ယဉ်ကျေးမှုဝန်ကြီးဌာနမှ ကာလတန်ဘိုးထက် ထိုက်ထိုက်တန်တန်ချီးမြှင့်မည့်
ပျူခေတ်လက်ရာ နဂါးခေါင်းရုပ်ပါ ရွှေလက်ကောက်ကြီး နေပြည်တော်သို့ရောက်ရှိ
မြန်မာပို့စ် သတင်းဂျာနယ်တွင် ယခင်အပါတ်မှ ဖော်ပြထားသော ပျူခေတ်လက်ရာ နဂါးခေါင်းရုပ်ပါ ရွှေလက်ကောက်ကြီးသည် (၂၀၁၂ ခု၊ မတ်လ(၂၉)ရက်)နေ့တွင် နေပြည်တော် ယဉ်ကျေးမှုဝန်ကြီးဌာန သို့ရောက်ရှိလာ ကြောင်း သတင်းရရှိပါသည်။ ၂၈-၃-၂၀၁၂ နေ့တွင် မင်းဘူး(စကု)မြို့နယ် တရုပ်-မြန်မာ သဘာဝဓာတ်ငွေ့ပိုက်လိုင်း တူးဖော်စဉ် မြေစာပုံထဲမှ ကောက်ယူတွေ့ရှိခဲ့သော (၁၆ ကျပ်သား၊ ၆ ပဲ၊ ၄.၇၅ ရွေး) ရှိ ၎င်း ရွှေလက်ကောက်ကြီးအား ပိုင်ရှင် မကေသဇင်ကျော်၏ ဖခင် ဦးသိန်းလွင်ဦး နှင့် တာဝန်ရှိသူများထံ မင်းဘူး(စကု) မြို့နယ်အုပ်ချုပ်ရေးမှူး ဦးရဲလင်းအောင် (ပ/၄၇၈၇) မှ မင်းဘူးမြန်မာ့စီးပွားရေးဘဏ်တိုက်က ထုတ်ပြီး ပြန်လည်ထုတ်ပေးကြောင်းသိရ၏။ လက်ကောက်ကြီးအား ကောက်တွေ့သူ ဖခင် ဦးသိန်းလွင်ဦး နှင့်အဖွဲ့တွင် ပါဝင်၍ ဦးဆောင်သူများမှာ ဦးစောလွင် ဒုတိယညွှန်ကြားရေးမှူး၊ မကွေးတိုင်းဒေသကြီးယဉ်ကျေးမှုဌနနှင့် ဦးတင်ဦး လက်ခုပ်ပင် ကျေးရွာ အုပ်ချုပ်ရေးမှူး တို့ဖြစ်ကြသည်။ အသိသက်သေ များမှာ ဦးမျိုးမင်းထွန်း(ပ/၄၄၆၉) မြို့နယ်ဒုတိယဦးစီးမှူး နှင့် ဦးရဲလင်းဦး(ပ/၅၁၃၄) မြို့နယ်ဒုတိယဦးစီးမှူးတို့ဖြစ်ကြသည်။
ပျူခေတ် နဂါးခေါင်းရုပ်ပါ ရွှေလက်ကောက်ကြီး၏ ပိုင်ရှင်နှင့်အဖွဲ့သည် ၂၉-၃-၂၀၁၂ နေ့တွင် နေပြည်တော်ရှိ ယဉ်ကျေးမှုဝန်ကြီးဌါန၊ ဒုတိယ၀န်ကြီးအား ပြသ၍ ညွှန်ကြားရေးမှူး ဦးမျိုးညွှန့် ထံသို့ အပ်နှံခဲ့ကြောင်း သိရ၏။
