၎င်းက အထက်ပါအတိုင်း ဝေဖန် ပြောဆိုလိုက်ခြင်း ဖြစ်သည်။
``ထိုက်ထိုက်တန်တန် လူကြီးမင်းလို့ခေါ်၊ ကောင်းကောင်းမွန်မွန် ကျွေး၊ ဆီဒိုးနားမှာ ခေါ်တယ်၊ ကျွေးတယ်၊ စာအုပ်တွေပေးတယ်၊ နေ့လယ်စာတွေ ကျွေးတယ်။ ဘယ်ဂျာနယ်မှာမှ အာဆီယံ- ဂျပန် အကြောင်းကို မရေးခဲ့ဘူး။ အာဆီယံ နိုင်ငံတွေက လူတစ်ရာကျော် လာတဲ့ဟာကို မရေးကြဘဲနဲ့ မဟုတ်က ဟုတ်ကတွေ ရေးတယ် ဆိုကတည်းက တော်တော်လေး ကို စိတ်ဓာတ်ကျစရာ ကောင်းပါတယ်။ ကောင်းတာ မမြင်တဲ့ သဘောမျိုး ဖြစ်နေတယ်။ နိုင်ငံတော်က သွားနေတဲ့ ကောင်းတဲ့လမ်းကြောင်းကို တစ်ဖက်သတ် မကောင်း၊ အသိအမှတ် မပြုသလို ဖြစ်နေတယ်..´´။ ဟုလည်း ၎င်းက ဆက်လက်ပြောကြားသည်။
``မီဒီယာတွေနဲ့ တွေ့ဖို့ကို တော်တော် စိတ်ပျက်တယ်။ ပြည်ပ မီဒီယာတွေက မကောင်းမြင်ဖို့ လုပ်တာက သူ့အလုပ် သူ လုပ်တာ။ ပြည်တွင်း မီဒီယာတွေကလည်း မကောင်းမြင်မှ ဂျာနယ် ရောင်းရတယ် ဆိုတဲ့ အိုင်ဒီယာ ရှိနေရင်တော့ အတွေး တွေ မှားနေပြီ၊ လွဲနေပြီ..´´ ဟုလည်း ၎င်းက ဆိုသည်။
ရိုက်တာ သတင်းဌာနမှ ဦးအောင်လှထွန်းက ``ကျွန်တော်တို့ သတင်းသမားတွေက ဖြစ်ရင် ဖြစ်တဲ့အတိုင်း ရေးမှာပဲ၊ ပြောရင် ပြောတဲ့အတိုင်းရေးမှာပဲ၊ စားဖို့သောက်ဖို့ အတွက်တော့ ဘယ်သူမှ မလာဘူး။ သတင်းယူဖို့ပဲ လာတယ်။ သတင်းသမား ကတော့ မေးမှာပဲ။ ဒေါ်အောင်ဆန်းစုကြည်တောင် ပါတီ မှတ်ပုံတင်ဖို့ကို မမေးပါနဲ့ဆိုတာတောင် မေးတာပဲ။ ဒါကတော့ သတင်းသမားပဲ။ နားလည် ပေးရမှာပေါ့..´´။ ဟု ယင်းအခမ်းအနားတွင် ပြန်လည် တုံ့ပြန် ဆွေးနွေးခဲ့သည်။
ပြည်ပ မီဒီယာကြီးများသည် ပြောဆိုသည့် အတိုင်း ရေးသားကြ သော်လည်း ပြည်တွင်း မီဒီယာများသည် အတွေ့အကြုံနုသေးသည့် အတွက် ပြောသည့်အတိုင်း မရေးသောကြောင့် ကြောက်ရွံ့မိကြောင်း ရိုက်တာ သတင်းဌာနမှ ဦးအောင်လှထွန်း ပြောကြားချက် အပေါ် ဦးခင်ရွှေက ယင်းအခမ်းအနားတွင်ပင် ပြန်လည် ရှင်းလင်း ပြောကြားသည်။
ဦးခင်ရွှေ ထူထောင်ထားသည့် ဇေကမ္ဘာ ကုမ္ပဏီသည် ဆောက်လုပ်ရေး လုပ်ငန်း၊ ဟိုတယ်နှင့် ခရီးသွား လုပ်ငန်းနှင့် အခြားလုပ်ငန်းများ လုပ်ကိုင်သော ကုမ္ပဏီ ဖြစ်သည်။
Saturday, 19 November 2011
