မကွေးမြို့မှ SHADE စာပေ၀ိုင်း (၄၇)
၉-၁၀-၂၀၁၁၊ တနင်္ဂနွေနေ့၊ နေ့(၁၂)နာရီမှ ညနေ(၄)နာရီအထိ မကွေးမြို့၊ ဈေးလယ်စိုးရပ်၊ မဲထီလမ်း၊ ပုည၀တီကျောင်း အတွင်းမှ (ဗုဒ္ဓဂုဏ်ရည်စာကြည့်တိုက်) မှာ ပေါင်းဆုံ ၀ိုင်းဖွဲ့ကြပါတယ်။ SHADE စာပေ၀ိုင်း(၄၇)ကြိမ် မြောက်ပါ။ ဒီတစ်ပတ် SHADE စာပေ၀ိုင်းတော်သားများကတော့ ဆရာကြီး မကွေးဝင်းမြင့်၊ စာကြည့်တိုက်မှူး ဦးတင်နု၊ စာကြည့်တိုက်အတွင်းရေးမှူး ဦးကျော်ခိုင်ဝင်း၊ စာကြည့်တိုက်ဘဏ္ဍာရေးမှူး ဦးကျော်စိန်ဝင်း၊ စာဖတ်သူ ကိုငြိမ်းချမ်းအောင်၊ ပန်းချီမင်းသူ၊ ပန်းချီမြင့်ဇော်ဦး၊ ဆရာဇော်မင်းကြည်၊ ဆရာနေခြည်(မကွေး) နဲ့ စာရေးသူတို့ဖြစ်ကြပါတယ်။
ဆရာကြီး မကွေးဝင်းမြင့်က စတင်ပြောဆိုပါတယ်။ ``လေးစားအပ်သော စာပေမိတ်ဆွေများခင်ဗျား..၊ ပုည၀တီကျောင်းတိုက် ပရ၀ဏ်အတွင်းမှာ ဖွင့်လှစ်ထားတဲ့ (ဗုဒ္ဓဂုဏ်ရည်စာကြည့်တိုက်)မှာ အမှာစကားစတင်ပြောကြားရလို့ ကျေးဇူးတင်ရှိပါတယ်။ ကြွရောက်လာတဲ့ စာပေမိတ်ဆွေများ ကျန်းမာ ချမ်းသာကြပါစေလို့ ပထမ ဆုတောင်း မေတ္တာပို့သ ပါတယ်။ ဒီနေ့ Shade စာပေ၀ိုင်းမှာ ဆွေးနွေးမယ့် အကြောင်းအရာကတော့ ယခင်အပတ်ကတည်းကကြိုတင်တောင်းဆို ထားတဲ့ ဖခင်ဂုဏ်ရည် ကိုဆွေးနွေးမှာဖြစ်ပါတယ်။ ဖခင်ရဲ့ဂုဏ် အဖေ့ရဲ့ ကြီးမားလှတဲ့ ဂုဏ်ကျေးဇူးကို ကျွန်တော့် ရှုထောင့်အမြင်မှ ဆွေးနွေးမှာပါ။ ဖခင်ရဲ့ဂုဏ်ဆိုတဲ့ စကားကလေးကြားလိုက်ရတော့ လွန်ခဲ့သော နှစ်ပေါင်း(၃၀)ကျော်က စာရေးဆရာ ရုပ်ရှင်မင်းသား ကိုသုမောင်ရေးသားခဲ့တဲ့ (အဖေကြီးတီးတဲ့ ရွှေကြေးစည်) ဆိုတဲ့ ၀ထ္ထုတိုလေးကို သတ်ိရမိပါတယ်။ ရှုမ၀မဂ္ဂဇင်းမှာ အဲဒီဝထ္ထုကလေးကိုဖတ်လိုက်ရပါတယ်။ အဲဒီအချိန်မှာ တောရော၊ မြို့ပါ ခေတ်စားနေတဲ့ သီချင်းကတော့ ရွှေကြေးစည် ဆိုတဲ့ ဆုတောင်းမေတ္တာပို့ ဓါတ်ပြားသီချင်းပါပဲ။ ယခုလို သီတင်း ၀ါလကျွတ်တဲ့အချိန် မကွေးမြသလွန်ဘုရားပွဲတော်မှာ ရွှေမန်းတင်မောင် ဇာတ်အဖွဲ့ လာရောက်ကပြလေ့ရှိပါတယ်။ ဘုရားအလောင်တော် ရွဲကုန်သည်ဇာတ်များ ကပြအသုံးတော်ခံသွားတာ ကောင်းပေ့ဗျာ ။ တောရော မြို့ပါ ၀က်ဝက်ကွဲ အားပေးကြတယ်။