` ဆရာတို့ဂျာနယ်တွေမှာ ဒီသတင်းကပါလာတော့ ကျွန်တော်တို့ကလည်း အမြန်ဆောင်ရွက်ကြရပါတယ်။ ကျွန်တော်တို့ ယဉ်ကျေးမှုဌာန က စစ်ဆေးအတည်ပြုပြီး သတ္တုတွင်းဝန်ကြီးဌာနမှ တန်ဘိုး အရည်အသွေး စစ်ဆေးရေးဌာနကို တန်းပို့ပေးပြီး စစ်ဆေးခိုင်းရပါတယ်။ ရွှေအရည်အသွေးက အခေါက်တော့ အခေါက်ရွှေပါပဲ။ (၁၆)ပဲရည် အခေါက် အပျော့ရွှေမဟုတ်ဘူး၊ (၁၅)ပဲရည် အခေါက်ရွှေ အမာဖြစ်တယ်လို့သိရပါတယ်။ အလေးချိန်ကတော့ ယခင်စစ်ဆေးပြီး အလေးချိန်ပါဘဲ။ ယခုလက်ရာက ပျူခေတ်က ရိုးရှင်းတဲ့လက်ရာပါ။ ဒီလို ပျူခေတ်က လက်ရာ ရွှေလက်ကောက်ကြီးများကို ဒါကောဆိုရင် (၃)ကွင်းတွေ့ထားပါပြီ။ ပထမစတွေ့တာက မြင်းမူဘက်မှ တစ်ကွင်း၊ မိုင်းမော(ကူမဲမြို့နား)က တစ်ကွင်း၊ ယခု မင်းဘူး(စကု)ဘက်က တစ်ကွင်း ဆိုတော့ သုံးကွင်းတွေ့ရှိထားပါပြီ။ မူမပျက် လက်ရာမပျက်ရတာကတော့ မြင်းမူ ဘက်က လက်ကောက်နဲ့ ယခု လက်ကောက်ကြီး နှစ်ကွင်းပါဘဲ။ အများပြည်သူတွေက ရှေးဟောင်းပစ္စည်းဆိုရင် ဖမ်းမှာဆီးမှာဘဲဆိုပြီး အကြောက်တရားတွေနဲ့ အပြင်ကို ဈေးနည်းနည်းနဲ့ကြိတ်ပြီးရောင်းတတ်ကြပါတယ်။ ဒါကြောင့် ကျွန်တော်တို့ ယဉ်ကျေးမူဝန်ကြီးဌာနကို ရှေးဟောင်းပစ္စည်းများ အပ်နှံကြရင် မူလတန်ဘိုးထက် အဆများစွာ ပိုပေးတယ်ဆိုတာကို ဆရာတို့ဂျာနယ်တွေကနေ အများပြည်သူများသိအောင် တင်ပြပေးစေချင်ပါတယ်။ ယခု လက်ကောက်ကြီးဆိုရင် ယခုလက်ရှိရွှေပေါက်ဈေးနဲ့ တွက်ရင် သိန်းတစ်ရာကျော်လောက်ပဲ ရမှာပါ။ ရှေးဟောင်းပစ္စည်း တန်ဘိုးလက်ရာ နှစ်အရေအတွက်နဲ့ အပိုဆောင်းတွက်ချက်လိုက် ရင် ယခု ဒီလက်ကောက်ကြီးကို သိန်း(၂၇၀) လောက် ချီးမြှင့်ပေးလိမ့်မယ်လို့ ကျွန်တော်အနေနဲ့ ခန့်မှန်းရပါတယ်ခင်ဗျာ..။´ ဟု ဦးစောလွင် ဒုတိယညွှန်ကြားရေးမှူး၊ မကွေးတိုင်းဒေသကြီး ယဉ်ကျေးမှုဝန်ကြီးဌာန မှ ပြောကြားပါသည်။ ဂုဏ်ပြုချီးမြှင့်ပွဲကို ၂၀၁၂ ခု မေလလောက်တွင် မင်းဘူး(စကု) (သို့မဟုတ်) နေပြည်တော် မှာ ကျင်းပပေးမည်ဟု ခန့်မှန်းပြောဆို၍ သတင်းရယူခဲ့ပါသည်။
0 comments:
Post a Comment