Written by The Voice Weekly မှ ကူးယူဖော်ပြထားပါသည်။
အထက်ပါ သတင်းကို ဖတ်ပြီး သတင်းသမားတစ်ယောက်ရဲ့ ခံစားချက်ကို ရင်ဖွင့်ပြောဆိုလိုက်မိပါတယ်..။
ရှေးလူကြီးများ ထားခဲ့သော စကားပုံက မှန်နေပါသည်။( မင်းပင်ကောင်းလျှက် မင်းမြှောင်ဖျက်၏) တဲ့။ လူကြီးမင်းက သတင်းသမားတွေကို စော်ကားတာပဲ။ သတင်းသမားတွေဆိုတာ ထမင်းစားဖို့၊ ချမ်းသာဖို့ သတင်းရေးနေတာ မဟုတ်ပါ။ အများပြည်သူနဲ့ တိုင်းပြည်ကောင်းစားရေးအတွက်ကိုသာ ဦးစားပေးပြီး ရေးသားနေကြတာပါ။ အကောင်းစား ဟော်တယ်ကြီးတွေမှာ သတင်းမီဒီယာသမားများကို ဖိတ်ကြားပြီး လက်ဆောင်ပေး၊ ထမင်းကောင်းကောင်းကျွေးပြီး လူကြီးမင်းတို့ စီးပွားရေးသမားကြီးတွေရဲ့ဆန္ဒအတိုင်း ရေးသားပေးမဲ့၊ အသုံးချခံမဲ့ သတင်းမီဒီယာသမားများ မဟုတ်ကြပါ။ တိုင်းပြည်ကောင်းစားအောင် ဆိုပြီး အသံကုန်ဟစ်အော်လို့ ( လူကြီးလာရင် အလံထောင်၊ အကြံအဖန်ကောင်တွေ ကောင်းတဲ့ခေတ်ပဲ..) ဆိုတဲ့ခေတ်က ကုန်လာပါပြီ..။ လူကြီးမင်းတို့ ကပ်ဖားစီးပွားရေးသမားကြီးတွေ တိုင်းပြည်အပေါ်မှာ စေတနာထားတာ ဘာကိုလိုချင်လို့ ဆိုတာ မြန်မာတစ်ပြည်လုံး၊ တစ်ကမ္ဘာလုံးက အများပြည်သူတွေသိနေပါတယ်။ ကိုယ့်သမိုင်းကို ကိုယ်ရေးနေကြတာပါ။
ဒါကြောင့် မီဒီယာကို မကူညီချင်နေပါ။ မစော်ကားကြပါနဲ့။ ခေတ်အဆက်ဆက်က ကပ်ဖားစီးပွားရေးသမားများ ဆက်လက်ရှင်သန်ကြီးပွားကောင်းစားရေးအတွက် ကျွန်တော်အပါအ၀င် မီဒီယာသမားများကို လုံးဝ(လုံးဝ) အသုံးချ မခံနိုင်ပါ။ ခေတ်အဆက်ဆက်မှာ မြန်မာပြည်ကောင်းစားရေးအတွက် (အကျိုးလိုလို့ ညောင်ရေလောင်းနေကြသူများ)ဟာ ဘယ်သူ ဘယ်ဝါ ဘာကောင်ကြီးတွေဆိုတာ မြန်မာပြည်အချိန်သမိုင်းမှာ မှတ်တမ်းတင်နေကြပါပြီ..။
သတင်းမီဒီယာသမားများမှာလဲ `ပစ္စည်းမဲ့ မာန´ ဆိုတာ ကိုယ်စီရှိတတ်ကြပါတယ်။ ပုဂ္ဂိုလ်ရေး အာဃာတ နဲ့ ပြောဆိုနေတာ မဟုတ်ပါ။ တိုင်းပြည်ကောင်းစားရေးကို အဓိကထားပြီး တင်ပြရေးသားရခြင်းဖြစ်ပါတယ်။ ဘယ်သူက လွန်တယ်၊ ဘယ်သူက မှားတယ်၊ မှန်တယ် ဆိုတာကိုတော့ စာဖတ်သူများ ဝေဖန်သုံးသပ်ပေးတော်မူကြပါခင်ဗျာ…။
0 comments:
Post a Comment