သို့သော်လည်း ဇာတ်မင်းသားကြီး ရွှေမန်းတင်မောင်ဟာ မကွေးတိုင်း၊ မင်းလှမြို့နယ် လက်ပံရွာ မဟာပိန္နဲဘုရားပွဲတော်မှာ ဇာတ်ကရင်း ကွယ်လွန် အနိစ္စရောက်သွားပါတယ်။ ရွှေမန်းတင်မောင် ကွယ်လွန်သွားသော်လည်း ရွှေမန်းသဘင်ဇာတ် ကို သူ့သားများဖြစ်ကြတဲ့ ရုပ်ရှင်မင်းသား ညွှန့်ဝင်း၊ ဆန်းဝင်း၊ ၀င်းဗိုလ်၊ ချမ်းသာတို့က ဆက်လက်ထိမ်းသိမ်းလာခဲ့ကြပါတယ်။ အဲဒီခေတ်မှာ ရုပ်ရှင်မင်းသား ညွှန်ဝင်းက (ဗန်တိုလူလေးနဲ့ သူဇာ)ဆိုတဲ့ ရုပ်ရှင်ဇာတ်ကားကိုရိုက်ပါတယ်။ မြန်မာတစ်ပြည်လုံးမှာ အောင်မြင်ကျော်ကြားပါတယ်။ တစ်နေ့မှာ ဒီဇာတ်ကားအဆက် ဒုတိယပိုင်း ဇာတ်ကားရိုက်ဖို့ ကိုညွှန့်ဝင်း နဲ့ ရုပ်ရှင်အဖွဲ့သားတွေ တောရွာ တစ်ရွာကို ရောက်လာကြပါတယ်။ အဲဒီကျေးရွာက လူငယ်တွေ လူကြီးတွေ တစ်အုပ်တစ်မကြီးနဲ့ လာရောက်ကြည့်ရှု အားပေးကြပါတယ်။ ရုပ်ရှင်မင်းသား ညွှန့်ဝင်း သွားလေရာ နောက်ကိုလိုက်ပြီး ကြည့်ကြပါတယ်။ အဲဒီအချိန်မှာ ရွာထဲက အဘွားအိုကြီးတစ်ဦးကလည်း တောင်ဝှေးလေးထောက်ပြီး ရုပ်ရှင်မင်းသား ညွှန့်ဝင်း အနားကိုရောက်လာပါတယ်။ အသက်(၇၀)ကျော်ရှိတဲ့ အဘွားအိုဟာ ညွှန့်ဝင်းရဲ့ လက်မောင်းသားလေးကို တုန်ချိချိနဲ့ လှမ်းကိုင်လိုက်ပါသတဲ့..။ ရုပ်ရှင်မင်းသား ညွှန့်ဝင်းကလည်း အဘွားအိုကို လေးလေးစားစားနဲ့ စကားပြန်ဆိုလိုက်ပါတယ်။ ``အမေ..ကျွန်တော် ညွှန့်ဝင်း ပါ..။´´ လို့ပြောလိုက်တော့..၊ အဘွားအိုက သူ့နဖူးပေါ်မှာ နေရောင်ကျနေတာကို လက်ကလေးနဲ့ ကာတဲ့ပြီး…( ညွှန့်ဝင်း ဆိုတာငါမသိပါဘူးဟယ်..။ ကိုတင်မောင်သားလေး ဆိုလို့လာကြည့်တာပါကွယ်..)။ လို့ အဘွားအိုက ပြောလိုက်သတဲ့။ ကြည့်စမ်း အဖေ့ရဲ့ဂုဏ်။ သားထိအောင်ကို ထင်ဟပ်နေပါတော့တယ်..။ အဲဒါ ဖခင်ရဲ့ဂုဏ်ရည်ပါပဲခင်ဗျား..။ ဟု ဆရာ မကွေးဝင်းမြင့် က ပြောဆို သွားခဲ့ပါတယ်။
