မကွေးတိုင်းဒေသကြီး၏ နှစ်သစ်ကူး ခေတ်သစ်သင်္ကြန်
ရွှေလမ်းငွေလမ်းဝင်းကြည်
၁၃၇၂ ခုနှစ်၊ တန်ခူးလဆန်း(၁၀)ရက်၊ ညနေ(၅)နာရီ သင်္ကြန်အကြိုနေ့မှာ မကွေးတိုင်းဒေသကြီး အစိုးရအဖွဲ့ မြန်မာ့ရိုးရာ မဟာသင်္ကြန်ဗဟိုမဏ္ဍပ်တွင် သင်္ကြန်ရေသဘင်ဖွင့်ပွဲ အခမ်းအနားကျင်းပသည်။ မကွေးတိုင်းဒေသကြီး ၀န်ကြီးချုပ်ဦးဘုန်းမော်ရွှေ နှင့် အစိုးရအဖွဲ့ဝန်ကြီးများ၊ စစ်ဘက်၊နယ်ဘက် မှ ဖိတ်ကြားထားသောသူများ၊ စုံညီစွာတက်ရောက်ကြသည်။ ယိမ်းအဖွဲ့ အမျိုးသမီးလေးများနှင့်အတူ မန်းတောင်ရိပ်ခို သီချင်းဖြင့် စတင်ဖွင့်လှစ်လိုက်ကြောင်းသတင်းရရှိပါသည်။
ယခုနှစ်တွင် ယခင်နှစ်များနှင့်မတူ တမူထူးခြားနေ၏။ ယခင်နှစ်များက မကွေးမြို့ကမ်းနားလမ်းတစ်လျှောက် မှာကျင်းပခဲ့သည်။ ယခုအစိုးရသစ် လက်ထက်တွင် မကွေးမြို့၏ လမ်းမကြီးများ နေရာအနှံ့ကျယ်ကျယ်ပြန့်ပြန့် တွင် သင်္ကြန်ရေကစားမဏ္ဍပ်များ များစွာ တည်ဆောက်၍ စည်ကားသိုက်မြိုက်စွာ ရေကစားကြောင်း တွေ့မြင်ရပါသည်။ ဌါနဆိုင်ရာ ရေသဘင် ရေကစားမဏ္ဍပ်များ(၁၄)ခု အပြင် ပုဂ္ဂလိကရေသဘင်မဏ္ဍပ်(၈)ခု နှင့် အခြားဖျော်ဖြေရေးမဏ္ဍပ်ကြီးများ ကို မြင်တွေ့ရပါသည်။ ကမ်းနားလမ်း၊ ဗိုလ်ချုပ်လမ်း၊ နတ်မောက်လမ်း၊ ပြည်တော်သာလမ်း၊ တောင်တွင်းလမ်းမတွေမှာ နေရာအနှံရေကစားမဏ္ဍာပ် များကို တည်ဆောက်ပေးထား၍ မကွေးတစ်မြို့လုံး သင်္ကြန်ရက်များတွင် အထူးစည်ကားနေကြောင်း ကြားသိရပါသည်။
သင်္ကြန်အကြိုနေ့မှစ၍ အကျနေ့၊ အကြပ်နေ့၊ အတက်နေ့ညများတွင်လည်း မဏ္ဍပ်တိုင်းသို့ လှည့်လယ်သွားလာ ဖျော်ဖြေပေးနေကြသော မီးရောင်စုံဖြင့် ဖျော်ဖြေရေးအလှပြကားများကိုလည်း တွေ့မြင်ရပါသည်။ ယင်းအလှပြကားများမှာ ရွှေနတ်သျှင်၊ တောင်တွင်းရွှေပြည်၊ ရေနံ့သာမောင်ကြီး၊ မကွေးမြို့နယ်မှ ပြည်ထောင်စု အလှပြလှေကြီးနှင့် ပိတောက်ဧကရီ တို့ကို မြင်တွေ့ရပါသည်။
သင်္ကြန်ရေပက်ခံကားများမှာ ဓာတ်ဆီဈေးတက်နေသော်လည်း ယခင်နှစ်ထက် အနည်းငယ်သာ ဈေးတက်ကြောင်းသိရ၏။ များသောအားဖြင့် မော်တော်ဆိုင်ကယ်များ၊ သုံးဘီးယာဉ်များ အများအပြားကို မြင်တွေ့ရပါတယ်။ ရေပက်ခံကားပေါ်မှ အမျိုးသားတစ်ဦး၏ပြောကြားချက်အရ
`` စည်တာကတော့ မဏ္ဍပ်တိုင်းမှာ စည်ကားနေပါတယ်။ မနှစ်ကထက်ကို သိသိသာသာကြီး ပိုမိုစည်ကားပါတယ်။ အဓိကစည်ကားတဲ့ မဏ္ဍပ်တွေကတော့ ဆည်မြောင်းမဏ္ဍပ်၊ ရဲတံခွန်မဏ္ဍပ်၊ စည်ပင်သာယာမဏ္ဍပ် တို့မှာ ပိုမိုပြီး အထူးစည်ကားနေတာကို တွေ့မြင်ခဲ့ရပါတယ်..´´။
အလှပြကားဆု ပထမကို မကွေးမြို့နယ် ပြည်ထောင်လှေကြီးမှ ရရှိပါသည်။ တပင်တိုင်အကနှင့် ယိမ်းအဖွဲ့လိုက်အက ပထမဆုကို မကွေးတိုင်းဒေသကြိး ကျန်းမာရေးဌါမှရရှိပါသည်။ မဏ္ဍပ် ပထမဆုကို မကွေးတိုင်းဒေသကြီး ရဲတပ်ဖွဲ့မှ ရရှိပါသည်။ ရေပက်ရာတွင် အတက်ကြွဆုံးဆု (က) အဆင့်ကို မကွေးတိုင်းဒေသကြီး စည်ပင်သာယာမှ ရရှိပါသည်။ (ခ)အဆင့်ဆုကို ဘဏ္ဍာ/အခွန်ဝန်ကြီးဌါနမှ အသီးသီးဆွတ်ခူးသွားကြောင်း သိရပါသည်။
မကွေးသင်္ကြန်မှာ ဧရာဝတီ(မကွေး) တံတားကြီးကလည်း ရှိနေတော့ အနောက်ဖက်ကမ်းက မင်းဘူးမြို့၊ အထက် မင်းလှမြို့၊ စကုမြို့၊ ပွင့်ဖြူမြို့၊ ငဖဲမြို့ နှင့် စလင်းမြို့များမှ ရေပက်ခံကား၊ ဆိုင်ကယ်များလည်း လာရောက်ကြကြောင်း၊ဧရာဝတီမြစ်၏ အရှေ့ဘက်က ချောက်မြို့၊ ရေနံချောင်းမြို့၊ နတ်မောက်မြို့၊ မြို့သစ်မြို့၊ တောင်တွင်းမြို့များမှလည်း ရေသဘင် အလှပြကားများ လာရောက်ကြကြောင်း သတင်းရရှိခဲ့ပါသည်။
0 comments:
Post a Comment