ကိုကျော်ခိုင်ဝင်း ကတော့ ဒီလိုဆိုလာပါတယ်။ မကွေးသတင်းများများပါစေချင်ပါကြောင်း။ ယနေ့ခေတ်ဟာ သတင်းခေတ်ပါ။ ဒါကြောင့် သတင်းကိုသာဖတ်ချင်နေကြပါတယ်။ စာနယ်ဇင်းစတုထ္ထမဏ္ဍိုင်ဆိုတာ တကယ်ဖြစ်ပြီလား စတဲ့ အကြောင်းတွေကို အကျယ်တ၀င့် စိတ်ပါဝင်စားစွာ အားပါးတရပြောဆိုဆွေနွေးသွားပါတယ်။ ပန်းချီမင်းသူ ကလည်း ဒီလိုဆိုပါတယ်။ ဆရာမင်းအုပ်စိုးရဲ့ သရပါမဂ္ဂဇင်းထဲက (ချိုပြံး သီချင်းဆိုမယ်…) ဆိုတဲ့အကြောင်း ယနေ့ခေတ် တိုးတက်နေတဲ့ သီချင်းစာသားစာလုံးလေးတွေ ပေါ်လာတာတွေ သံစဉ်တွေကို လိုတိုး ပိုလျှော့ လုပ်လို့ရနေတဲ့ (ကွန်ပျူတာခေတ်)အကြောင်းကို အကျယ်တ၀င့် ပြောဆိုသွားပါတယ်။ ဆရာဇော်မင်းကြည်ကလည်း စာပေ၀ိုင်းမှာ သတ်မှတ်ထားတဲ့အတိုင်း ကိုယ်ပြောချင်တာတွေနဲ့ တိုက်ဆိုင်တဲ့စာအုပ်ကိုရှာပြီးဖတ်မှတ်ပြီးပြောဆိုပါကြောင်း။ ဆရာကြီး မကွေးဝင်းမြင့်ကစပြီး ၀ိုင်းတော်သားတွေအားလုံးက ပြောလေ့ပြောထရှိတဲ့အကြောင်းတွေကို ကိုဇော်မင်းကြည်မှ သုံးသပ် ဝေဖန် ပြောဆိုသွားပါတယ်။ ကိုကျော်စိန်ဝင်းကလည်း SHADE ဂျာနယ်ထဲက ရှိတ်စာပေ၀ိုင်းမှာ ဆရာကြီး မကွေးဝင်းမြင့်ပြောကြားခဲ့တဲ့ (အလွန်သည်းခံတတ် ဘုန်းတော်ကြီးတစ်ပါး) အကြောင်းကို သဘောကျ နှစ်ချိုက်မိပါကြောင်း၊ ပတ်ဝန်ကျင်တစ်လောကလုံးမှ လူသားတွေရဲ့ ဒေါသ၊ သောက၊ မောဟ၊ ပရိဝေဒ တွေကို (သြော်..ဟုတ်လား..?။) ဆိုတဲ့ စကားတစ်လုံးတည်းနဲ့ ကျော်လွှားအနိုင်ယူသွားတာကို သင်ခန်းစာယူမိလိုက်ပါကြောင်း ကို ပြောဆိုသွားပါတယ်။ ဆရာနေခြည် ကတော့ ရှိတ်စာပေ၀ိုင်း ကို အခြေအနေနဲ့ အချိန်အခါကြည့်ပြီး သက်ဆိုးရှည်စေရန် ထိမ်းထိမ်းသိမ်းသိမ်း ပြုလုပ်လာခဲ့ရပါကြောင်း၊ မကွေးစာနယ်ဇင်းလောကမှာ ဂျာနယ်လစ်တွေထဲက သတင်းနဲ့ပတ်သက်ရင် သက်ဆိုင်ရာ (လူကြီး)ပုဂ္ဂိုလ်တစ်ဦးက မမှန်မကန်အထက်စီးကနေပြီး ကျွန်တော်တို့အား အရေးယူပါတယ်။ ဒီကိစ္စကို ကျွန်တော်တစ်ဦး တည်း ပြတ်ပြတ်သားသား မှန်ကန်တဲ့လမ်းကြောင်းနဲ့ ရင်ဆိုင်ခဲ့ဘူးပါကြောင်း၊ အဲဒီအချိန်က ကျွန်တော်နဲ့အတူ ပြဿနာတက်ရာမှာ ဖြေရှင်းဖို့ပါလာတဲ့ သတင်းထောက်ကြီးဆိုသူတစ်ဦးဟာ ပြဿနာကို ရဲဝင့်စွာနဲ့ မဖြေရှင်းပဲ ထွက်ပြေးတိမ်းရှောင်သွားခဲ့ပါကြောင်း ဆရာနေခြည်က ပြောဆို ဆွေးနွေးသွားပါတယ်။ ရသ အနေနဲ့ကတော့ ၂၀၁၀ ခု အတွေးအမြင် မဂ္ဂဇင်းထဲက ဆရာမိုးဟိန်း (ခ) သားဂျာနယ်ကျော် ရေးသားထားတဲ့ ကဗျာလေးကို မဟေသီမဂ္ဂဇင်းမှာ ထပ်မံဖော်ပြထားတာကို ဖတ်လိုက်ရပါတယ်။ ဒီဆရာ မိုးဟိန်း(ခ) သားဂျာနယ်ကျော်ဟာ(၂၀၁၀၊ စက်တင်ဘာလ(၂၃)ရက် နေ့မှာ) ကွယ်လွန်သွားခဲ့ပါပြီ.။ ဆရာကြီးဟာ နိုင်ငံခြားမှာ ဘွဲ့ယူပြီး ခေတ်ပညာတတ်တစ်ယောက်ပါ။ စာပေလောကမှာလည်း ထင်ရှားကျော်ကြားခဲ့သူတစ်ဦးပါ။ လူမှုရေးပရဟိတလုပ်ငန်းတွေနဲ့ ဘာသာရေး၊သာသနာရေး ဘက်မှာလည်း မသေခင်မှာ အတော်ကျင့်ကြံ အားထုတ်ခဲ့သူ နာမည်ကျော်တစ်ဦးဆိုတာ အများသိကြပါတယ်။ ဆရာသားဂျာနယ်ကျော်က မသေခင်ကာလမှာ မရဏဆိုတဲ့ သေခြင်းတရားကို ကြိုတင်ပြီးရဲရဲဝင့်ဝင့်ရင်ဆိုင်ထားသူတစ်ယောက်ဖြစ်ပါလိမ့်မယ်။ မသေမီက သူရေးသွားခဲ့တဲ့ ကဗျာလေး ခေါင်းစဉ်ကတော့ (မှာပါရစေ..) တဲ့။ နံပါတ်(၁)၊(၂)လို့ခွဲထားပါတယ်။
( ၁။ ကိုယ်သေရင်မငိုနဲ့၊ ပါးမှာမျက်ရည်စိုမှာပေါ့။ သပိတ်မသွတ်နဲ့၊ လွတ်ပြီးသား ကျွတ်ပြီးသား။ ထမင်းမထုတ်နဲ့၊ သိုးစာ ပုပ်စာ ဖြုံးတီးစာ။ အိုးမခွဲနဲ့ အိုးမလို ဘာကိုမှ ကိုယ်မစွဲ၊ အပွင့်အခက် ယူမသွားနဲ့ ပြန်လိုက်လာမယ့်အစားမဟုတ်ဘူး။ ရက်လည် နှစ်လည် ဘာကိုမှ မလည်နဲ့၊ သံသယာကြီးမှာ လည်ခဲ့ပေပြီ…။)
( ၂။ ကိုယ်သေရင်မငိုနဲ့၊ ကြိုကြိုပြီး သေထားတယ်။ ဘုရားရှင်ရဲ့ဂုဏ်တော်တွေကို မြတ်နိုးပူဇော်ရင်း အကြိမ်ကြိမ် အသေရင်းထားလို့ မရဏမင်းဆီ ပျော်ပျော်သွားမှာပါ။ ပြီးတော့ ပြောပါရစေ၊ သာသနာ၊ စာပေ၊ ပရဟိတ လုပ်လက်စတွေ ဆက်လုပ်ဖို့ ဟောဒီချစ်ရတဲ့ မိခင်ကမ္ဘာမြေကို ပြန်လာခဲ့မယ် မုချ။ ဒီတော့ ကိုယ်သေရင်မငိုနဲ့၊ ပြုံးစမ်းပါ ဖြေသာစမ်းပါ၊ လူသာရှုံးတာ ကျန်တာမရှုံးဘူး။ မှာခဲ့ပြီ…ပြောခဲ့ပြီနော်….။)
ဒီ(မှာခဲ့ပါရစေ..) ကဗျာလေးကို ဆရာသားဂျာနယ်ကျော်က သူ့သေရင် ဝေငှပါရန် အသေအချာမှာကြားထားခဲ့လို့ ဆရာရဲ့ အသုဘ မှာ မိသားစုမှ လက်ကမ်းဖြန့်ဝေသွားပါကြောင်း ၊ ဆရာနေခြည် က မျက်ရည်ဝဲစွာနဲ့ ဖတ်ကြားပြောဆိုသွားခဲ့ပါတယ်။
စိတ် အဟာရပြည့်ဝအောင် SHADE ဂျာနယ်ကိုဆောင်လို့ ဘ၀အတွက် သုတ၊ရသစုံတဲ့ SHADE စာပေ၀ိုင်းသို့ သွားကြပါစို့..။
ရွှေလမ်းငွေလမ်းဝင်းကြည်
0 comments:
Post a Comment